წყალხტომა. სანდრო მელიქიძემ მინსკი ვერცხლით დაასრულა

 21 წლის ქართველმა წყალმხტომელმა სანდრო მელიქიძემ წლეულს ესპანეთის საერთაშორისო ტურნირში 3-მეტრიანი ტრამპლინიდან ინდივიდუალურ ხტომებში 289 ქულით მესამე ადგილი დაიკავა.

კიევის A კატეგორიის საერთაშორისო შეჯიბრების სინქრონულ ხტომებში 16 წლის თორნიკე ონიკაშვილთან ერთად 344 ქულით მეორე ადგილზე გავიდა. გასულ უქმეებზე კი მინსკის (ბელარუსი) საერთაშორისო ტურნირში მოსინჯა ძალები.

საასპარეზოდ 70-მა ქალ-ვაჟმა მოიყარა თავი. მათ შორის - 6-მა საერთაშორისო და 20-მა სპორტის ოსტატმა. 3-მეტრიანი ტრამპლინიდან ინდივიდუალურ ხტომებში სანდრო მელიქიძე (მწვრთნელი - საწყლოსნო სახეობათა ეროვნული ფედერაციის ვიცე პრეზიდენტი ირაკლი ბართაია) საკვალიფიკაციო ეტაპზე 311 ქულით მესამე იყო,

ფინალში კი პირადი სარეკორდო მაჩვენებლით - 348,70 ქულით (საერთაშორისოს ნორმაა 330 ქულა) მეორე ადგილზე გადაინაცვლა და ვერცხლის მედალი მოიპოვა. ოქრო ბაქოს პირველი ევროპული თამაშების მეოთხეადგილოსანმა იური ნავროზოვმა (მინსკი, 377 ქულა) დაიმსახურა. მესამე ადგილზეც მისი თანაგუნდელი ივან სემენიუკი (325 ქულა) გავიდა.

-მინსკის ტურნირის შედეგებით კმაყოფილი ვარ, - გვითხრა ირაკლი ბართაიამ. - სანდრო მელიქიძისგან საპრიზო ადგილს ველოდი, რადგან იგი პერსპექტიული სპორტსმენია და მეტი შეუძლია. შეჯიბრებიდან შეჯიბრებამდე ხტომების სირთულეს ვზრდით და შესრულების ხარისხმაც საგრძნობლად მოიმატა.

რაც შედეგებითაც დასტურდება. გაზაფხულზე მან ესპანეთში 289 ქულით დაიკავა მესამე ადგილი. ამჯერად კი საკუთარი მაჩვენებელი 50 ქულით გააუმჯობესა. თანაც უნდა აღინიშნოს, რომ ეს მხოლოდ ევროპის ჩემპიონატისთვის მზადების პირველი ეტაპია. ამ მნიშვნელოვან შეჯიბრებას კი გაისად 3-9 აგვისტოს შოტლანდიური ედინბურგი უმასპინძლებს.

- ევროპაზე მელიქიძე წყვილებშიც ხომ გამოვა?

- დიახ, 17 წლის თორნიკე ონიკაშვილთან ერთად. წლეულს ამ დუეტმა კონტინენტის პირველობაზე მე-12 ადგილი დაიკავა. შემდეგ კიევის A კატეგორიის საერთაშორისო ტურნირში მე-2 ადგილზე გავიდა.

უკრაინის დედაქალაქში ჩვენებს მასპინძლებმა - წლევანდელი მსოფლიოს ჩემპიონატის ბრინჯაოს პრიზიორებმა, ევროპის 12-გზის ჩემპიონმა ილია კვაშამ და ოლეგ კოლოდმა აჯობეს. თორნიკე მინსკშიც მყავდა წაყვანილი და ქართულმა ტანდემმა ტესტებში მიიღო მონაწილეობა.

უცხოელი არბიტრების თვალით დანახული შუქ-ჩრდილები მაინც სხვაა. სანდრომ და თორნიკემ 350 ქულა დაიმსახურეს, რაც ურიგო შედეგი არაა. თან გასათვალისწინებელია ერთი ფაქტორიც: წყვილთა პაექრობაში ექვსი ხტომაა.

წლეულს მე-6 ახალი ნახტომი დავამატეთ - ორნახევარი მალაყი წინ ორი ხრახნით, რომლის სირთულის კოეფიციენტია 3.4 და მომავალ ტურნირებში სწორედ ეს არის ჩვენი კოზირი.

- ქართველი წყალმხტომელები ევროპამდე სხვა ტურნირებში თუ იასპარეზებენ?

- რა თქმა უნდა. ეს იქნება საერთაშორისო შეჯიბრებები, გრან პრი. 23-29 ივლისს კიევში 19-წლამდელ წყალმხტომელთა მსოფლიოს პირველობა ჩატარდება, რომელშიც ონიკაშვილი 3-მეტრიანი ტრამპლინიდან ხტომებში გამოვა.

ეს იქნება გაისად ბუენოს აირესში გასამართავი მსოფლიოს ახალგაზრდობის მესამე ოლიმპიური თამაშების სალიცენზიო ტურნირიც, ამიტომ მისთვის მოსამზადებლად მეტი გარჯა გვმართებს და იმედია, ქომაგებს არ გავაწბილებთ.

ყოველდღიური სპორტული გაზეთი "ლელო"
879
მკითხველის კომენტარები / 0 /
მსგავსი ამბები
რუბრიკის სხვა სიახლეები
;