ჭიდაობა. ბუნდესლიგა. ბექა ლომთაძის კლუბი გერმანული ბუნდესლიგის ფინალშია

ბექა ლომთაძის (61კგ.) კლუბი "ბურგჰაუზენი" გერმანული ბუნდესლიგის ფინალშია, თუმცა ნახევარფინალურ პაექრობაში ჩვენებურს მონაწილეობა არ მიუღია.

საერთოდაც, ბოლო პერიოდში ბუნდესლიგაში ქართველები იშვიათად ჭიდაობენ, რადგან სანაკრებო მზადებით არიან დაკავებულნი.

ფინალში "ბურგჰაუზენი" "კოლერბახს" შეხვდება. საინტერესოა, რომ პირველი ნახევარფინალური შეხვედრა ორივემ წააგო და მხოლოდ განმეორებითში მიაღწიეს საბოლოო წარმატებას ორი შეხვედრის ჯამში.

თან, "ბურგჰაუზენმა" სტუმრად დაამარცხა "მაინცი-1888": 18:11, პირველი შეხვედრა კი შინ უფრო ნაკლები, 4-ქულიანი სხვაობით ჰქონდა წაგებული: 10:14.

მართალია, ბურგჰაუზენელთა რიგებში არ ჭიდაობდა თავისუფალ ჭიდაობაში ევროპის ფინალისტი ლომთაძე, მაგრამ ამ შეხვედრას ქართველების გარეშე მაინც არ ჩაუვლია:

ხანგრძლივი პაუზის შემდეგ მაინცელთა რიგებში ისევ გამოჩნდა მათი მოჭიდავე-მწვრთნელი დავით ბიჩინაშვილი, ვინც ჯერ უკრაინის მოქალაქე იყო, უკვე კარგა ხანია კი გერმანიის სახელით გამოდის. მაინცელთა რიგებში არ გამოსულა მეორე ქართველი - ბექა ბუჯიაშვილი (57).

თუმცა ქართველთა არყოფნით მაინცელებს არაფერი დაუკარგავთ, აი, ბურგჰაუზენელებმა კი იზარალეს: ბუჯიაშვილის შემცვლელმა თურქმა ელდანიზ აზიზლიმ უმოწყალოდ აოტა ბურგჰაუზენელთა პოლონელი მარიუს ლოსი 16:0, ხოლო ლომთაძის ნაცვლად მოჭიდავე რუსი ვლადიმერ ეგოროვი მოულოდნელად 2:5 დამარცხდა თურქ სულეიმან ატლისთან.

მოულოდნელად, რადგან აქამდე ურიგოდ არც ეგოროვი ჭიდაობდა და ჩვენებურივით ისიც ლამის უდანაკარგოდ ჭიდაობდა. ამას ისიც დაემატა, რომ წააგო ბურგჰაუზენელთა მესამე მოჭიდავემაც - გერმანელი ანდრეას მაიერი 0:1 დამარცხდა უნგრელ ილირ საფაისთან და "ბურგჰაუზენი" 0:3 ჩამორჩა.

სამაგიეროდ, დარჩენილ შეხვედრებში იყოჩაღეს მისმა წევრებმა და გაიმარჯვეს პოლონელთა ნატურალიზებულმა დაღესტანელმა მაგომედმურად გაჯიევმა, რუსთა ქართული წარმოშობის ოსმა კახაბერ ხუბეჟტიმ (ამან ბიჩინაშვილს მოუგო), მასპინძელებმა - ბენჯამინ სეზგინმა, ერიკ ტილემ და პოლონელმა ეუგენ პონომარჩუკმა.

ლამის მთლიანად უნგრელებით დაკომპლექტებულ "კოლერბახს" პირველი შეხვედრა სტუმრად 11:20 ჰქონდა წაგებული "ადელჰაუზენთან", შინ კი განმეორებითში 17:7 იმარჯვა.

ბუნდესლიგის პირველი ფინალური შეხვედრა ბურგჰაუზენში 20 იანვარს გაიმართება, განმეორებითს კი ზუსტად ერთ კვირაში "კოლერბახი" უმასპინძლებს.

1024
მკითხველის კომენტარები / 0 /
მსგავსი ამბები
რუბრიკის სხვა სიახლეები
;