[ჭიდაობა] ბერძენ-რომაელთა 4 წაგებული ფინალი!

ოქროს გარეშე და უჩვეულოდ უიღბლოდ დაასრულა საქართველოს ბერძნულ-რომაულად მოჭიდავე 23-წლამდელთა ნაკრებმა ბუდაპეშტში გუშინ დასრულებულ თანატოლთა მსოფლიოს ჩემპიონატი: გუნდს 10 წონიდან 4-ის ფინალში ჰყავდა მონაწილე, მაგრამ ყველა ფინალური პაექრობა დათმო და ოქროს გარეშე დარჩა! ისე კი ნაკრებმა 5 მედალი მოიპოვა - 4 ვერცხლი და 1 ბრინჯაო ანუ გუნდის ნახევარი ავიდა კვარცხლბეკზე. ამას ისიც ემატება, რომ უმედლოდ დარჩა ნაკრების ყველაზე ტიტულოვანი წევრი, უფროსებში მსოფლიოს მოქმედი ჩემპიონი, ხობელი ნუგზარ წურწუმია (55).

მსოფლიოს ვიცე-ჩემპიონები ოზურგეთელი ლევან ქავჟარაძე (63), სამტრედიელი გიორგი მელია (97) და ქუთაისელები - გურამ ხეცურიანი (87) და ზვიად პატარიძე (130) გახდნენ, ხოლო გარდაბნელი აივენგო რიკაძე (82) მესამეზე გავიდა. სოსო ჯაბიძის შეგირდთაგან ბრინჯაოსთვის იჭიდავეს ხელვაჩაურელმა რამაზ ზოიძემ (72) და გარდაბნელმა ბექა მამუკაშვილმაც (77), მაგრამ საბოლოოდ უმედლოდ დარჩნენ, მეხუთე ადგილით დაკმაყოფილდნენ. გუნდურ ჩათვლაში ჩვენი ნაკრები 109 ქულით მეოთხეზე გავიდა რუსეთის (145), ირანისა (139) და აზერბაიჯანის (111) შემდეგ.

ქავჟარაძე 6:7 დამარცხდა ირანელ მუსამ კარამალი დალკანისთან, ხეცურიანმა 1:6 წააგო უკრაინელ სემენ ნოვიკოვთან, მელიამ 3:5 დათმო ფინელ არვი მარტინ სავოლაინენთან, ხოლო პატარიძემ ხელის ტრავმის გამო არ იჭიდავა ირანელ ალიაკბარ ჰოსეინ იუსოფიანმადჩალისთან.

ამ კვარტეტიდან მსოფლიოს ჩემპიონობასთან ყველაზე ახლოს ქავჟარაძე იყო, ვინც, თამამად შეიძლება ითქვას, თავად წააგო ირანელთან დაპირისპირება. ხეცურიანმა პირველ წრეში რუსი ვააგ მარგარიანი დაამარცხა და კბილებით გამოგლიჯა გამარჯვება ხელიდან: 2:2-ზე მოუგო, რადგან ორქულიანი გდება ჰქონდა. სამწუხაროდ, ხეცურიანი ფინალში უკრაინელთან ვერაფერს გახდა.

მელიამ შოკისმომგვრელად დაიწყო სავოლაინენთან პაექრობა - დაახლოებით მეათე წამზე თვითონ გადავარდა უკან 4-ქულიანზე. 

რიკაძე ნახევარფინალში რუსთა მომავალ ჩემპიონ მილად ალირზაევთან დამარცხდა, გუშინ კი ძალიან კარგად ჩაატარა ბრინჯაოსთვის პაექრობა უნგრელ ტამაშ ლევაისთან. გადამწყვეტი ის ეპიზოდი აღმოჩნდა, როცა მეტოქე ჩოქბჯენიდან აიტაცა და ბრუნით კარგად გადააგდო ორქულიანზე, რასაც ორჯერ თითო ქულაც დაუმატა და საბოლოოდ 4:2 მოუგო.

ზოიძე მეოთხედფინალში ირანელთა მომავალ ჩემპიონ მოჰამედრეზა აბდოლაჰ გერაისთან დამარცხდა. სანუგეშოში რუს მაგომედ იარბილოვს 6:1 მოუგო, მაგრამ ბრინჯაოსთვის პაექრობა 3:4 დათმო უკრაინელ მაქსიმ ევტუშენკოსთან.

მომავალ ჩემპიონთან, რუს ისლამ ოპიევთან დამარცხდა  პირველივე წრეში  მამუკაშვილი. სანუგეშოში მან თურქმენ ჯეიჰუნ ოვეზდურდიევს 2:1 მოუგო, მაგრამ ბრინჯაოსთვის შეხვედრა წმინდად, 0:9 დათმო ყაზახ ტამერლან შადუკაევთან.

პირველივე წრეში წააგო წურწუმიამაც - აზერბაიჯანელ ზაურ ალიევთან: 4:6. პირველივე ეტაპიდან გამოვარდა ევროპის მესამე პრიზიორი დავით ჩხარტიშვილიც (60) - რუმინელ რაზვან არნაუტთან 6:9 დათმო. გიორგი კურტანიძემ (67) საკვალიფიკაციოში ამერიკელ პეიტონ ლუის ომანიას წმინდად, 8:0 კი მოუგო, თუმცა მეორე პაექრობა ყირგიზ ხალმურატ იბრაგიმოვთან 2:4 დათმო. არც ერთ მათგანს სანუგეშო წრეში გადასვლის საშუალება არ მისცემია.

351
მკითხველის კომენტარები / 0 /
მსგავსი ამბები
რუბრიკის სხვა სიახლეები
;