[ჭიდაობა. ევროპის ჩემპიონატი. ანალიზი+VIDEO] როცა გუნდში პეტრიაშვილი გყავს...

ბერძენ-რომაელთა შემდეგ, რომში თავისუფალი სტილით მოჭიდავეებმაც დაამთავრეს ევროპის ჩემპიონატი, სადაც ჩვენმა ნაკრებმა 4 ჯილდო დაისაკუთრა: თითო ოქრო-ვერცხლი და 2 ბრინჯაო. ევროპის ჩემპიონი გორელი მძიმეწონოსანი გენო პეტრიაშვილი გახდა. ეს იყო დღისა და მთლიანად ევროპის ჩემპიონატის ბოლო შეხვედრა. შესაბამისად, კონტინენტის პირველობაც ქართული ჰიმნით დაიხურა. ვერცხლის მედალს  ქუთაისელი მსოფლიოს მოქმედი ჩემპიონი ბექა ლომთაძე (61) დასჯერდა, ხოლო მესამეზე ამბროლაურელი ავთანდილ კენჭაძე (74) და თბილისელი ელიზბარ ოდიკაძე (97) გავიდნენ. აღსანიშნავია, რომ ორივე ევროპის შარშანდელი ბრინჯაოს პრიზიორია. დამამშვიდებლის ფინალში ასევე გავიდნენ ევროპის კიდევ ერთი შარშანდელი მესამეადგილოსანი, თბილისელი ირაკლი მწითური (92) და ქუთაისელი დებიუტანტი მირზა სხულუხია (70), თუმცა დამარცხდნენ და მეხუთეზე დარჩნენ. თუმცა საერთო გუნდურ ჩათვლაში თურქეთს სწორედ ამ მეხუთე ადგილებით ვაჯობეთ - მათზე მეტი აღმოგვაჩნდა და 95 ქულით მესამეზე გავედით. პირველი რუსეთია 186 ქულით, მეორე კი აზერბაიჯანი - 116-ით.

პეტრიაშვილს ვერ აჩერებენ

პეტრიაშვილმა პირველ შეხვედრაში ძალიან იოლად, 55 წამში წმინდად, 10:0 დაამარცხა ესპანელი ხოსე ვასქეს კუბა. მას ნაცადი და მარტივი ილეთით მოუგო - ფეხიდან აყვანილი იოლად გადაიყვანა ჩოქბჯენში, იქ კი ზედიზედ ოთხჯერ ისე თავისუფლად დაატრიალა, ვგონებთ, პულსიც არ აჩქარებია. დიდი ძალისხმევა არც რუს ბალდან ციჟიპოვთან დადგომია,  ვინც ძირითადად ფეხიდან აყვანებით ჩამოიშორა გზიდან - ამ ხერხით წრიდანაც გაიყვანა და ორქულიანზეც გადააგდო, თუმცა დგომიდანაც გაუკეთა გდება. ისე კი იმ მომენტში პეტრიაშვილმაც მიუშვა რუსი ახლოს - თითქოს ისე წაეთამაშა, როგორც კატა ეთამაშება ხოლმე თაგვს, ციმბირელმა კი ფეხის ჩახვევაც გაუბედა და ბრუნზე გადაგდებაც, მაგრამ მწარედ ინანა: ქართველმა გდება დაუხურა და ჩოქბჯენში ხომ ჩააგდო, იქ კიდევ ორჯერ დაატრიალა და 9:0 დაწინაურდა. ბუნებრივია, გენოს არ გასჭირვებია, კიდევ ერთხელ აეყვანა ის ფეხიდან და ბოლო გდებაც წარმატებით შეესრულებინა: 11:0.

ერთადერთი, ვინც პეტრიაშვილს ფეხი ასე იოლად არ დაუთმო, უკრაინელი ალექსანდრ ხოციანოვსკი იყო ნახევარფინალში, თუმცა მისი აქტივი მხოლოდ ეს იყო - ინიციატივას ქართველი ფლობდა და უკრაინელს 30-წამიანი საჯარიმო ჩაურთეს. ბუნებრივია, პეტრიაშვილმა გდება არ დაანება და პირველი ქულაც მოიპოვა. ინიციატივა არც ამის შემდეგ დაუთმია და ძირითადად დაბლა ჭიდაობით 7:2 მოუგო. ამხელა კაცს სათამაშოსავით ატრიალებდა აქეთ-იქით, თუმცა ერთი-ორჯერ თვითონაც დადგა საფრთხის წინაშე, მაგრამ მალევე გაანეიტრალა.

