ჭიდაობა. ბუნდესლიგა: ქართველები უდანაკარგოდ გამოვიდნენ

შაბათს გერმანულ საჭიდაო ბუნდესლიგაში მორიგი ტური გაიმართა, რომელშიც ქართველები უდანაკარგოდ გამოვიდნენ.

აღმოსავლეთ ბუნდესლიგაში ორმაგი მიღწევით გამოირჩა ზურაბ მაჭარაშვილი (57) - პირადი შეხვედრაც მოიგო და მისმა კლუბმაც გაიმარჯვა. ჩვენებურმა 3:18 გაანადგურა კევინ მიულერი, მისმა "მერკენმა" კი გასვლაზე 16:12 დაამარცხა მასპინძელი "რიგელსბერგი".

ამავე ლიგაში პირად შეხვედრაში იმარჯვა მძიმე წონაში დაყენებულმა ზვიად მეტრეველმა - 10:0 გენადი ცუდინოვიჩთან, მაგრამ ამან მის "აახენ-ვალჰაიმს" გასვლაზე ვერ უშველა ფავორიტ "კოლერბახთან" და კლუბი 5:23 განადგურდა.

მოიგო საბერძნეთის სახელით მოჭიდავე მიხეილ ჩიქოვანმა, ვინც ამჯერად მძიმე წონაში დააყენეს - მურად ჰაჯიმურადოვს 6:0 სძლია, მაგრამ მისი "ჰეუსვაილერი" სტუმრად 9:14 დამარცხდა "ჰუტიგვაილერთან".

წაგების მიუხედავად, "აახენ-ვალჰაიმი" მაინც ინარჩუნებს მეორე ადგილს. "მერკენი" ცხრილში მეხუთეა, "ჰეუსვაილერი" კი მის მომდევნო საფეხურზეა.

მომდევნო ტურში, 28-ში "აახენ-ვალჰაიმი" ისევ გასვლაზე იჭიდავებს - "ჰეუსვაილერთან" და დიდი შანსია, მეტრეველი ჩიქოვანს შეხვდეს. "მერკენი" შინ მიიღებს "ჰუტიგვაილერს".
სამხრეთ-დასავლეთის ბუნდესლიგაში წარმატებით ჩაატარა პირადი შეხვედრა თავისუფალ ჭიდაობაში ევროპის ორგზის ფინალისტმა ბექა ლომთაძემ (61), ვინც ტომას კოპი 18:0 გააცამტვერა. ქართველ ლეგიონერს მისი კლუბი "ბურგჰაუზენი" ჩამორჩა და შინ "ჰალბერგმოოსი" 28:8 დაჯაბნა. 28-ში ბურგჰაუზენი" უკვე სტუმრად იჭიდავებს "ვესტენდორფთან", მანამდე კი დამაჯერებლად ლიდერობს სატურნირო ცხრილს.

სამხრეთ-აღმოსავლეთ ბუნდესლიგაში საკმაოდ მძიმე ბრძოლა მოიგო გასვლაზე "ნეკარგარტახმა" - 12:10 "ტრიბერგთან", რაშიც დიდი როლი მისმა ქართველებმა შეასრულეს: თავისუფალ ჭიდაობაში ევროპისა და მსოფლიოს ბრინჯაოს მედალოსანმა სანდრო ამინაშვილმა (86) ფრიად დაძაბულ პაექრობაში დაღესტანელი აჰმედ დუდაროვი დაამარცხა: 4:3, ხოლო ესპანეთის სახელით მოჭიდავე ლევან მეტრეველმა 6:1 სძლია ვლადისლავ ვაგნერს. 

შინ "მაინცთან" 5:22 წააგო ამირან შავაძის "ფრაიბურგმა". სამაგიეროდ, იმარჯვა ჩვენებურმა: ილირ საფაის 4:0 მოუგო.ერთი კვირის თავზე მომდევნო ტურში მხოლოდ "ფრაიბურგი" იჭიდავებს გასვლაზე "ნეკანჰაიმთან", "ნეკარგარტახი" კი ისვენებს. ის ჯერჯერობით მეორეა, "ფრაიბურგი" კი - მეექვსე.

რეგიონალლიგაში სტუმრად დამარცხდა ნოდარ ეგაძის (98) "სულგენი", თუმცა კი "ტაისერსდორფთან" გვარიანად იომა და მხოლოდ ერთი ქულით დამარცხდა: 13:14. ჩვენდა გასახარად, მოიგო ეგაძემ, ვინც ზედა წონაში დააყენეს. ამის მიუხედავად, მარკო მარტინი 12:4 დაამარცხა. მომდევნო პაექრობას "სულგენიც" ერთ კვირაში ჩაატარებს სტუმრად "ვაიტენაუ-ვისლეტთან", სატურნირო ცხრილში კი მესამეა.

ჰესენლიგაში წყვილად მოიგეს გიორგი ბალიაშვილმა (71) და სატურნირო ცხრილის სათავეში მყოფმა მისმა "რიმბახმა". ერთ დროს ტალანტად მიჩნეულმა და ახალგაზრდებში ევროპის ორგზის გამარჯვებულმა გორელმა ათლეტმა პირად შეხვედრაში 16:1 დაჯაბნა ჰამიდულაჰ ასადი, კლუბმა კი გასვლაზე 27:9 მოუგო "ელგერშაუსენს".

ერთ კვირაში "რიმბახი" უშუალო მდევარ "ვალდაშაფტს" მიიღებს, რაც პრინციპული დაპირისპირება იქნება. "რიმბახმა" უკვე ამ ტურში გამარჯვებით კიდევ უფრო განიმტკიცა ლიდერობა, ხოლო თუ ერთი კვირის თავზეც იმარჯვებს, მთლად უკეთესი.

ყოველდღიური სპორტული გაზეთი "ლელო"

481
მკითხველის კომენტარები / 0 /
მსგავსი ამბები
რუბრიკის სხვა სიახლეები