ჭიდაობა. ზოიძე და გობაძე: ახლოს გერმანიის ჩემპიონობასთან

გერმანიის საჭიდაო ბუნდესლიგაში გაიმართა პირველი ფინალური შეხვედრა, რომელშიც „შიფერშტადტმა“ შინ მიიღო „გერმანიან ვაინგარტენი“ და სოლიდური უპირატესობით დაამარცხა:

15:7. ამ გამარჯვებაში თავისი წვლილი შეიტანა ქართველმა ბერძენ-რომაელმა, სხვადასხვა ასაკობრივ ნაკრებებში მსოფლიოსა და ევროპის არაერთგზის ჩემპიონმა რამაზ ზოიძემ (72), ვინც დამაჯერებლად და დიდი ანგარიშით, 15:0 დაამარცხა რუმინელი იონუტ პანაიტი. რუმინელმა საწყისი ნახევარი წუთი კი გაუძლო ჩვენებურს, მაგრამ ვაი იმ გაძლებას:

სხარტი და მოქნილი ზოიძე სულ უტევდა, ერთთავად წნეხში ჰყავდა პანაიტი, ვინც მსაჯებმა სავსებით დამსახურებულად ჩააყენეს ჩოქბჯენში. აი, სწორედ ამის შემდეგ დაატყდა რუმინელს ქარიშხალი თავს: ზოიძემ კარგად აქაჩა ლეიბიდან და კომბინაციაში, მცირეოდენი პაუზებით 4-ჯერ დაატრიალა: 8:0 მის სასარგებლოდ. ზოიძე დგომშიც აგრძელებდა შეტევას, თუმცა პირველ პერიოდში ანგარიში აღარ შეცვლილა, მეორის დაწყებისთანავე კი ქართველმა უკვე თავისით ჩააგდო დაბლა და თან დაატრიალა კიდეც: 12:0. ზოიძეს არც მერე შეუჩერებია შეტევები, შედეგად კი პანაიტი პასიურობისთვის ქულით დასაჯეს და ისევ ჩააყენეს ჩოქბჯენში. ზოიძემ კვლავ დაატრიალა და მაყურებლის ღრიანცელში 15:0 დააფიქსირა, თავის კლუბს კი საერთო ანგარიში გაათანაბრებინა.

თუმცა იმ დღეს ზოიძე „შიფერშტადტის“ ერთადერთი ქართველი არ ყოფილა - გამარჯვებულთა რიგებში ასევე ბერძნულ-რომაულად მოჭიდავე მსოფლიოს მესამე პრიზიორმა ლაშა გობაძემაც (87) იასპარეზა და მანაც მოგებით დაასრულა თავისი პაექრობა გერმანელ იან ფიშერთან, თუმცა მან შედარებით მოკრძალებული ანგარიშით, 4:0 გაიმარჯვა.

მასპინძელთაგან ასევე გაიმარჯვეს თავისუფალ სტილში ბულგარელმა გეორგი ვანგელოვმა (60), ინდოელმა ბაირანგ პუნიამ (67) და ბერძნულ-რომაულად მოჭიდავე რუსმა სანალ სემენოვმა (63).

აღსანიშნავია, რომ „გერმანიან ვაინგარტენმაც“ ამდენივე - ხუთი პაექრობა მოიგო, თუმცა „შიფერშტადტს“ ტექნიკური ქულები ბევრად მეტი აღმოაჩნდა და განმეორებითი პაექრობის წინ კარგი ფორაც მიიღო. მართალია, ეს არაა ამოუქაჩავი სხვაობა, მაგრამ ისინი 9 თებერვალს მაინც გულდამშვიდებულნი ეწვევიან „ვაინგარტენს“. მათ საკმაოდ ძლიერი გუნდი ჰყავთ და დიდი შანსია, ჩვენებურები გერმანიის ჩემპიონები გახდნენ.

ვგულისხმობთ „შიფერშტადტის“ ქართველებს, თორემ ჩვენებურები ყველა ვარიანტში გახდებიან გერმანიის ჩემპიონები, რადგან ისინი „ვაინგარტენშიც“ გამოდიან: თავისუფალი სტილით მოჭიდავეები, ევროპის მესამე პრიზიორი ჯუმბერ ყველაშვილი (79) და თეიმურაზ ვანიშვილი (60).

ყოველდღიური სპორტული გაზეთი "ლელო"
768
მკითხველის კომენტარები / 0 /
მსგავსი ამბები
რუბრიკის სხვა სიახლეები
;