ჭადრაკი. ევროპის გუნდური ჩემპიონატი: საქართველოს ქალთა ნაკრებმა ვერცხლი მოიპოვა

კუნძულ კრეტაზე გუშინ დამთავრდა მოჭადრაკეთა ევროპის გუნდური ჩემპიონატი, რომელშიც ქალ-ვაჟთა 72 ნაკრები მონაწილეობდა. შვეიცარიული სისტემით ცხრა ტური გათამაშდა.

ბოლო ტურის წინ ერთადერთი რუსეთის ქალთა გუნდი იყო მშვიდად, რადგან 8 ტურის შემდეგ 15 ქულით სხვებისთვის მიუწვდომელი გახდა. 12-12 ქულით მეორე-მესამე ადგილებს საქართველო და პოლონეთი ინაწილებდნენ, ხოლო მათ თითო ქულით სომხები და უკრაინელები ჩამორჩებოდნენ.

გუშინ ქართველმა დიდოსტატმა ქალებმა მედლის მოპოვების შანსი გამოიყენეს - დაამარცხეს იტალიის ნაკრები 3.5:0.5 და 14 ქულით მეორე ადგილზე გავიდნენ. ნანა ძაგნიძე პირველ დაფაზე ოლგა ზიმინას დაუზავდა, ხოლო ნინო ბაციაშვილმა, ბელა ხოტენაშვილმა და სალომე მელიამ, შესაბამისად, ელენა სედინა, დესი დი ბენედეტო და თეა გუესი დაამარცხეს. პოლონეთის ნაკრებმა რუმინეთთან წააგო - 1:3. რუსეთმა საბოლოოდ 18 შესაძლებლობიდან 17 მოიპოვეს ჩემპიონობა.

ბრინჯაოს მედლებს უკრაინელები დაეუფლნენ. დაფების მიხედვით ქართველ დიდოსტატ ქალთა მონაგარი ასეთია: ნანა ძაგნიძე- 4.5 (8 პარტიიდან), ნინო ბაციაშვილი- 5 (8), ბელა ხოტენაშვილი- 6.5 (8), ლელა ჯავახიშვილი- 4.5 (7), სალომე მელია- 4.5 (5). ხოტენაშვილმა 14, მელიამ კი 10 სარეიტინგო პუნქტი დაიმსახურა.

ვაჟთა ტურნირის ბოლო დღეს საქართველოს ნაკრებმა კარი გაიჯახუნა - ფინეთის ნაკრებს მინიმალური ანგარიშით - 2.5:1.5 სძლია (ტომი ნიბაკი-ბაადურ ჯობავა 1:0, მიკა კარტენენი-მიხეილ მჭედლიშვილი 0:1, ვილკა სიპილია-დავით ჯოჯუა 0:1, კალე ნეიმი-ლუკა პაიჭაძე 0.5:0.5) და 9 გუნდური ქულით მე-19 ადგილი დაიკავა, არადა, საშუალო რეიტინგით მე-13 ადგილზე იყო. ნაკრების წევრთა წვლილი: ბაადურ ჯობავა- 2.5 (7), მიხეილ მჭედლიშვილი- 3.5 (7), ლევან ფანცულაია- 5 (7), დავით ჯოჯუა- 4 (8), ლუკა პაიჭაძე- 4 (7). ჯობავამ რეიტინგი 16 პუნქტით გაიუარესა, ხოლო ფანცულაიამ 14 პუნქტი დაიმატა.

1116
მკითხველის კომენტარები / 0 /
მსგავსი ამბები
რუბრიკის სხვა სიახლეები
;