ფინალში პეტრიაშვილს მეტოქედ პოლონელი რობერტ ბარანი ჰყავდა, თუმცა მასაც ძალიან იოლად აჯობა: 11:0, ამას კი 2.30 წუთიც არ მოანდომა. ის პირველივე წამიდან ეკვეთა ბარანს და ფეხში შევიდა, თუმცა მეტოქე წრიდან გაექცა და მხოლოდ 1 ქულას დასჯერდა. აქ ცოტა კომიკური ვითარებაც შეიქმნა, როგორ ექაჩებოდა პეტრიაშვილი მეტოქეს უკან, წრეში შემოსაყვანად, რათა იქ დაეტრიალებინა. გორელმა ათლეტმა კიდევ ორჯერ აიყვანა ფეხიდან ბარანი და დაბლა ჩააგდო, იქ კი სამჯერ დაატრიალა და წმინდა მოგება დააფიქსირა. სამგზის მსოფლიოს ჩემპიონი პეტრიაშვილი მეორედ გახდა ევროპის ჩემპიონი, მის კარიერას კი მხოლოდ ერთი, მაგრამ ყველაზე მთავარი ტიტული აკლია - ოლიმპიური ჩემპიონისა...

ლომთაძე სხვებთან ლომია...

ლომთაძემ ჩემპიონატი კვლავინდებურად მაღალ დონეზე, შემტევ სტილში და ლამაზ ბრძოლებში ჩაატარა. ამ მხრივ ერთადერთი გამონაკლისი ფინალური პაექრობა იყო რუსთა ბურიატ ალექსანდრ ბოგომოევთან. ცდა, შეტევები და სიმწვავე არც იქ დაუკლია, თუმცა ცოტა მეტი მართებდა და არც რუსმა დააყენებინა ილეთების ჩვეული კორიანტელი. სამწუხაროდ, მასთან ლომთაძემ ვერც ჩვეული ფეხში შესვლები განახორციელა, პასიურადაც მიიჩნიეს და 30-წამიანი საჯარიმო დრო ჩაურთეს. ამ დროში ქულა ვერ მოიპოვა და ბურიატი 1:0 დაწინაურდა. მეორე პერიოდში 30-წამიანი უკვე ბოგომაევს ჩაურთეს, მაგრამ ლომთაძემ ამით არათუ ვერ იხეირა, პირიქით, ამ დროს დაშვებული შეცდომა აღმოჩნდა გადამწყვეტი: მეტოქე ფეხში შეუშვა. ბოგომაევმაც ჰაერში ასწია და ისე დააგდო ძირს. გდება თითქოს 4-ქულიანს ჰგავდა, მაგრამ მსაჯებმა 2 ქულად შეაფასეს და რუსი 3:0 გაიჭრა წინ. დარჩენილ დროში ლომთაძემ ისღა მოახერხა, რომ ერთხელ კი გადაიყვანა ფეხიდან, მაგრამ მეტი ვეღარ შეძლო.

ლომთაძემ წინასწარი ეტაპის შეხვედრები ბევრად უფრო მაღალ დონეზე ჩაატარა და აი, იქ კი გვაჩვენა მრავალფეროვანი ილეთები. მან პირველი ორი შეხვედრა ერთნაირად - დიდი ანგარიშით და წმინდად მოიგო: რუმინელ ნიკოლაი ოკლოპკოვსაც და მოლდოველ ლეონიდ კოლესნიკსაც 10:0 მოუგო. მათთან თითქმის ყველაფერი გამოსდიოდა, რასაც ვერ ვიტყვით ნახევარფინალურ პაექრობაზე აზერბაიჯანელ ინტიგამ ვალიზადასთან. ეს ფრიად დაძაბული პაექრობა იყო, რომელშიც ქუთაისელმა ათლეტმა 2:1 იმარჯვა.

