ჭადრაკი. ინტერვიუ ნანა ძაგნიძესთან: ოლიმპიადა უნდა მოვიგოთ

2017 წელს ქართველმა სპორტსმენებმა მსოფლიოს ჩემპიონატებში ოქროს უხვი მოსავალი მოიმკეს. კლასიკურ ჭადრაკში ევროპის შარშანდელი ჩემპიონატის გამარჯვებულმა ნანა ძაგნიძემ წლის მიწურულს უმაღლესი სინჯის ჯილდოების რაოდენობა ერთით გაზარდა

30 დეკემბერს ერ-რიადში (საუდის არაბეთი) მან ბლიცში (ელვისებური ჭადრაკი) მსოფლიოს ჩემპიონატი მოიგო და 80 000 დოლარი დაისაკუთრა.

შეჯიბრებაში 35 ქვეყნის 100 ქალი მონაწილეობდა. შვეიცარიული სისტემით 11 შეწყვილებული ტური გაიმართა. ბოლო ტურის წინ ქართველი დიდოსტატი ქულით უსწრებდა ევროპის ორგზის ჩემპიონ ვალენტინა გუნინას (რუსეთი).

ჩვენებური ბოლო ტურში სომეხ ელინა დანიელიანს დაუზავდა და 21 შესაძლებლობიდან 16.5 ქულით სხვებისთვის მიუწვდომელი აღმოჩნდა. 16 ქულით ვერცხლის მედალი ვალენტინა გუნინას ხვდა.

14-14 ქულით მესამე-მეოთხე ადგილები რაპიდში მსოფლიოს 2017 წლის გამარჯვებულმა ცზიუ ვენძიუნმა (ჩინეთი) და ევროპის ორგზის ჩემპიონმა კატერინა ლაგნომ (რუსეთი) გაიყვეს. უკეთესი კოეფიციენტით მესამე ადგილი ვენძიუნმა დაიკავა.

ნანა ძაგნიძეს სწრაფ ჭადრაკშიც მედლის მოსაპოვებლად ნახევარი ქულა დააკლდა: აქ შვეიცარიული სისტემით 15 ტური გათამაშდა. ბოლო ტურის წინ საპრიზო ადგილებზე გასვლის შანსი ჰქონდა ქართველ დიდოსტატს, რომელიც თეთრი ფიგურებით ჩინელ ლეი ტინცზეს დაუზავდა.

საბოლოოდ 15 შესაძლებლობიდან 10-10 ქულით მეოთხე-მერვე ადგილები ხუთმა მოჭადრაკემ გაიყო. უკეთესი დამატებითი მაჩვენებლებით ბელა ხოტენაშვილი მეოთხე, ნანა ძაგნიძე კი მეექვსე იყო. 11.5 ქულით მსოფლიოს ჩემპიონი გახდა ჩინელი ცზიუ ვენძიუნი.

გამარჯვებულს ნახევარი ქულით ჩამორჩა მისი თანამემამულე ლეი ტინცზე, რომელსაც ვერცხლის მედალი ხვდა. 10.5 ქულით მესამე ადგილზე გერმანელი ელიზაბეტ პეტცი გავიდა.

ნანა ძაგნიძისთვის ეს წარმატება შემთხვევითი არ ყოფილა - 2015 წელს (ხანტი-მანსიისკი) მან ბლიცში მსოფლოს ჩემპიონატზე მეორე ადგილი დაიკავა, 2016 წელს კი ყატარში მსგავს შეჯიბრებაზე რაპიდში მესამე იყო.

- შარშანდელი წელი ჩემს კარიერაში განსაკუთრებით წარმატებული აღმოჩნდა, - გვითხრა ნანა ძაგნიძემ. - სეზონის სტარტზე ქალთა მსოფლიოს ინდივიდუალურ ჩემპიონატში, რომელსაც თეირანმა უმასპინძლა, რვა საუკეთესოში მოვხვდი.

