წყალბურთი. ქართველ ლეგიონერთა მძიმე უქმეები

ბოლო დროს ქართველი წყალბურთელები, რომლებიც უცხოურ კლუბებში თამაშობენ, წარმატებებით გვანებივრებდნენ.

გასული უქმეები კი მათთვის ერთობ მძიმე აღმოჩნდა, მაგრამ იყვნენ გამონაკლისებიც.

იტალიის სერია A1-ში დამაჯერებლად ითამაშა მარკო ელაჩას "ორტიჯიამ" (სირაკუზა), რომელმაც შინ "ბოგლიასკო" დაამარცხა 13:8. გამარჯვებულთაგან ერთი ბურთი ელაჩამ გაიტანა.

ახლა საქართველოს ნაკრების წევრის გუნდი 17 ტურის შემდეგ 33 ქულით მე-4 ადგილზეა. 17-ვე მოგებითა და 51 ქულით ევროპული გრანდი "პრო რეკო" მეწინავეობს.

ლიდერს 6-6 ქულით ჩამორჩებიან ელაჩას ყოფილი გუნდი "სპორტმენეჯმენტი" და "ბრეშა", რომლებიც მეორე-მესამე ადგილებს იყოფენ. ჩემპიონატის ფინიშამდე ცხრა ტური დარჩა. 17 მარტს მე-18 ტურში "ორტიჯია" სტუმრად ეთამაშება "სავონას", რომელიც სირაკუზელებს 2 ქულით ჩამორჩება და მე-5 ადგილზეა.

იტალიის ჩემპიონატის სერია A2-ის ჩრდილოეთ ლიგაში რევაზ იმნაიშვილის "სორიმ" შინ 6:2 მოუგო ლიგის აუტსაიდერ "პრომოჯესტის". ქართველი წყალბურთელი ერთი გოლით შეეწია თანაგუნდელებს.

"სორი", რომელიც 15 ქულით მე-8 ადგილზეა, 14 მარტს გამოტოვებულ მატჩს გამართავს შინ "კამოგლისთან", ხოლო 17 მარტს სტუმრად დაუპირისპირდება "კროკერას", რომელიც 24 ქულით მე-4 ადგილზეა. 36 ქულით "ჯენოა" მეწინავეობს.

რომის "ვის ნოვა", რომლის ღირსებასაც ანდრია ბითაძე იცავს, სერია A2-ის სამხრეთის ლიგის მე-12 ტურში შინ ლიდერ "კამპოლონგოსთან" 6:12 დამარცხდა.

მართალია, ქართველმა წყალბურთელმა მსაჯებს მეტოქის მცველები ოთხჯერ გააძევებინა, მაგრამ საკუთარი გუნდი წაგებას მაინც ვერ გადაარჩინა. "ვის ნოვა" 12 ტურის შემდეგ 16 ქულით მე-7 ადგილზეა და 17 მარტს მე-11 ადგილზე მყოფ "ბარის" შეხვდება სტუმრად. 31 ქულით გათამაშების ცხრილის სათავეშია "კამპოლონგო".

რეგიონალნა ლიგის (ადრიატიკის ჩემპიონატი) პირველ ჯგუფში ნიკოლოზ შუბლაძისა და დამირ ცრებულიას "პრიმორაცმა" საკუთარი კედლების დახმარებით დაძაბულ პაექრობაში "პრიმორიეს" აჯობა - 13:11. ორი ბურთი ცრეპულიას ანგარიშზეა.

კარგად ითმაშა მეკარე შუბლაძემაც. "პრომორაცი" 16 ქულით მე-7 ადგილზეა. 47 ქულით დუბროვნიკის "იუგი" ლიდერობს. ქართველთა გუნდი 18 მარტს სტუმრად "პოშკთან" გაარკვევს ურთიერთობას.

გიორგი მესხისა და ნიკა შუშიაშვილის "შაბაცმა" გათამაშების ლიდერ "ცრვენა ზვეზდას" უმასპინძლა. პირველი რვაწუთიანი მონაკვეთის შემდეგ ბელგრადელები შეხვედრას 1:3-ს აგებდნენ, მაგრამ სტუმრებმა მომდევნო პერიოდებში იყოჩაღეს და 8:4 გაიმარჯვეს.

ქართველებს ბურთი არ გაუტანიათ. ამ მარცხით "შაბაცს" 29 ქულა დარჩა და გათამაშების ცხრილში მეორედან მესამე საფეხურზე ჩამოქვეითდა. შაბაცელები 17 მარტს სტუმრად მე-8 ადგილზე მყოფ "კატაროს" შეხვდებიან.

სლოვაკეთის ჩემპიონატში "ნოვაკი" ბრატისლავაში "სლავიასთან" 8:9 დამარცხდა. წაგებულთაგან გიორგი მაგრაქველიძემ 2 გოლი ჩაიწერა აქტივში. 

ყოველდღიური სპორტული გაზეთი "ლელო"
871
მკითხველის კომენტარები / 0 /
მსგავსი ამბები
რუბრიკის სხვა სიახლეები
;