კენჭაძე ლოდად ყალიბდება

კენჭაძე მეოთხედფინალში რუსთა მსოფლიოს ორგზის დაღესტანელ ჩემპიონ მაგომედრასულ გაზიმაგომედოვთან 2:9 დამარცხდა, ბრინჯაოსთვის პაექრობაში კი ბულგარელი მიროსლავ კიროვი ლამაზ სტილში „ტუშეთი“ დაამარცხა.

ამბროლაურელმა ფალავანმა ჩვეულად აქტიურად დაიწყო ეს პაექრობა და ბულგარელს 30-წამიანი საჯარიმო დრო ჩაურთეს. კენჭაძემ ქულა არ დაანება და 1:0 დაწინაურდა, თუმცა ჩვეულ შემტევ სტილში გააგრძელა ჭიდაობა და ლეიბზე დანთებული ცეცხლი არც ამის შემდეგ გაუნელებია, რამაც შედეგიც მოუტანა - ფეხიდან შესვლით დაბლა გადაიყვანა, მაგრამ შეტევა ისევ გააგრძელა და ჯვარედინი მოვლებიდან კიდევ ერთ ორქულიანზე დაატრიალა: 5:0. ბულგარელი ზონიდან გავიდა, თორემ დიდი ალბათობით, შესატევად მომართული კენჭაძე ისევ დაატრიალებდა. შესვენების შემდეგ კენჭაძემ კიდევ ერთხელ აიყვანა ფეხიდან, თუმცა ვერ გადააგდო, მხოლოდ წრიდან გაიყვანა და ანგარიში 6:0 გახადა. ბოლოს ისევ წარმატებით „აუღო“ ფეხი, ოღონდ ზურგიდან შემოუტრიალდა და ისე გადაიყვანა მორიგ ორქულიანზე - 8:0, თან ბეჭებზეც დადო.

ამათ გარდა, კენჭაძემ რომში კიდევ ორი შეხვედრა მოიგო: პირველივე პაექრობაში სომეხ ჰრაირ ალიხანიანს 9:2 მოუგო, დამამშვიდებელში კი ესპანელ ჯონათან ალვარეს დიასს წმინდად, 10:0 აჯობა.

დრამა: ოდიკაძე-სადულაევი

ოდიკაძემ ერთადერთი პაექრობა ნახევარფინალში დათმო რუსთა შეუჩერებელ დაღესტნელ აბდულრაშიდ სადულაევთან: 0:6. სამწუხაროდ, სადულაევს ვერც ამჯერად დავუპირისპირეთ რამე ღირებული, თუმცა არა მარტო ჩვენ, ჯერჯერობით მას გასაღებს ვერავინ უძებნის: სადულაევის შეჩერება მსოფლიოს ჭიდაობისთვის კვლავაც გადაუჭრელ პრობლემად რჩება.

ანგარიში კი პირველი პერიოდისაა. საწყის წუთებში სადულაევმა ორჯერ, ლამის იდენტური შესვლებით აიყვანა ფეხიდან და ორქულიანებზე გადაიყვანა: 0:4. მესამე გდება კონტრშეტევაზე გააკეთა, როცა ოდიკაძემ სცადა ფეხში შესვლა, მაგრამ მეტოქემ შესვლაც დაუხურა, ზურგიდანაც მოუარა და კიდეც გადააგდო. მეორე პერიოდში რუსი შეტევით თავს დიდად არ იკლავდა, ოდიკაძის აქტივში კი ის თუ ჩაითვლება, რომ სამჯერ შევიდა ფეხში. ოღონდ სამივე შემთხვევაში სადულაევმა ადვილად აართვა ფეხი. ვფიქრობთ, ოდიკაძეს იმ ეპიზოდებში, განსაკუთრებით - პირველ ორში ჟინი და შემართება დააკლდა. ფეხის „აღება“ ორჯერ სადულაევმაც შეძლო, მაგრამ ოდიკაძემ თავი დაიცვა, თუმცა მაინც დამარცხდა.

