ჭადრაკი. ევროპის გუნდური ჩემპიონატი: საქართველო VS რუსეთი კრეტაზე

კრეტაზე გრძელდება მოჭადრაკეთა ევროპის გუნდური ჩემპიონატი. გუშინ, 30 ოქტომბერს, მესამე ტურის შეხვედრები გაიმართა. საქართველოს ქალთა ნაკრები უნგრეთის გუნდს დაუპირისპირდა.

ჩვენებს პირველი ქულა მე-4 დაფაზე ლელა ჯავახიშვილმა მოუტანა - შავი ფიგურებით მან ტაისია გარას 36-ე სვლაზე გააჩერებინა საათი. მერე ბელა ხოტენაშვილმა მე-60 სვლაზე პეტრა პაპი დაამარცხა. მესამე გამარჯვება ნინო ბაციაშვილს უნდა ეზეიმა (მანამდე პირველ დაფაზე ნანა ძაგნიძე და ჰოანგ თან თრანგი დაშორდნენ ერთმანეთს მშვიდობიანად), რადგან სიდონია ვაიდასთან ორთაბრძოლისას 53-ე სვლაზე აშკარად მოსაგები პოზიცია ჰქონდა. ვერ გეტყვით, ამ სიტუაციაში რა მოხდა, ქართველმა მოჭადრაკემ ზედიზედ რამდენიმე შეცდომა დაუშვა და მეტოქეს პარტიის გადარჩენის საშუალება მისცა. საბოლოოდ ქართველებმა 3:1 მოიგეს.

ტურის ცენტრალური შეხვედრა იყო ფავორიტების - რუსეთისა და უკრაინის ქალთა გუნდების მატჩი. ორ-ორგზის ევროპის ჩემპიონები - კატერინა ლაგნო და ნატალია ჟუკოვა, ასევე, ოლგა გირია და ინა გაპონენკო დაზავდნენ. ევროპის ორგზის რუსმა ჩემპიონმა ვალენტინა გუნინამ მსოფლიოს ექსჩემპიონი ანა უშენინა დაამარცხა.

მატჩის ბედი მსოფლიოს და ევროპის ექსჩემპიონ ალექსანდრა კოსტენიუკისა და მსოფლიოს ვიცე ჩემპიონ ანა მუზიჩუკის ორთაბრძოლას უნდა გადაეწყვიტა. დიდი ხნის პაექრობის შემდეგ ისინი ყაიმზე შეთანხმდნენ, რამაც გამარჯვება რუსეთის ნაკრებს არგუნა - 2.5:1.5.

პოლონეთი-ისრაელი 3:1, თურქეთი-ესპანეთი 0.5:3.5.

* * *
ვაჟთა ტურნირში საქართველოს ნაკრებს იოლად დანებდა ისლანდიის გუნდი - 0.5:3.5 (ჰედინ სტიგრიმსონი-მიხეილ მჭედლიშვილი 0:1, სტინ გრეტარსონი-ლევან ფანცულაია 0:1, ჰანს სტეფანსონი-დავით ჯოჯუა 0.5:0.5, გუდმუნდარ კიარტანსონი-ლუკა პაიჭაძე 0:1).

ლიდერთა მატჩები: უნგრეთი-ჰოლანდია 2:2, ჩეხეთი-რუსეთი 1.5:2.5, ხორვატია-სომხეთი 2:2, იტალია-გერმანია 0.5:3.5.

სამი ტურის შემდეგ ქალებში 6-6 ქულით საქართველო, რუსეთი, პოლონეთი და ესპანეთი ლიდერობენ. მათ ორ-ორი ქულით ცხრა გუნდი ჩამორჩება. ვაჟებში 6 ქულით ერთპიროვნულად რუსები ლიდერობენ. შვიდ გუნდს თითო ქულით ნაკლები აქვს. საქართველოს ვაჟთა ნაკრები 4 ქულით მე-14 ადგილზეა.

IV ტური
ქალები: საქართველო-რუსეთი, ეპანეთი-პოლონეთი, ჰოლანდია-იტალია, საბერძნეთი-სომხეთი, საფრანგეთი-ისრაელი, უნგრეთი-უკრაინა.
ვაჟები: რუმინეთი-საქართველო, რუსეთი-უნგრეთი, გერმანია-პოლონეთი, ისრაელი-ხორვატია, სომხეთი-ჰოლანდია.

ყოველდღიური სპორტული გაზეთი "ლელო"
1375
მკითხველის კომენტარები / 0 /
მსგავსი ამბები
რუბრიკის სხვა სიახლეები
;