[ჭიდაობა] თავისუფლები რომისთვის...

დღეს დუშეთში შეკრებაზე მყოფმა საქართველოს თავისუფალი სტილით მოჭიდავეთა ნაკრებმა საკონტროლო შეხვედრები გამართა, რომლის დასრულების შემდეგაც ამ გუნდის მთავარმა მწვრთნელმა გიორგი იანტბელიძემ დაასახელა ევროპის ჩემპიონატზე წასაყვანი შემადგენლობა. ის ძირითადად საქართველოს თასის შედეგებს დაეყრდნო, თუმცა არის რამდენიმე გამონაკლისიც. კერძოდ, თასზე საერთოდ არ უჭიდავიათ მოქმედ მსოფლიოს ჩემპიონ ბექა ლომთაძეს (61) და ევროპის ფინალისტსა და მსოფლიოს მედალოსან ელიზბარ ოდიკაძეს (97), თუმცა მათ განაღდებული ჰქონდათ ნაკრებში ადგილები. ამათგან განსხვავებით, შემადგენლობაში ვერ მოხვდა კიდევ ერთი მსოფლიოს ჩემპიონი ზურაბ იაკობიშვილი (70), ვისაც ასევე არ უჭიდავია საქართველოს თასზე, თუმცა ამ შემთხვევაში დამნაშავე მოჭიდავის ტრავმაა - იაკობიშვილს ხელი სტკივა.

სამაგიეროდ, ევროპის ჩემპიონატზე წამსვლელთა შორის არაა საქართველოს თასის ერთი გამარჯვებული - ზურაბ ერბოწონაშვილი (79), ოღონდ მიზეზი სულ სხვა რამეა. მოგეხსენებათ, იანვარში მას სტამბოლში, იაშარ დოგუს მემორიალზე ჩხუბი მოუხდა უკრაინელთა სახელით მოასპარეზე ჩეჩენ ზაკარიევთან, რისთვისაც სამთვიანი დისკვალიფიკაცია მისცეს. ის გამოტოვებს ევროპის ჩემპიონატს, სალიცენზიო ტურნირებში კი ისედაც არ უწევდა ჭიდაობა, რადგან ეს წონა არ შედის ოლიმპიადის პროგრამაში.

მისი გამოკლების გამო გაჩნდა ამ წონაში სპარინგების საჭიროება. არსებითად, ეს იყო ერთადერთი წონა, სადაც საკონტროლო შეხვედრას უნდა გამოევლინა ევროპის ჩემპიონატზე წამსვლელის ვინაობა, თორემ სხვა წონებში გუნდის შემადგენლობა ცნობილი იყო და იქ სპარინგებს მხოლოდ საკონტროლო დატვირთვა ჰქონდა და არა შესარჩევი. 79 კილოგრამში საევროპო ნაკრებში ადგილის მოსაპოვებლად ნიკა კენჭაძე და თბილისელი ტარიელ გაფრინდაშვილი იბრძოდნენ, ეს უფლება კი კენჭაძემ მოიპოვა.

ევროპის ჩემპიონატი 10-16 თებერვალს რომში ტარდება, თუმცა თავისუფალი სტილით მოჭიდავეები მხოლოდ ბოლო სამ დღეს იასპარეზებენ. ამიტომ ჩვენი ნაკრები „მარადიულ ქალაქში“ 11 თებერვალს გაფრინდება, მანამდე კი დუშეთის ბაზაზე ივარჯიშებენ, სადაც დასკვნითი შეკრება მიმდინარეობს.

საქართველოს ნაკრები. თავისუფალი ჭიდაობა

57 კგ. ოთარ გოგავა (ხონი, ორც)

61 კგ. ბექა ლომთაძე (ქუთაისი)

65 კგ. ვლადიმერ ხინჩეგაშვილი (გორი)

70 კგ. მირზა სხულუხია (ქუთაისი)

74 კგ. ავთანდილ კენჭაძე (ამბროლაური, ორც)

79 კგ. ნიკა კენჭაძე (ამბროლაური, ორც)

86 კგ. დავით მარსაგიშვილი (ყაზბეგი)

92 კგ. ირაკლი მწითური (თბილისი)

97 კგ. ელიზბარ ოდიკაძე (თბილისი)

125 კგ. გენო პეტრიაშვილი (გორი). 

658
მკითხველის კომენტარები / 0 /
მსგავსი ამბები
რუბრიკის სხვა სიახლეები
;