[ჭიდაობა. ანალიზი] არაბულის მეორე ევროპული მედალი...

საქართველოს ნაკრებმა რომში მიმდინარე ბერძნულ-რომაულ სტილში მოჭიდავეთა ევროპის ჩემპიონატზე გუშინ ორი მედალი კი მოიპოვა, მაგრამ, სამწუხაროდ, ოქროს გარეშე დავრჩით. ჩვენი გუნდის მონაგარი თითო ვერცხლი და ბრინჯაოა. კონტინენტის ვიცე-ჩემპიონი მცხეთელი მძიმეწონოსანი ლევან არაბული გახდა, ხოლო მესამეზე ხობელი ნუგზარ წურწუმია (55) გავიდა. საინტერესოა, რომ გუშინ საღამოს ორივე მათგანს გადამწყვეტ შეხვედრაში რუმინელი მეტოქეები ჰყავდათ.

თუმცა ჩვენს ნაკრებს საერთო მონაგარის გაზრდის შანსი ნამდვილად აქვს: გუშინვე გაიმართა წინასწარი ეტაპის შეხვედრები დარჩენილ ხუთ წონაში და ჩვენი ორი ფალავანი ისევ აგრძელებს ბრძოლას მედლისთვის: ოზურგეთელი იური ლომაძე (72) ფინალშია, ხოლო ბათუმელი ამირან შავაძე (60) დამამშვიდებლის ფინალშია და დღეს საღამოს ბრინჯაოს მედლის მოპოვებას შეეცდება.

სამწუხაროდ, ლევან არაბულმა ვერ შეძლო ფინალში საჭიდაოდ მობილიზება და გუშინ რუმინელი ალინ ალექსუს კორარიუს წინააღმდეგ სულ სხვა ფალავანი იდგა, ვიდრე გუშინწინ ვიხილეთ წინასწარი ეტაპის შეხვედრებში, როცა სამივე მეტოქეს ერთნაირი ანგარიშით, 9:0 მოუგო და ფინალში შთამბეჭდავი სტატისტიკით - 27:0 გავიდა. მაშინ თუ ჩოქბჯენიდან კენჭებივით ატრიალებდა ამხელა მეტოქეებს, გუშინ ვერც ამ კომპონენტში ივარგა და პირველ პერიოდში, როცა პასიურობისთვის მეტოქე გაუფრთხილეს და დაბლა დააყენებინა, ვერ დაატრიალა.

არაბული ტაქტიკურადაც შეცდა, თუმცა ვერც ფიზიკურად გამოიყურებოდა სათანადოდ და არც ილეთები გამოსდიოდა. როგორც გითხარით, პირველ პერიოდში რუმინელი პასიურობისთვის ქულით დასაჯეს, მაგრამ არაბულმა ჩოქბჯენიდან ვერ დაატრიალა და 1:0 დასჯერდა. ილეთების მცდელობით არც რუმინელი იკლავდა თავს და ჩვენებური შესვენებაზე ასეთი მინიმალური ანგარიშით წავიდა, მეორე პერიოდში კი მოხდა ის, რისიც, ალბათ, ყველას ძალიან გვეშინოდა - პასიურობისთვის უკვე არაბული დასაჯეს 1 ქულით და ანგარიშიც გათანაბრდა. არადა, იმ ეპიზოდში თუ ვინმე იყო ოდნავ აქტიური მაინც, ისევ ჩვენი ათლეტი!

ცაიტნოტში ჩავარდნილმა არაბულმა ვერაფრით შეძლო ვერც გააქტიურება, ვერც წრიდან გაყვანა, ჩამოქაჩვა ან დაქნევა, ვერც ილეთები გააკეთა. შეტევას კი ცდილობდა, მაგრამ ერთ მომენტში რუმინელმა მოძრაობაზე დაიჭირა, დაბლაც ჩაიყვანა და დაატრიალა: 1:5. ჩვენებმა ეს ეპიზოდი გააპროტესტეს, მაგრამ მსაჯებმა გადაწყვეტილება არ შეცვალეს და მეტოქეს კიდევ ერთი ქულა დაუმატეს. შეხვედრაც ასე დასრულდა - 6:1 რუმინელის სასარგებლოდ. არაბულისთვის მეორე ევროპული მედალია - აქამდე მის ყულაბაში ევროპული ბრინჯაო იყო, ახლა კი შედეგი გააუმჯობესა.