მანამდე ოდიკაძემ ორი პაექრობა მოიგო. ჯერ სომეხ სარგის ჰოვსეპიანს 5:0 სძლია, რაც დიდად არ გასჭირვებია: ქვეჭიდიდან ორჯერ დაატრიალა ისე, რომ მეტოქეს მისი ფეხი დაჭერილი ჰქონდა, ერთი ქულა კი მანამდე მიითვალა. აი, ბელარუს დზიანის კრამიანკოუს კი ბოლო 15 წამში მოპოვებული ქულებით აჯობა. ახალგაზრდა კრამიანკოუ საკმაოდ კერკეტი კაკალი გამოდგა. დასრულებამდე ნახევარი წუთით ადრე ანგარიში საყაიმო იყო - 3:3, თუმცა ბოლო ორქულიანი გდება ბელარუსს ჰქონდა შესრულებული და ის იგებდა. თან შეტევაშიც თვითონ იყო - ოდიკაძე ფეხში კი შევიდა, მაგრამ მეტოქე ჩაჯდა და „ფეხის აღება“ არ დაანება. პირიქით, წელში ხელებიც შეუკრა და დატრიალება მოუნდომა. ოღონდ ოდიკაძესაც საიმედოდ ჰქონდა მისი ფეხი ჩაბღუჯული და მოძრაობა დაუხურა, ბელარუსმა კი სამბო-ძიუდოს სტილში ლამის მტკივნეულით დაუჭირა ხელი და კიდევ ერთი ქულით დაისაჯა: 6:3.

ოდიკაძეს ბრინჯაოსთვის შეხვედრაშიც ძლიერი მეტოქე ჰყავდა - აზერბაიჯანელთა ევროპული თამაშების ფინალისტი ნურმაგომედ გაჯიევი. ოდიკაძემ კი 3:2 მოიგო. მთლიანობაში, მან საკმაოდ ძლიერ მეტოქეს დაძაბულ ბრძოლაში, მაგრამ მაინც დამაჯერებლად აჯობა.

მწითურის ფანტასტიკური დასაწყისი

ირაკლი მწითურმა საკვალიფიკაციო ეტაპზე საცოდავ დღეში ჩააგდო კოსოვოელი ედონ შალა - 1.18 წამში სამჯერ გაუკეთა 4-ქულიანი გდება და 12:0 მოუგო. პირველი წუთის განმავლობაში ორჯერ წამოიღო კისრულზე, ბოლოს კი ორივე ფეხიდან აყვანილი საკმაოდ მაღალი ტრაექტორიით გადააგდო. მომდევნო პაექრობაში მწითურმა 7:5 დაამარცხა რუსეთიდან მოლდოვაში გადასული ოსი გიორგი რუბაევი. არადა, ქართველს 30-წამიანი საჯარიმო დრო ჩაურთეს და იქაც რუბაევმა კინაღამ წამოიღო მოგვერდზე, მაგრამ ამან კონტრილეთით იქით გადააგდო და თან კინაღამ ბეჭებზეც დააწვინა. მეორე პერიოდში რუბაევმა ფეხიდან აიყვანა, თუმცა მწითურმა კონტრილეთით კინაღამ იქით გადაიყვანა. სამწუხაროდ, მოძრაობა ბოლომდე ვერ მიიყვანა, სანაცვლოდ კი  მეტოქემ დაბლაც ჩაიყვანა და დაატრიალა კიდეც: 5:2 მის სასარგებლოდ. მწითურმა ახლაც გამოავლინა ხასიათის საუკეთესო თვისებები - ბუნებით მებრძოლია და წინასწარ არასოდეს ნებდება. თან ფიზიკურადაც კარგადაა მომზადებული. ის არც ახლა გატყდა და დგომში ჯვარედინი მოვლებიდან მოგვერდზე გადაიტანა რუბაევი, რაც მსაჯებმა 4 ქულად შეაფასეს და ანგარიში 6:5 გახდა მის სასარგებლოდ, თუმცა მოლდოველებმა გააპროტესტეს. მსაჯებმა გადაწყვეტილება აღარ შეცვალეს და მწითურს კიდევ ერთი ქულა დაუმატეს: 7:5. ამ პაექრობას დიდი ენერგია შეალია და თურქ სულეიმან კარადენიზთან 1:6 დათმო. ვფიქრობთ, ამ ორთაბრძოლაში უფრო თვითონ ვერ შეძლო მობილიზება, თორემ თურქი განსაკუთრებით ძლიერი ნამდვილად არ იყო.

