ჭიდაობა. ბუნდესლიგა: მხოლოდ ერთი დამარცხდა

შაბათს გერმანიაში საკლუბო საჭიდაო ჩემპიონატის მორიგი ტური გაიმართა, რომელიც წინამორბედებივით მთლად უდანაკარგო ვერ გამოდგა გერმანიის ქართველი ლეგიონერებისთვის - მხოლოდ ერთი ჩვენებური დამარცხდა, სხვებმა კი კვლავ ისახელეს თავი. უმეტესობამ - კლუბებთან ერთად.

უკვე მერამდენე უქმეებია, სისტემატურად ვაშუქებთ მსოფლიოში ამ ერთ-ერთ ყველაზე პრესტიჟულ საჭიდაო ლიგას და ტონი თითქმის მუდამ ერთნაირია - უმეტესად ჩვენს მოჭიდავეთა გამარჯვებებზე ვწერთ, რადგან ქართველები იქ იშვიათად აგებენ.

არადა, ვერ ვიტყვით, რომ სუსტი საკლუბო პირველობა აქვთ. პირიქით - როგორც გითხარით, გერმანია მსოფლიოს საკლუბო ჭიდაობაში ერთ-ერთი მოწინავეა იმის მიუხედავად, რომ სანაკრებო დონეზე უმთავრეს ფავორიტთა შორის ვერ არიან.

მართალია, ყოველ ოლიმპიურ ციკლში ჰყავთ თითო-ოროლა წარმატებული სპორტსმენი თვით ოლიმპიური ან მსოფლიოს ჩემპიონის ჩათვლით (აბა, მედალოსნებსა და ევროპის ჩემპიონებზე არაფერს ვამბობთ), მაგრამ ნაკრები არცთუ ძლიერი ჰყავთ, აი, საკლუბო პირველობა კი ქვეყანაში ფრიად პოპულარულია და შეჯიბრებები მუდამ დიდი ანშლაგით ტარდება, დიდი ზეიმის თანხლებით, ხოლო წარმატებული ფალავნები ფრიად პოპულარულები ხდებიან... საბედნიეროდ, მათ შორის ქართველებიც არიან.

შაბათს სამხრეთ-დასავლეთის ბუნდესლიგაში ტური კი გაიმართა, მაგრამ არ უჭიდავია ამ ლიგის ლიდერს, თავისუფალ ჭიდაობაში ევროპის ორგზის ფინალისტ ბექა ლომთაძის (61) "ბურგჰაუზენს", თუმცა ლიდერობას მაინც ინარჩუნებს. ისინი მორიგ შეხვედრას 11-ში ჩაატარებენ და შინ მიიღებენ "ლიუბტეენს", თუმცა საკითხავია, დაეხმარებათ თუ ვერა ლომთაძე, რადგან იმ დროისთვის ჩვენს ნაკრებს უკვე შეკრება ექნება დაწყებული.

აღმოსავლეთ ბუნდესლიგაში "აახენ-ვალჰაიმმა" გასვლაზე 11:9 დაამარცხა მასპინძელი "ვიტენი", ამ წარმატებაში კი თავისი წვლილი შეიტანა ჯერჯერობით დაუმარცხებლად მოასპარეზე მძიმეწონოსანმა ზვიად მეტრეველმა. მან არც ამჯერად უღალატა ტრადიციას და შედარებით მცირე ანგარიშით გაიმარჯვა: 2:1 სძლია ლატვიელ იმანტას ლაგოდსკისს.

ამავე ლიგაში წყვილად იმარჯვა "მერკენმაც" და მისმა ქართველმა ლეგიონერმა ზურაბ მაჭარაშვილმაც (57). კლუბმა შინ "ჰაუსვაილერს" 17-10 აჯობა და ოდნავ გამოიკეთა სატურნირო მდგომარეობა, მაჭარაშვილმა დიდი ანგარიშით და დამაჯერებელი უპირატესობით, 16:0 მოუგო გერმანელ ფაბიან ვიდმანს.