სამაგიეროდ, მანამდე წურწუმიამ გაგვახარა კარგი ჭიდაობით და მოგებით. დამამშვიდებლის ფინალში მისი მეტოქე ასევე რუმინელი ფლორინ ტიტა იყო - ფალავანი, ვისაც შარშანაც მოუგო ევროპის ჩემპიონატზე, ოღონდ - 23-წლიანებში და ისიც ფინალში. ხობელმა ფალავანმა ტრადიცია არც ამჯერად დაარღვია და ტიტას ისევ იოლად მოუგო - 8:0. თავიდან მან ორჯერ გაიყვანა რუმინელი წრიდან და პირველი ორი ქულა ასე მოიპოვა, მერე ჩოქბჯენიდანაც კარგად აქაჩა და მაღალი ტრაექტორიით გადააგდო, ბოლოს კი კიდევ ჩაიყვანა დაბლა და საბოლოო ანგარიში დააფიქსირა.

ლომაძის რომაული შედევრები

გუშინდელი ხუთეულიდან ნახევარფინალში ორი ჩვენებური გავიდა - ლომაძე და შავაძე, ეს ბარიერი კი მხოლოდ ოზურგეთელმა ფალავანმა დასძლია.

ლომაძე ისეთივე ძლევამოსილი ჭიდაობით გავიდა ფინალში, როგორც სჩვევია. თან ძლიერ მეტოქეებსაც მოუგო - პირველივე წრეში სერბთა ოლიმპიური და მსოფლიოს ჩემპიონი დავორ სტეფანეკი დაამარცხა, მეოთხედფინალში ხორვატთა ევროპის ბრინჯაოს პრიზიორ დომინიკ ეტლინგერს აჯობა, თუმცა სუსტი მეტოქე არც თურქი სელჩუკ ჩანი იყო ნახევარფინალში. მეტოქეთა სიძლიერის მიუხედავად, ლომაძემ რომაულ ტატამზე ილეთების კორიანტელი დაატრიალა და არათუ 4-ქულიანები, 5-ქულიანი ფანდებიც კი გააკეთა.

ანგარიშიდან გამომდინარე, ოზურგეთელ ფალავანს თითქოს სტეფანეკთან შედარებით გაუჭირდა, თუმცა შეხვედრა  სრულიად საწინააღმდეგოდ წარიმართა. ლომაძემ უკვე 23 წამზე (!) კისრულით 4-ქულიანზე გადმოიღო სერბი, თუმცა მერეც უტევდა და მოსვენებას არ აძლევდა მას. მართალია, ქულების მოპოვება სერბმაც მოახერხა, მაგრამ ლომაძე გამუდმებით წინ იყო.

მომდევნო პაექრობა ლომაძემ ბელარუს იური კანკოუს წმინდად, 11:0 მოუგო, ამის გასაკეთებლად კი 2 წუთიც არ დასჭირვებია. მან თავიდანვე აქტიურად შეუტია მეტოქეს, რომელიც პასიურობისთვის გააფრთხილეს და ქულა ჩვენებურს მისცეს. ლომაძემ კანკოუ დაბლა ჩააყენებინა, იქ კი მიადგა და  ჯერ ორქულიანზე დაატრიალა, მერე კი ხალიჩიდან აქაჩა და დგომიდან 4-ქულიანზე გადააგდო. ამას მალევე კიდევ ერთი 4-ქულიანი გდება მიაყოლა და 11:0 მოიგო.

ლომაძემ ხორვატთანაც აქტიურობისთვის მიიღო პირველი ქულა, ჩოქბჯენიდან კი ორჯერ აქაჩა და ისევ დგომიდან გადააგდო - პირველად 5-ქულიანზე, მეორედ - 4-იანზე. ქართველმა ნახევარფინალშიც იოლად იმარჯვა თურქთან - 7:0.

