ჭაბუკთა ევროფორუმზე საქართველო მეორედ დამარცხდა - იტალია ნახევარფინალშია

საქართველოს ნაკრები ჭაბუკ ხელბურთელთა ევროპის ჩემპიონატის ჯგუფური ეტაპის ბოლო შეხვედრაში დამარცხდა - ტიტე კალანდაძის გაწვრთნილები იტალიას შეხვდნენ და 21:36 წააგეს.

იტალიელები თავიდანვე დაწინაურდნენ და მეტოქეს ანგარიშის გათანაბრების საშუალებაც არ მიცეს. ჩვენებიდან მხოლდო სამმა მოთამაშემ გაიტანა - გიორგი ცხოვრებაძემ (10), ნიკოლოზ კალანდაძემ (6) და გიორგი ლაპიაშვილმა (5). იტალიიდან საუკეთესო მოთამაშედ 5 გოლის ავტორი მაქს პრანტნერი დაასახელეს, ხოლო საქართველოდან -გიორგი ლაპიაშვილი. იტალიელებმა ჯგუფში სამივე თამაში მოიგეს და ნახევარფინალში გავიდნენ.

გიორგი ლაპიაშვილი: "ბოლომდე ვიბრძოლეთ, მაგრამ მოწინააღმდეგემ გვაჯობა. დარჩენილ თამაშებში მაქსიმუმის გამოვლენას შევეცდებით, შეჯიბრება წარმატებით რომ დავასრულოთ. ჩვენს გუნდს 10-დან 7-ს დავუწერდი. ვფიქრობ, მეტის გაკეთება შეგვეძლო".

ჯუზეპე ტედესკო, იტალიის ნაკრების მწვრთნელი: "ძალიან ამაყი და ბედნიერი ვარ, რადგან მასპინძელი დავამარცხეთ, რომელმაც ბელარუსს მოუგო. ჩვენ შესანიშნავი დაცვა გვყავს და თავდასხმაშიც კარგად ვითამაშეთ. პირველ მიზანს მივაღწიეთ, ნახევარფინალში გავედით. ახლა შემდეგი ამოცანების გადაწყვეტას შევუდგებით".

ტიტე კალანდაძე, საქართველოს ნაკრების მწვრთნელი: "უფრო კარგ თამაშს ველოდი. თითქოს ყველაფერი გამოდიოდა, მაგრამ შეტევა ბოლომდე ვეღარ შევძელით, რაც ალბათ, დაღლილობის ბრალი იყო. მთელმა გუნდმა თავი დადო, მაგრამ არ გამოვიდა. ჩვენს თამაშს 10-დან 5-ს დავუწერდი".

769
მკითხველის კომენტარები / 0 /
მსგავსი ამბები
რუბრიკის სხვა სიახლეები
;