მოგეხსენებათ, "ჰაუსვაილერის" რიგებში საბერძნეთში გადასული მიხეილ ჩიქოვანი გამოდის, ვინც ამჯერადაც მძიმე წონაში იჭიდავა და პირადი შეხვედრაც მოიგო - 9:4 ასევე გერმანელ ანდრეას ენსთან, მაგრამ კლუბი მარცხისგან ვერ იხსნა. ამ ტურში მოიგო "კოლერბახმაც", რის გამოც ცხრილში არაფერი შეცვლილა: ის ისევ პირველია, აახენელები კი მას კვლავ კვალში უდგანან. "მერკენი" მეხუთე ადგილზეა.

სამხრეთ-აღმოსავლეთის ლიგაში "ფრაიბურგიც" დამარცხდა და - ამირან შავაძეც (66). ჩვენებურმა ცნობილ ბულგარელთან, ევროპისა და მსოფლიოს ჩემპიონთან, ევროპის წლევანდელ ფინალისტ ივო ანგელოვთან წააგო - 0:16, კლუბმა კი შინ ვერ დაამარცხა "ადელჰაუზენი": 8:22.

ფრაიბურგელთა შემადგენლობაში იჭიდავა იტალიაში გადასულმა გივი დავიდოვმა (57) და გერმანელ ნიკ შერერს 13:0 აჯობა, მაგრამ უცნაური ისაა, რომ ბოლო ორი ტურია, მწვრთნელები თავისუფალი სტილის მოჭიდავეს ბერძნულ-რომაულის წონაში აყენებენ (აქვე განვმარტავთ, რომ ბუნდესლიგის წესებით, კლუბებში ორივე საჭიდაო სტილი შერეულია და დაყოფილია წონების მიხედვით: 57, 66, 80 და 98 ბერძნულ-რომაულის წონებია, 61, 71, 86 და 130 - "თავისუფალის", თუმცა კიდევ ერთი უცნაურობა ისაა, რომ, შეიძლება, სხვადასხვა ლიგებში ეს დაყოფა პირიქით იყოს. რაც შეეხება 75 კილოგრამს, ის ორივე სტილს ეკუთვნის).

ერთ კვირაში "ფრაიბურგ-2000" რევანშის აღებას შეეცდება "ადელჰაუზენთან", რომელსაც უკვე თავად უმასპინძლებს, მანამ კი ცხრილში ბოლოსწინა, მეექვსე ადგილამდე დაქვეითდა.

რეგიონალლიგაში ტური პარასკევს ჩატარდა და ჩვენებისთვის ფრიად წარმატებითაც: კლუბმაც მოიგო და ორივე ქართველმაც იმარჯვა. "გერმანიან სულგენმა" მძიმე ბრძოლაში, მაგრამ შინ, მაინც მოუგო "ტენენბრონს" - 14:13. ნიკა ტატუაშვილმა (57) 17:2 მოუგო მასპინძელ მატიას შონდელმაიერს, ხოლო ნოდარ ეგაძემ, ვინც მძიმე წონიდან ისევ თავის 98-ში დააბრუნეს, ბულგარელ მიროსლავ გეშევს 5:0 აჯობა. ახლა "სულგენი" ცხრილში მესამეა, მომდევნო შეხვედრას კი ხვალ შინ "აიხალდენთან" გამართავს.

ჰესენლიგაში გიორგი ბალიაშვილმაც (66) იმარჯვა - 4:0 კარლ ჰორნისთან, და მისმა კლუბმა "რიმბახმაც", ვინც სტუმრად მოუგო "გრიშაიმს": 20:18. თანაც, "რიმბახს" კაცი აკლდა - 86-ში არ ჰყავდა მონაწილე. კლუბი მომდევნო შეხვედრას ერთ კვირაში გამართავს და "ჰაიბახს" მიიღებს. დიდი ალბათობით, წარმატებასაც მიაღწევს და კიდევ უფრო განიმტკიცებს ლიდერობას, რადგან ახლაც პირველ ადგილზეა ცხრილში.

ყოველდღიური სპორტული გაზეთი "ლელო"
1299
მკითხველის კომენტარები / 0 /
მსგავსი ამბები
რუბრიკის სხვა სიახლეები