ჭადრაკი. ევროპის გუნდური ჩემპიონატი: ქალები უდანაკარგოდ

ბერძნულ კრეტაში დაიწყო მოჭადრაკეთა ევროპის გუნდური ჩემპიონატი, რომელშიც მანდილოსანთა 32 და მამაკაცების 40 ნაკრები მონაწილეობს. გასულ უქმეებზე ორი ტურის შეხვედრები გაიმართა.

ქალთა შეჯიბრებაში საქართველოს ნაკრები საშუალო რეიტინგით რუსეთის შემდეგ მეორე ნომერია. ჩვენი დიდოსტატები სტარტზე განთესვით მე-18 ადგილზე მყოფ ბელარუსებს დაუპირისპირდნენ. 

2017 წლის ევროპის ჩემპიონმა ნანა ძაგნიძემ პირველ დაფაზე შავებით ნასტასია ზიაზიულკინასთან დათმო პარტია. მესამე-მეოთხე დაფებზე ბელა ხოტენაშვილმა და ლელა ჯავახიშვილმა, შესაბამისად, ლანიტა სტეცკო და ტატიანა რევო დაამარცხეს, ნინო ბაციაშვილი კი ოლგა ბადელკას დაუზავდა. საქართველოს ნაკრებმა 2.5:1.5 გაიმარჯვა და გათამაშების ცხრილში პირველი ორი ქულა ჩაიწერა.

ჩემპიონატის ვერც სხვა ფავორიტებმა სძლიეს იოლად მეტოქეებს: რუსეთი (რეიტინგფავორიტი)-საბერძნები-1 (განთესვით მე-17) 2.5:1.5, უკრაინა (მე-3)-სერბეთი (მე-19) 2.5:1.5, სლოვენია (მე-20)-პოლონეთი (მე-4) 1.5:2.5, გერმანია-სლოვაკეთი 3:1.

ვაჟებში საქართველოს ნაკრებმა, რომელიც ტურნირზე მეცამეტეა, პირველ ტურში მაკედონიას მოუგო - 3:1 (მიხეილ მჭედლიშვილი-ფილიპ პანჩევსკი 0:1, ლევან ფანცულაია-ტრაიკო ნედევი 1:0, დავით ჯოჯუა-დეიან ტროიანოვსკი 1:0, ლუკა პაიჭაძე-ნიკოლა ნიკოლოვსკი 1:0).

ფავორიტთა პირველ ტურს უსენსაციოდ არ ჩაუვლია: აზერბაიჯანის ვაჟთა ნაკრები, რომელიც მე-2 ნომრადაა განთესილი და ოქროს მედლის კანდიდატია, ასპარეზობის 22-ე ნომერ იტალიასთან დამარცხდა - 1.5:2.5; რუსეთი-სლოვენია 2.5:1.5, უკრაინა-ავსტრია 3.5:0.5, მოლდოვა-ინგლისი 2:2, ისრაელი-ნორვეგია 2:2, შვეიცარია-სომხეთი 1:3.

გუშინ მეორე ტურში საქართველოს ქალთა ნაკრებმა უკეთ ითამაშა და საფრანგეთს უპრობლემოდ მოუგო - 3.5:0.5 (მარი სებაგი-ნინო ბაციაშვილი 0:1, სოფი მილე-ბელა ხოტენაშვილი 0:1, ელმირა სკრიპჩენკო-ლელა ჯავახიშვილი 0.5:0.5, პაულინ გიუზარდი-სალომე მელია 0:1).

დანარჩენი მატჩები: ისრაელი-იტალია 3.5:0.5, ჩეხეთი-რუსეთი 1.5:2.5, უკრაინა-სომხეთი, პოლონეთი-გერმანია, აზერბაიჯანი-უნგრეთი 1.5:2.5, ესპანეთი-რუმინეთი 3.5:0.5, თურქეთი-ჰოლანდია.

ორი ტურის შემდეგ გუნდური ოთხ-ოთხი ქულით დაწინაურდნენ საქართველო, რუსეთი, ისრაელი, უნგრეთი, ესპანეთი, თურქეთი, უკრაინა და პოლონეთი.

საქართველოს ვაჟთა ნაკრები, სამწუხაროდ, ჩეხეთის ძლიერ გუნდთან 1.5:2.5 დამარცხდა (ბაადურ ჯობავა-დავით ნავარა 0:1, მიხეილ მჭედლიშვილი-ვიქტორ ლაზნიჩკა 0.5:0.5, ლევან ფანცულაია-ირჟი სტოჩეკი 1:0, დავით ჯოჯუა-ვოიტეჩ პლატი 0:1). სომხეთი-საბერძნეთი (1) 2.5:1.5, რუმინეთი-უნგრეთი, ჰოლანდია-უკრაინა 2.5:1.5, საფრანგეთი-ესპანეთი 2:2, ბელარუსი-რუსეთი 1.5:2.5.

ყოველდღიური სპორტული გაზეთი "ლელო"
1264
მკითხველის კომენტარები / 0 /
მსგავსი ამბები
რუბრიკის სხვა სიახლეები
;