ლომაძეს ფინალშიც საკმაოდ ძლიერი მეტოქე ეყოლება - გერმანელთა მსოფლიოს სამგზის და ევროპის ჩემპიონი ფრენკ სტაბლერი.

ნახევარფინალამდე შავაძეს წმინდა მოგებებით მივიდა, თუმცა იქამდე მხოლოდ ორი პაექრობა ჩაატარა და ორივე ერთნაირი ანგარიშით, 8:0 მოიგო: საკვალიფიკაციო წრეში შვეიცარიელ დიმიტარ სანდოვს აჯობა, მერე კი ფინელი იუუსო ალექსი ლატვალა დაამარცხა. შვეიცარიელს სწრაფი, ენერგიული და შემტევი ჭიდაობით შვეიცარიელი იოლად ჩაჰყავდა ჩოქბჯენში, იქ კი უპრობლემოდ ატრიალებდა. ფინელთან კი ულამაზესი შეხვედრა ჩაატარა და მოსაგებად ერთი წუთიც არ დასჭირდა: კისრულით გადმოიღო და მერე ჩოქბჯენში მანამ ატრიალა წინ და უკან, ვიდრე წმინდა მოგება არ დააფიქსირა. სამწუხაროდ, ნახევარფინალში თურქ კარემ კამალთან ვერაფერს გახდა და 0:9 დამარცხდა. ბრინჯაოსთვის პაექრობაში მისი მეტოქე უკრაინელი ჟორა აბოვიანისა და რუსი ჟამბოლატ ლოკიაევის შეხვედრაში გამარჯვებული იქნება.

დებიუტანტმა გიორგი შოთაძემ (67) ერთი შეხვედრა - გერმანელ ვიტალის ლაზოვსკის 3:2 მოუგო, მერე კი სომეხ ევროპის პრიზიორ კარენ ასლანიანთან 0:9 დამარცხდა.

ასევე ერთი შეხვედრა მოიგო მსოფლიოს ბრინჯაოს მედალოსანმა რევაზ ნადარეიშვილმაც (98) - ლიეტუველ ვილიუს ლაურინაიტისს 3:2 აჯობა, მაგრამ ფინელ მატი ელიას კუოსმანენთან 0:3 დამარცხდა და საბოლოოდ გამოვარდა კიდეც.

სამწუხაროდ, მსოფლიოს მოქმედი ჩემპიონი ლაშა გობაძე (82) საკვალიფიკაციო ეტაპზევე 0:4 დამარცხდა ბელარუს სტანისლაუ შაფარენკასთან. 

55 კგ.

  1. ედმუნდ არმენ ნაზარიანი (სომხეთი); 2. ვიტალი კაბალოევი (რუსეთი); 3. ნუგზარ წურწუმია (საქართველო), ელდანიზ აზიზლი (აზერბაიჯანი).

63 კგ.

  1. მაქსიმ ნეჰოდა (ბელარუსი); 2. ჩინგიზ ლაბაზანოვი (რუსეთი); 3. ერიკ ტორბა (უნგრეთი), ლენურ ტემიროვი (უკრაინა).

77 კგ.

  1. სანან სულეიმანოვი (აზერბაიჯანი); 2. ზოლტან ლევაი (უნგრეთი); 3. ალექს მიჰაელ ბურბერგ კესიდისი (შვედეთი), კარაპეტ ჩალიანი (სომხეთი).

87 კგ.

  1. სემენ ნოვიკოვი (უკრაინა); 2. ვიქტორ ლორინცი (უნგრეთი); 3. ალექსანდრ კომაროვი (რუსეთი), ისლამ აბასოვი (აზერბაიჯანი).

130 კგ.

  1. ალინ ალექსუს კურარიუ (რუმინეთი); 2. ლევან არაბული (საქართველო); 3. მიკოლა კუჩმი (უკრაინა), ჯელო კრამერი (გერმანია).
1195
მკითხველის კომენტარები / 1 /
გრამატიკა
0
მედალის არ იწერება, არამედ მედლის.
მსგავსი ამბები
რუბრიკის სხვა სიახლეები
;