მერე ლატვიაში ევროპის ინდივიდუალურ ჩემპიონატში ოქროს მედალი მოვიპოვე, საქართველოს ქალთა ნაკრებთან ერთად ევროპის გუნდურ ჩემპიონატში მეორე, მსოფლიოს ჩემპიონატში კი III ადგილი დავიკავე. ბათუმის "ნონას" შემადგენლობაში ევროპის საკლუბო ჩემპიონატი მოვიგე.

- და სეზონის გვირგვინი იყო საუდის არაბეთში მსოფლიოს ჩემპიონატში მიღწეული წარმატება...

- ტურნირში, რომელშიც პლანეტის უძლიერესი დიდოსტატი ქალები მონაწილეობენ, ძალიან ძნელია ტუტულის მოპოვება, მართალი გითხრათ, არაბული ბატალიებისთვისაც მონდომებით ვემზადებოდი. რაპიდში კარგად დავიწყე ასპარეზობა.

10 ტურის მერე ლიდერებში ვიყავი, ჩინელ ცზიუ ვენძიუნთან, რომელიც შემდეგ ჩემპიონი გახდა, მე-11 ტურში მოსაგები პოზიცია მივიღე. შუა თამაშში, სამწუხაროდ, ორი უხეში შეცდომა დავუშვი და პარტიაც დავთმე, რითაც, ფაქტობრივად, ტიტულისთვის ბრძოლას დავემშვიდობე,

თუმცა ბოლო ტურის წინ ბრინჯაოს შანსი მრჩებოდა, ოღონდ ჩინელი ლეი ტანცზისთვის, რომელიც მსოფლიო რეიტინგით პირველი ათეულის მოჭადრაკეა, აუცილებლად უნდა მომეგო, მაგრამ ჩვენ დავზავდით და საბოლოოდ მე-6 ადგილზე გავედი.

სამაგიეროდ, ბლიცში ყველაფერი კარგად აეწყო: პირველი ტურიდანვე დავწინაურდი და ფინიშამდე უპირატესობა ხელიდან არ გამიშვია. ბოლო ტურში ჩემპიონობისთვის ყაიმი ხელს მაძლევდა და მეც თამაშის გაუმწვავებლად ელინა დანიელიანს დავუზავდი.

ჩემპიონობასთან ერთად ბლიცში რეიტინგი 99 პუნქტით გავიმდიდრე და ელვისებური ჭადრაკის საერთაშორისო კლასიფიკაციაში 2580 პუნქტით საახალწლოდ პირველ ადგილზე გადავინაცვლე.

- ტიტულები საპატიოცაა და პასუხისმგებლობაც, რადგან გულშემატკივრები, ჩვეულებრივ, სპორტსმენებს თამასის დაწევას არ პატიობენ...

- მესმის, რომ ეს ასეა და ახალი გამოწვევებისთვის მეც მზად ვარ. 2018 წელი განსაკუთრებით იმით არის მნიშვნელოვანი, რომ შემოდგომით ბათუმი მსოფლიოს საჭადრაკო ოლიმპიადას უმასპინძლებს.

2008 წლის დრეზდენის ოლიმპიადის შემდეგ მსგავს შეჯიბრებებში ოქრო არ მოგვიპოვებია, ამიტომ წლეულს საგანგებო მისია გვეკისრება - შინ ვთამაშობთ და ვერა მენჩიკის თასიც საქართველოში უნდა დავიტოვოთ.

საჭადრაკო ოლიმპიადის შემდეგ სხვა მნიშვნელოვანი ტურნირებიც მელის: გაზაფხულზე სლოვაკეთში ევროპის ინდივიდუალურ ჩემპიონატზე ტიტულის დასაცავად ვიბრძოლებ, ნოემბერში მსოფლიოს ჩემპიონატია.

ერთი სიტყვით, წინ დაძაბული სეზონია და ქომაგების გასახარებლად არაფერს დავიშურებ. ვიმედოვნებ, რომ 2018 უფრო წარმატებული იქნება, ვიდრე 2017 წელი.

ყოველდღიური სპორტული გაზეთი "ლელო"
881
მკითხველის კომენტარები / 0 /
მსგავსი ამბები
რუბრიკის სხვა სიახლეები