ჭადრაკი. ძაგნიძის სამედლო შანსი

ორიოდე დღეც და სლოვაკეთში დამთავრდება მოჭადრაკეთა ქალთა ევროპის მე-19 ინდივიდუალური ჩემპიონატი, რომელშიც 30 ქვეყნის 144 წარმომადგენელი მონაწილეობს, მათ შორის - შვიდი ქართველი დიდოსტატი.

გუშინ მე-9 ტურის შეხვედრები გაიმართა. კონტინენტის ორგზის ჩემპიონმა ვალენტინა გუნინამ (რუსეთი) თეთრი ფიგურებით კლაუდია კულონი (პოლონეთი) დაამარცხა და ტიტულის მესამედ დასაკუთრებისკენ კიდევ ერთი ნაბიჯი გადადგა.

მას კვალში ოთხი მოჭადრაკე მიჰყვება - მსოფლიოს და ევროპის ექსჩემპიონები - ანა უშენინა (უკრაინა) და ანტოანეტა სტეფანოვა (ბულგარეთი), ევროპის ექსჩემპიონი ეკატერინა ატალიკი (თურქეთი) და სწრაფ ჭადრაკში წლევანდელი კონტინენტის პირველობის გამარჯვებული ელიზაბეტ პეტცი (გერმანია), რომლებსაც 7-7 ქულა აქვთ.

მათი გუშინდელი პარტიები ასე დასრულდა: ანტოანეტა სტეფანოვა (ბულგარეთი)-ანა უშენინა (უკრაინა) 0.5:0.5, ლაურა უნუკი (სლოვენია)-ელიზაბეტ პეტცი (გერმანია) 0:1, ელინა დანიელიანი (სომხეთი)-ეკატერინა ატალიკი (თურქეთი) 0:1.

ევროპის 2017 წლის ჩემპიონმა ნანა ძაგნიძემ, რომელიც კარგა ხანს ლიდერობდა ტურნირზე, გუშინ შავი ფიგურებით ინა გაპონენკო (უკრაინა) დაამარცხა და 6.5 ქულას მოუყარა თავი, მაგრამ ჩემპიონატის დასრულებამდე ორი ტურით ადრე ჩვენებურს ეს მონაგარი ტიტულის შენარჩუნების უიმედო თეორიულ შანსღა უტოვებს, სხვა სინჯის მედლისთვის კი ბრძოლა შეიძლება, თუმცა ეს მეტოქეთა შეხვედრების შედეგებზეცაა დამოკიდებული.

5.5-ქულიანთაგან გუშინ, ძაგნიძის გარდა, გამარჯვება იზეიმეს ალექსანდრა გორიაჩკინამ (რუსეთი) და იულია ოსმაკმა (უკრაინა), რომლებმაც, შესაბამისად, იულია შვაიგერი (ისრაელი) და მარინა ნეჩაევა (რუსეთი) დაამარცხეს.

ქართველთაგან წარმატებას მიაღწია მერი არაბიძემ - ჩვენებურმა იოანა რაპორტს (სერბეთი) აჯობა. დანარჩენი შეხვედრები ასე დასრულდა: პოლინა შუვალოვა (რუსეთი)-ლელა ჯავახიშვილი 0.5:0.5, ზოია შლეინინგი (გერმანია)-ნინო ბაციაშვილი 0.5:0.5, ოლგა ბადელკა (ბელარუსი)-ბელა ხოტენაშვილი 1:0, ლილით მკრტიჩიანი (სომხეთი)-მირანდა მიქაძე 1:0.

ცხრა ტურის შემდეგ: ჯავახიშვილი, არაბიძე-6-6, ბაციაშვილი-5.5, ხოტენაშვილი-5, მელია, მიქაძე-4.5-4.5 ქულა.

დღეს მე-10 ტურში ითამაშებენ: ელიზაბეტ პეტცი-ვალენტინა გუნინა, ეკატერინა ატალიკი-ანტოანეტა სტეფანოვა, ანა უშენინა-იულია ოსმაკი, კლაუდია კულონი-ალექსანდრა გორიაჩკინა, ნანა ძაგნიძე-ოლგა გირია, მარია მუზიჩუკი-მერი არაბიძე, ლელა ჯავახიშვილი-ოლგა ბადელკა, ნინო ბაციაშვილი-ინა გაპონენკო, ბელა ხოტენაშვილი-ფილიზ ოსმანოჯა, ელენა სედინა-სალომე მელია, მირანდა მიქაძე-ანასტასია სავინა (რუსეთი).

ყოველდღიური სპორტული გაზეთი "ლელო"
1167
მკითხველის კომენტარები / 0 /
მსგავსი ამბები
რუბრიკის სხვა სიახლეები
;