[ჭადრაკი] ძაგნიძე მონაკოში ითამაშებს

მოჭადრაკე ქალთა ფიდეს 2019-2020 წლების გრან პრი ოთხი ეტაპისგან შედგება. ერთი უკვე გაიმართა სექტემბერში - შეჯიბრებას რუსულმა სკოლკოვომ უმასპინძლა. მეორე რაუნდი დღეს გაიხსნება საზეიმოდ მონაკოში. მესამე და მეოთხე ეტაპები გაისად ჩატარდება ლოზანასა (შვეიცარია, 1  14 მარტი) და სარდინიაზე (იტალია, 2-15 მაისი).

გათამაშებაში მსოფლიოს 16 საუკეთესო დიდოსტატი მონაწილეობს. თითოეული მათგანი სამ ტურნირში მიიღებს მონაწილეობას და უძლიერესი იქ მოგროვებული ქულების ჯამით გამოვლინდება. საგულოისხმოა, რომ პირველ-მეორე ადგილებზე გასული მოჭადრაკეები 2021 წლის პრეტენდენტთა ტურნირში მონაწილეობის უფლებას მოიპოვებენ. 

მონაკოში 12 უძლიერესი მოჭადრაკე მოიყრის თავს. მათ შორის იქნება 2017 წლის ევროპის ჩემპიონი ნანა ძაგნიძე, რომელსაც სკოლკოვოში არ უთამაშია. ქართველ დიდოსტატს დაუპირისპირდებიან ტიტულოვანი მეტოქეები: მსოფლიოს და ევროპის ექსჩემპიონი ალექსანდრა კოსტენიუკი (რუსეთი), მსოფლიოს ექსჩემპიონი მარია მუზჩუკი (უკრაინა), ევროპის სამგზის ჩემპიონი ვალენტინა გუნინა (რუსეთი), ევროპის პირველობების ორ-ორგზის გამარჯვებულები - პია კრამლინგი (შვედეთი) და კატერინა ლაგნო (რუსეთი), ასევე, ელიზავეტ პეტცი (გერმანია), ანა მუზიჩუკი (უკრაინა), ჰამპი კონერუ, ჰარიკა დრონავალი (ორივე - ინდოეთი), ჩჟაო სიუე (ჩინეთი) და რუსი ალექსანდრა გორიაჩკინა, რომელმაც წლეულს აღდგენილი პრეტენდენტთა ტურნირი მოიგო და 2020 წლის 4-24 იანვარს ტიტულისთვის ამჟამინდელ მსოფლიოს ჩემპიონ ცზიუი ვენძიუნს შეხვდება. 12 პარტიისგან შემდგარი მატჩის პირველი ნახევარი შანხაიში, მეორე ნახევარი კი ვლადივოსტოკში გაიმართება.

მონაკოში გრან პრის ხვალინდელ პირველ ტურში მეტოქეები ასე დაწყვილდებიან: ჰარიკა დრონავალი - ნანა ძაგნიძე, ელიზაბეტ პეტცი - ჩჟაო სიუე, პია კრამლინგი - ალექსანდრა კოსტენიუკი, ალექსანდრა გორიაცკინა - კატერინა ლაგნო, ვალენტინა გუნინა - ჰამპი კონერუ, მარია მუზიჩუკი - ანა მუზიჩუკი.

322
მკითხველის კომენტარები / 0 /
მსგავსი ამბები
რუბრიკის სხვა სიახლეები
;