ჭადრაკი. ძაგნიძემ ლოზანაში გრანპრი მოიგო

შვეიცარიულ ლოზანაში დღეს დამთავრდა მოჭადრაკე ქალთა ფიდეს 2019-2020 წლების გრან პრის მესამე ეტაპი (საპრიზო ფონდი 80.000 ევრო), რომელშიც წრიული სისტემით 12 დიდოსტატი იბრძოდა საპრიზო ადგილებისთვის. ბოლოსწინა ტურის წინ 2017 წლის ევროპის ჩემპიონი ნანა ძაგნიძე და მსოფლიოს ვიცე ჩემპიონი ალექსანდრა გორიაჩკინა 6.5-6.5 ქულით მეწინავეობდნენ. ლიდერები დღეს ერთმანეთს დაუპირისპირდნენ და 24-ე სვლაზე დაზავდნენ. საბოლოოდ 7-7 ქული მოაგროვეს. პირველი ადგილი ქართველ მოჭადრაკეს ხვდა, რადგან მას მეტოქეზე ერთი მოგებით მეტი (სულ ტურნირზე 4 პარტია მოიგო, ერთში დამარცხდა და ექვსი შეხვედრა ყაიმით დაასრულა) აღმოაჩნდა.

მე-11 ტურის დანარჩენი პარტიებიც მშვიდობიანად დასრულდა. დაზავდნენ: ანა მუზიჩუკი (უკრაინა) - ალინა კაშლინსკაია (რუსეთი), მარია მუზიჩუკი (უკრაინა) - ჰარიკა დრონავალი (ინდოეთი), პია კრამლინგი (შვედეთი) - ანტოანეტა სტეფანოვა (ბულგარეთი), მარი სებაგი (საფრანგეთი) - ჟანსაია აბდუმალიკი (ყაზახეთი), ცზიუი ვენძიუნი (ჩინეთი) - ალექსანდრა კოსტენიუკი (რუსეთი).

მესამე ეტაპის საბოლოო შედეგები: ნანა ძაგნიძე, ალექსანდრა გორიაჩკინა - 7-7, ჟანსაია აბდუმალიკი - 6.5, ალინა კაშლინსკაია, ანა მუზიჩუკი - 6-6, ანტოანეტა სტეფანოვა, ჰარიკა დრონავალი, მარია მუზიჩუკი - 5.5-5.5, ცზიუი ვენძიუნი, პია კრამლინგი - 4.5-4.5, ალექსანდრა კოსტენიუკი, მარი სებაგი 4-4 ქულა.

ფიდემ დღესვე გრან პრის სამი რაუნდის შემდეგ სატურნირო მდგომარეობა გამოაქვეყნა: 1. ალექსანდრა გორიაჩკინა (რუსეთი) – 398 (3 ტურნირის ჯამში), 2. ჰამპი კონერუ (ინდოეთი) - 293 ქულა (2), 3. ალექსანდრა კოსტენიუკი (რუსეთი) – 193 (3), 4. ნანა ძაგნიძე (საქართველო) - 180 (2), 5. კატერინა ლაგო (რუსეთი) - 180 (2), 6. ჰარიკა დრონავალი (ინდოეთი) - 180 (3), 7. ანა მუზიჩუკი (უკრაინა) - 165 (2), 8. ცზიუი ვენძიუნი (ჩინეთი) – 155 (2), 9. ალინა კაშლინსკაია (რუსეთი) - 130 (2), 10. მარია მუზიჩუკი - 120 (2), 11. ჟანსაია აბდუმალიკი (ყაზახეთი) – 110 (1), 12. პია კრამლინგი - 105 (3), 13. ელიზაბედ პეტცი (გერმანია) - 95 (2), 14. ვალენტინა გუნინა (რუსეთი) - 85 (2), 15. ანტოანეტა სტეფანოვა - 85 (2), 16. მარი სებაგი - 40 (2). 17. ჩჟაო სიუე - 35 (1). 

გრან პრის 2019-2020 წლების გათამაშებაში მსოფლიოს 17 საუკეთესო დიდოსტატი მონაწილეობს. თითოეული მათგანი ოთხიდან სამ რაუნდში იასპარეზებს და ამ ტურნირებში მოპოვებული ქულების ჯამით გამოვლინდება ორი უძლიერესი, რომლებიც 2021 წლის პრეტენდენტთა ტურნირის საგზურებს მოიპოვებენ. ზოგმა შეჯიბრება უკვე დაასრულა, მათ შორის - ალექსანდრა გორიაჩკინამ, რომელიც სამი ასპარეზობის შედეგების ჯამით პირველ ადგილზეა და პრეტენდენტთა ტურნირში მონაწილეობა, ფაქტობრივად, გაინაღდა, რადგან ბოლო მე-4 ეტაპის შემდეგ მისთვის გასწრება მხოლოდ ჰამპი კონერუს შეუძლია, რომელსაც ორი ტურნირის შემდეგ 293 ქულა აქვს.

ასპარეზობის მონაწილეთაგან პრეტენდენტთა ტურნირის მე-2 საგზურისთვის ბრძოლის შანსი კონერუსთან ერთად ნანა ძაგნიძესა და კატერინა ლაგნოს შერჩათ. საამისოდ ბოლო ტურში, რომელსაც, კორონავირუსთან დაკავშირებით თუ რამე არ შეიცვალა, 2 მაისიდან სარდინია (იტალია) უმასპინძლებს, ერთ-ერთმა მათგანმა ინდოელზე 114 ქულით მეტი უნდა მოაგროვოს, რაც იოლი არ იქნება, რადგან აზიელს წარმატების მისაღწევად 48 ქულაც ჰყოფნის.

532
მკითხველის კომენტარები / 1 /
მანჩო
0
ნანა, გილოცავთ გამარჯვებას და გისურვებთ მსოფლიოს ჩემპიონობას!
მსგავსი ამბები
რუბრიკის სხვა სიახლეები
;