ჭადრაკი. გიბრალტარიში, საერთაშორისო ფესტივალი, ქართველებმა მოგებით დაიწყეს

გიბრალტარი მოჭადრაკეთა დიდ საერთაშორისო ფესტივალს მასპინძლობს. მთავარ ტურნირში, რომლის საპრიზო ფონდია 200 000 ფუნტი სტერლინგი, 50 ქვეყნის 276 წარმომადგენელი მონაწილეობს. მათ შორის ოთხი ქართველია.

ვაჟებსა და ქალებში პირველ თხუთმეტ ადგილზე გასული მოჭადრაკეები ფულადი პრიზებით დაჯილდოვდებიან. მამაკაცებში გამარჯვებული 25 000 გირვანქას მიიღებს. ეს პრიზი არ იყოფა.

თუ ორი ან მეტი მონაწილე თანაბარ ქულებს დააგროვებს, უძლიერესის გამოსავლენად ტაიბრეიკი დაინიშნება. ვაჟებში მეორე-მეოთხეადგილოსნები 20.000-15.000-10.000 და 8.000 ფუნტ სტერლინგს დაიმსახურებენ, ხოლო მანდილოსნებში პირველი ხუთეულის ჯილდოები ასეთია: 15 000-10 000-6 000-4 000 და 3 000 ფუნტი სტერლინგი.

გუშინ პირველი ტურის შეხვედრები გაიმართა. ქართველმა დიდოსტატებმა გათამაშების ცხრილში პირველი ქულები ჩაიწერეს: იონითან პინი (ინგლისი)-ნანა ძაგნიძე 0:1, ნინო ბაციაშვილი-დავიდ სპენსი (ინგლისი) 1:0, ელიზაბეტ ჰაპალა (ავსტრია)-ბელა ხოტენაშვილი 0:1, პაულ ობიამივი (ნიგერია)-სალომე მელია 0:1.

ასპარეზობის რეიტინგფავორიტია სომეხი ლევონ არონიანი (2797), რომელმაც სტარტზე შავი ფიგურებით საერთაშორისო ოსტატ ანიტა გარასთან წასაგები პოზიცია მიიღო, მაგრამ შემდეგ მაინც შეძლო პარტიის გადარჩენა, მაგრამ მისი ყაიმი მოჭადრაკესთან, რომელიც ფავორიტს რეიტინგში 447 პუნქტით ჩამორჩება, მაინც სენსაციაა.

დაგეგმილი ქულები მოიპოვეს დანარჩენმა ფავორიტებმა - მაქსიმ ვაშიე-ლაგრავმა (საფრანგეთი, 2793), ჰიკარუ ნაკამურამ (აშშ, 2781), დავიდ ნავარამ (ჩეხეთი, 2749).

დღეს მე-2 ტურის პარტიები გაიმართება. სულ ტურნირზე შვეიცარიული სისტემით 10 ტური გათამაშდება.

ყოველდღიური სპორტული გაზეთი "ლელო"
402
მკითხველის კომენტარები / 0 /
მსგავსი ამბები
რუბრიკის სხვა სიახლეები