ჭიდაობა. ევროპის ერთა თასი: რუსეთში, კედელი კედელზე...

11-12 ნოემბერს მოსკოვში გაიმართება "ალროსას თასი - ევროპის ერთა თასი", სადაც საქართველოს ბერძნულ-რომაული სტილით მოჭიდავეთა ნაკრები გადახალისებული შემადგენლობით იასპარეზებს - ძირითადად სათადარიგოებით და იმ ფალავნებით, რომლებსაც მალე 23-წლიანთა ევროპის ჩემპიონატზე მოუწევთ გამოსვლა.

ლიდერები საქართველოს ჩემპიონატისთვის ემზადებიან და გუშინ შეკრებაც დაიწყეს ბორჯომში, თუმცა ჯერ არაა გადაწყვეტილი, როდის გაიმართება ქვეყნის პირველობა. საქმე ისაა, რომ გავრცელებული ხმებით, ისევ იცვლება წესები და სწორედ ამ საკითხის გადაწყვეტას ელოდებიან. წინასწარი მონაცემებით, თურმე, ჩოქბჯენის დაბრუნებასაც აპირებენ, მაგრამ, ვნახოთ, როგორ განვითარდება მოვლენები.

მოსკოვში ჩვენი თავისუფალი სტილით მოჭიდავეთა ნაკრებიც გამოვა, რომელიც ასევე გადახალისებული შემადგენლობით იქნება - იმათი ლიდერებიც საქართველოს ჩემპიონატისთვის ემზადებიან, მოსკოვში კი სხვები გამოიცდებიან. თუმცა ისეთებიც არიან, რომლებიც სატურნირო პრაქტიკისთვის მიჰყავთ.

მთავარ მწვრთნელ გიორგი იანტბელიძეს თავდაპირველად გამოცხადებული შემადგენლობის (რომელიც ჩვენც გაგაცანით) კორექტირება მოუხდა. ბერძენ-რომაელთაგან განსხვავებით, თავისუფალი სტილით მოჭიდავეებს საქართველოს ჩემპიონატის ვადები განსაზღვრული აქვთ - დეკემბრის ბოლო, ოღონდ შეიძლება ამ თარიღმაც რამდენიმე დღით გადაიწიოს.

ეს ტურნირი - "ევროპის ერთა თასი" - ტრადიციულია და ადრე სულ მოსკოვში ტარდებოდა. მერე ერთხელ რუმინეთშიც კი ჩაატარეს, თუმცა ისევ მოსკოვს დაუბრუნეს, ახლა კი მას ახალი სახელიც, რუსეთის ჭიდაობის ფედერაციის გენერალური სპონსორის, ალმასის ქარხნის სახელი - "ალროსას თასიც" დაემატა.

ესაა გუნდური შეჯიბრება, რომელიც "კედელი-კედელზე" პრინციპით იმართება. თავისუფალ ჭიდაობაში გამოვლენ რუსეთი, საქართველო, აზერბაიჯანი და მოლდოვა, ხოლო ბერძნულ-რომაულში - რუსეთი, საქართველო, უნგრეთი და ბელარუსი. შაბათს პირველი ორი წრის შეხვედრები გაიმართება, კვირას - მესამე წრისა და ფინალური პაექრობები.

წინასწარი მონაცემებით, სხვა გუნდებიც გადახალისებული შემადგენლობებით გამოვლენ, თუმცა ვარსკვლავებიც ბლომად იქნებიან. მაგალითად, აზერბაიჯანის შემადგენლობაში იქნებიან ოლიმპიური ჩემპიონი შარიფ შარიფოვი (97), ქართველი ორგზის ევროპის ჩემპიონი გიორგი ედიშერაშვილი (57), ევროპის პრიზიორი ალექსანდრ გოსტიევი (86) და მსოფლიოს ფინალისტი ჯამალედდინ მაგომედოვი (125).

უნგრეთიდან ჩადის ევროპის წლევანდელი ჩემპიონი ბალინ ლამი (71, თუმცა მოსკოვში 75-ში იქნება), ევროპის სამგზის გამარჯვებული, ოლიმპიური პრიზიორი ტამაშ ლორინცი (80), მსოფლიოს პრიზიორი ლასლო საბო (85) და სხვები.

ბუნებრივია, ძლიერი შემადგენლობით იქნებიან რუსებიც. მაგალითად, იქაურ ბერძენ-რომაელთა ქართველი თავკაცის - გოგი კოღუაშვილის განკარგულებაში ევროპის სხვადასხვა წლების ჩემპიონები, სტეფან მარინიანი (59), არტემ სურკოვი (66), ადამ კურაკი (71), ევგენი სალეევი (85), ვროპისა და მსოფლიოს ჩემპიონი ჩინგიზ ლაბაზანოვი (75), მსოფლიოს ჩემპიონი რამაზან აბაჩარაევი (80), ევროპის წლევანდელი პრიზიორი ადლან აკიევი (80) და მსოფლიოს წლევანდელი მედალოსანი მუსა ევლოევი (98) არიან.

ამათ გვერდით, ამბაკო ვაჩაძისა (66) და დავით ჩაკვეტაძის (85) შემდეგ რუსეთის ნაკრებში კიდევ ერთ ქართველს ექნება დებიუტი: მძიმე წონაში იჭიდავებს გურამ გედეხაური, მსოფლიოს ჩემპიონ ზურაბ გედეხაურის ვაჟი.

რუსეთის თავისუფალი სტილით მოჭიდავეთა ნაკრები მეორე შემადგენლობით გამოვა, ლიდერთაგან კი მხოლოდ ევროპული თამაშების გამარჯვებული ალექსანდრ ბოგომაევი (61) იასპარეზებს.

ბერძნულ-რომაული ნაკრები
59 კგ. ბექა ბალანჩივაძე
66 კგ. მურად მიქელაძე
71 კგ. იური ლომაძე
75 კგ. ბაკურ გოგოლი
80 კგ. თორნიკე ძამაშვილი
85 კგ. შალვა ხაჩიძე
98 კგ. მათე სოფაძე
130 კგ. ვასილ იმერლიშვილი

თავისუფალი სტილის ნაკრები
57 კგ. თეიმურაზ ვანიშვილი
61 კგ. ოთარ გოგავა
65 კგ. ედემი ბოლქვაძე
70 კგ. ლევან ქელეხსაშვილი
74 კგ. ტარზან მაისურაძე
86 კგ. დავით ხუციშვილი
97 კგ. ზურაბ ახობაძე
130 კგ. გიორგი მეშვილდიშვილი

ყოველდღიური სპორტული გაზეთი "ლელო"
1388
მკითხველის კომენტარები / 0 /
მსგავსი ამბები
რუბრიკის სხვა სიახლეები
;