აი, ბრინჯაოსთვის პაექრობაში კი მწითურს უფრო მსაჯებმა მოუგეს, ვიდრე - აზერბაიჯანელმა ასლანბეკ ალბოროვმა: 0:2. პირველ პერიოდში 30-წამიანი საჯარიმო ჩაურთეს პასიურობისთვის, თუმცა საკითხავია, რეალურად ვინ იყო პასიური... სამაგიეროდ, ალბოროვმა რომ ლამის მთელი მეორე პერიოდი უკან-უკან სირბილში გაატარა, ამაზე თვალი დახუჭეს.

დებიუტანტს ცოტა დააკლდა

სხულუხია უმედლოდ კი დარჩა, მაგრამ ევროპის ჩემპიონატის დებიუტანტს მეხუთე ადგილი მაინც აქტივში უნდა ჩავუთვალოთ. მან ჯერ ლიეტუველი არტემ აუგა დაამარცხა - 6:0, მერე კი იტალიელ ჯანლუკა ტალამოს 6:2 სძლია და ნახევარფინალში გავიდა, სადაც პოლონელთა დაღესტნელ ევროპის ჩემპიონსა და მსოფლიოს ფინალისტ მაგომედმურად გაჯიევთან 1:4 წააგო. სამწუხაროდ, ჩვენებური დამამშვიდებლის ფინალშიც დამარცხდა თურქ ჰეიდარ იავუზთან: 1:7.

ხინჩეგაშვილი, მარსაგიშვილი: მწარე მარცხები

ალბათ, ჩვენთვის ყველაზე მტკივნეული ვლადიმერ ხინჩეგაშვილის (65) მარცხი იყო პირველივე შეხვედრაში ახალგაზრდა აზერბაიჯანელ ალი რაჰიმზადესთან. თან წაგებასაც გააჩნია - 0:7. მოგვიანებით აზერბაიჯანელთა მეორე ნომერი რაჰიმზადე ნახევარფინალში დამარცხდა, რამაც ხინჩეგაშვილს სანუგეშო წრის გზა გადაუკეტა. ვფიქრობთ, რაჰიმზადესთან შეხვედრის ანგარიში ყველაფერზე მიუთითებს, ჩვენ კი ერთს დავძენთ: დღეს უკვე აშკარაა, რომ ხინჩეგაშვილს ოლიმპიადისთვის სათანადოდ ვერ ვამზადებთ. თუმცა ოლიმპიადამდე ჯერ ლიცენზიაა მოსაპოვებელი.

დავით მარსაგიშვილმა (86) რომში ორი შეხვედრა გამართა და ორივე ფრედ დაამთავრა. ამათგან პირველში მოგება ჩაეთვალა თურქ ფატიჰ ერდინთან 4:4-ზე და თავი ამ გამარჯვებით დაგვამახსოვრა. აქ მარსაგიშვილმა ბოლო წამებზე გაათანაბრა ანგარიში და ამით მოიგო. სამაგიეროდ, 2:2-ზე დამთავრებულ მეორე პაექრობაში სლოვაკეთის სახელით მოჭიდავე მომავალ ბრინჯაოს მედალოსან ბორის მაკოევთან ბოლო წამებზე უკვე თვითონ დაკარგა ქულები და გამარჯვებაც მეტოქეს დარჩა. მოგვიანებით არც მას მიეცა სანუგეშო წრეში გადასვლის შანსი. მარსაგიშვილის დიდი შესაძლებლობები ყველამ კარგად ვიცით, მაგრამ, სამწუხაროდ, არასტაბილურია და ყველა ტურნირზე ერთხელ მაინც გამოურევს ჩაგდებულ შეხვედრას ან ეპიზოდს, რაც რომშიც ვიხილეთ.

ჩვენი გუნდიდან პირველივე პაექრობა ორმა ფალავანმა დათმო: ოთარ გოგავა (57) ბულგარელ გეორგი ვანგელოვთან 0:9 დამარცხდა, ნიკა კენჭაძემ (79) კი, მოლოდინისამებრ, საკვალიფიკაციოში აზერბაიჯანელ ჯაბრაილ ჰასანოვთან დათმო, თუმცა ეს პაექრობა ფრედ დასრულდა: 3:3.

3377
მკითხველის კომენტარები / 0 /
მსგავსი ამბები
რუბრიკის სხვა სიახლეები
;