ჭადრაკი. ევროპის გუნდური ჩემპიონატი: სომხებს აჯობეს...

4:0 - ასეთი ანგარიშით მოუგო კუნძულ კრეტაზე მოჭადრაკეთა ევროპის გუნდურ ჩემპიონატში მე-5 ტურის მატჩი საქართველოს ქალთა ნაკრებმა სომხეთის გუნდს.

იოლი გამარჯვება ჩანს, მაგრამ მხოლოდ ერთი შეხედვით, რადგან ოთხივე პარტია ერთობ დაძაბულად წარიმართა. დასტურად ისიც გამოდგება, რომ სალომე მელიამ 38-ე სვლაზე სძლია მე-4 დაფაზე მარია კურსოვას. მესამე დაფაზე ლელა ჯავახიშვილს ორი სვლით მეტი დასჭირდა ლილიტ გალოიანის დასამარცხებლად. ევროპის ჩემპიონმა ნანა ძაგნიძემ შავი ფიგურებით 56-ე სვლაზე აჯობა სომეხთა გუნდის ლიდერ ელინა დანიელიანს.

ყველაზე დიდხანს მეორე დაფაზე ბელა ხოტენაშვილისა და ლილიტ მკრტიჩიანის პარტია გაგრძელდა. არც არის გასაკვირი - მეტოქეები ახლოს იცნობენ ერთმანეთის შემოქმედებას. ყოველივეს მიუხედავად, ქართველმა დიდოსტატმა მკრტიჩიანს 84-ე სვლაზე გააჩერებინა საათი და ჩვენს გუნდს მეოთხე ქულა მოუტანა.

კვლავ წარმატებით ითამაშა გუნდურში ევროპის მოქმედმა ჩემპიონმა რუსეთის ნაკრებმა, რომელმაც ესპანეთი დაჯაბნა - 3:1. საგულისხმოა, რომ პირენეელთა შემადგენლობაში ითამაშა საცხოვრებლად ესპანეთში გადასულმა ქართველმა მოჭადრაკე ანა მათნაძემ, რომელიც მესამე დაფაზე შავი ფიგურებით ევროპის ორგზის ჩემპიონ ვალენტინა გუნინას 108-ე სვლაზე დაუზავდა, არადა, 74-ე სვლისთვის საკმაოდ პერსპექტიული პოზიცია ჰქონდა.

მეწინავე ჯგუფის წევრთა დანარჩენი პარტიები ასე დასრულდა: იტალია-პოლონეთი 2:2, უკრაინა-საფრანგეთი 3:1, თურქეთი-სლოვენია 2.5:1.5, რუმინეთი-გერმანია 2.5:1.5, ისრაელი-აზერბაიჯანი 1.5:2.5, ბელარუსი-ჰოალნდია 3:1 (მეორე დაფაზე ნიდერლანდელთა სპორტულ ღირსებას ტიტების ქვეყანაში გათხოვილი თეა ლანჩავა იცავდა, რომელიც თეთრი ფიგურებით ოლგა ბადელკასთან დამარცხდა).

ხუთი ტურის შემდეგ 10 ქულით რუსეთი ლიდერობს. საქართველომ 8 ქულით მეორე ადგილზე გადაინაცვლა. მართალია, ამდენივე ქულას მოუყარეს თავი უკრაინამ, პოლონეთმა და თურქეთმა, მაგრამ ჩვენებურები მათ დამატებითი მაჩვენებლებით უსწრებენ. ესპანეთსა და იტალიას 7-7 ქულა აქვთ.

* * *
ვაჟთა ტურნირში მეორედ წააგო საქართველოს ნაკრებმა - ჩვენებმა ქულით დათმეს მატჩი ისრაელის გუნდთან 1.5:2.5 (ბაადურ ჯობავა-ბორის გელფანდი 0.5:0.5, მიხეილ მჭედლიშვილი-მაქსიმ როდშტეინი 0:1, ლევან ფანცულაია-ემილ სუტოვსკი 0.5:0.5, ლუკა პაიჭაძე-ტამირ ნაბათი 0.5:0.5)...

უნგრეთი-სომხეთი 2:2, ხორვატია-გერმანია 2.5:1.5, პოლონეთი-ბელარუსი 3:1, რუსეთი-თურქეთი 3.5:0.5, აზერბაიჯანი-ჩეხეთი 3:1, სერბეთი-საფრანგეთი 1.5:2.5, ჰოლანდია-რუმინეთი 1.5:2.5.

ათი შესაძლებლობიდან 9 ქულით ხორვატია დაწინაურდა. ლიდერს თითო ქულით ჩამორჩებიან უნგრეთი, რუსეთი, სომხეთი და პოლონეთი. ისრაელმა, აზერბაიჯანმა, საფრანგეთმა და რუმინეთმა 7-7 ქულას მოუყარეს თავი. საქართველოს ნაკრები 5 ქულით მე-20 ადგილზეა.

შეჯიბრების მონაწილეები დღეს დაისვენებენ. VI ტურში მეწინავენი ასე დაწყვილდნენ:

ქალები: საქართველო-უკრაინა, პოლონეთი-რუსეთი, იტალია-თურქეთი, ესპანეთი-ბელარუსი, აზერბაიჯანი-რუმინეთი, სომხეთი-უნგრეთი, საბერძნეთი-საფრანგეთი.
ვაჟები: საქართველო-იტალია... უნგრეთი-ხორვატია, პოლონეთი-რუსეთი, სომხეთი-აზერბაიჯანი, რუმინეთი-ისრაელი, უკრაინა-საფრანგეთი.

ყოველდღიური სპორტული გაზეთი "ლელო"
1549
მკითხველის კომენტარები / 0 /
მსგავსი ამბები
რუბრიკის სხვა სიახლეები
;