ჭადრაკი. ევროპის გუნდური ჩემპიონატი: უკრაინასთან მატჩი გადამწყვეტი იქნება

კუნძულ კრეტაზე ერთდღიანი შესვენების შემდეგ დღეს განახლდება მოჭადრაკეთა გუნდური ევროპის ჩემპიონატი.

შეგახსენებთ, რომ ხუთი ტურის შემდეგ ქალებში 10 ქულით ერთპიროვნულად რუსეთის ნაკრები ლიდერობს. 8-8 ქულით მეორე-მეხუთე ადგილებს საქართველო, უკრაინა, პოლონეთი და თურქეთი ინაწილებენ. ვაჟებში 9 ქულით ხორვატია ლიდერობს. საქართველოს ნაკრები 5 ქულით მე-20 ადგილზეა.

საბერძნეთში საქართველოს ჭადრაკის ფედერაციის პრეზიდენტს, გიორგი გიორგაძეს შევეხმიანეთ და შთაბეჭდილებების გაზიარება ვთხოვეთ.

- ჩემპიონატი ცნობილ კურორტზე ტარდება, ამდენად, ინფრასტრუქტურის მხრივ, აქ დიდი შესაძლებლობებია. ცხადია, უპირველესად, სასტუმროსა და სათამაშო დარბაზს ვგულისხმობ. რაც შეეხება ორგანიზაციას, დამაკმაყოფილებლად შევაფასებდი.

ისე, თავის ქებად თუ არ ჩამითვლით, საქართველოში სტუმრებს მეტ ყურადღებას უთმობენ.

- დასვენების დღე როგორ გამოიყენეთ?
- ორივე ნაკრების წევრებმა 2 ნოემბერი, უმთავრესად, ძალების აღდგენასა და მეექვსე ტურისთვის მზადებას მოანდომეს. წინ ხომ გადამწყვეტი მატჩებია. ქალები მედლებისათვის უშუალო კონკურენტ უკრაინას ხვდებიან და ამით ყველაფერია ნათქვამია. საგულისხმოა, რომ ქალთა ნაკრების მთავარი მწვრთნელის - ელიზბარ უბილავას რეკომენდაციით, ჩემპიონატზე კონსულტანტად მისი ინდოელი შეგირდი, ძალიან კარგი თეორიტიკოსი ბასკარან ადიბანი მოვიწვიეთ, რომელიც კომუნიკაბელური ახალგაზრდა აღმოჩნდა და სერიოზულ დახმარებას უწევს ჩვენს გუნდს.

- განვლილ ხუთ ტურზე რას იტყვით?
- ქალთა ნაკრებთან ჯერჯერობით სამდურავი არაფერი გვაქვს - კარგად და სტაბილურად თამაშობს. გული დაგვწყვიტა ჩემპიონობისთვის მთავარ კონკურენტ რუსეთის ნაკრებთან წაგებამ. ტრადიციულად უხერხულ მეტოქესთან პაექრობამ დაძაბულად ჩაიარა. ფორტუნა ოდნავ ჩვენს მხარეს რომ ყოფილიყო, შეიძლებოდა, მატჩი ფრედაც დაგვემთავრებინა.

ობიექტურად თუ ვიმსჯელებთ, შეხვედრის შედეგი ლოგიკური იყო, რადგან ამ ეტაპზე რუსებმა უკეთესად ითამაშეს. რაც შეეხება დანარჩენ ორთაბრძოლებს, ჩვენი ქალების უპირატესობა აშკარა იყო, უპირველესად, სომხეთის ნაკრებთან მშრალი ანგარიშით გამარჯვება მინდა გამოვყო.

მართალი გითხრათ, ჩემპიონატის პირველ ნახევარში ვაჟებისგან ასეთ სუსტ თამაშს, ნამდვილად, არ ველოდით. განსაკუთრებით დასანანი იყო მეხუთე ტურში ისრაელის ძლიერ გუნდთან მარცხი. ჩვენთვის არასასიამოვნო სიურპრიზია გუნდის ლიდერის - ბაადურ ჯობავას ცუდი სპორტული ფორმა. ბოლო წლების განმავლობაში პირველად ხდება, რომ ის ნაკრებში ასე სუსტად გამოდის. გახსოვთ, შარშან ბაქოს მსოფლიოს საჭადრაკო ოლიმპიადაზე მან პირველ დაფაზე პერფომანსით ყველას აჯობა. იმედია, დარჩენილ ოთხ ტურში ის მდგომარეობას გამოასწორებს და გუნდს პირველ ათეულში ადგილის დაბევებაში დაეხმარება. ამის შანსი ჯერ კიდევ გვაქვს.

- გუნდები, უმთავრესად, მინიმალური ანგარიშებით იგებენ ან შეხვედრები ფრედ მთავრდება. რა ხდება - ფავორიტები იოლ გასეირნებას ელოდნენ და სათანადოდ არ მოემზადნენ თუ არასაჭადრაკო ქვეყნებში ამაღლდა თამაშის დონე?
- საერთო შეფასებით, ეს ევროპის ჩემპიონატი წინა საჭადრაკო ოლიმპიადაზე ძლიერია შემადგენლობით. მაგალითად, დაემატა სომხეთის ნაკრები ლევონ არონიანის მეთაურობით, ისრაელის ვაჟთა ნაკრებში უძლიერესმა დიდოსტატებმა მოიყარეს თავი, თანაც იშვიათია სუსტი მეტოქეები, რადგან მსოფლიოში ჭადრაკის საერთო დონე შედარებით გათანაბრდა, დასტურად ისიც გამოდგება, რომ ვაჟთა ელიტურ ტურნირს ხორვატიის გუნდი ლიდერობს.

- სავარაუდოდ, ჩემპიონატის საპრიზო სამეულებს ხომ ვერ დაგვისახელებთ?
- ჯერ კიდევ ოთხი ტურია დარჩენილი და ყველაფერია მოსალოდნელი, ამდენად, გადაჭრით რამის თქმა ძნელია. ქალთა ტურნირში, შესაძლოა, გადამწყვეტი აღმოჩნდეს მე-6 ტურის ორთაბრძოლები, სადაც ფავორიტები დაუპირისპირდებიან ერთმანეთს. ოქროს მედლების უპირველესი კანდიდატები რუსები არიან, ხოლო ვერცხლისა და ბრინჯაოს ჯილდოებისთვის კონკურენციას საქართველო, უკრაინა, პოლონეთი და ამ ჩემპიონატზე საკმაოდ კარგად მოთამაშე ესპანეთი გაუწევენ ერთმანეთს.

ვაჟთა ტურნირში საქმე შედარებით უფრო რთულადაა. მედლებისთვის პრეტენზიას აქ ერთბაშად 7-8 ნაკრები აცხადებს. ამდენად, ნუ გავუსწრებთ მოვლენებს და მომდევნო ტურის შეხვედრებს დაველოდოთ...

შეგახსენებთ, რომ დღეს მე-6 ტურში ქალებში საქართველო-უკრაინა გაიმართება, ვაჟებში - საქართველო-იტალია...

ყოველდღიური სპორტული გაზეთი "ლელო"
1366
მკითხველის კომენტარები / 0 /
მსგავსი ამბები
რუბრიკის სხვა სიახლეები
;