[ჭიდაობა. მეტოქე] ტეილორის დაბრუნება

ამერიკელი მსოფლიოს 2018 წლის ჩემპიონი თავისუფალ ჭიდაობაში დევიდ ტეილორი (86) მუხლის ტრავმით გამოწვეული ხანგრძლივი პაუზის შემდეგ დაბრუნდა და ოლიმპიადის ლიცენზიაც მოიპოვა. ეს ამბავი წინა კვირაში კანადურ ოტავაში მოხდა, სადაც ერთმანეთის მიყოლებით ჯერ პან ამერიკის ჩემპიონატი გაიმართა, მერე კი - პან ამერიკის სალიცენზიო შეჯიბრება.

როგორც გითხარით, ტეილორი მსოფლიოს ჩემპიონი ორი წლის წინ გახდა, როცა ბუდაპეშტში გამართულ პლანეტის პირველობაზე ჯერ პირველ წრეში ირანელთა მოქმედი ოლიმპიური და მსოფლიოს ჩემპიონი (მან ეს ტიტული შარშანაც მოიპოვა - კარიერაში მეორედ) ჰასან ჩარატი იაზდანი დაამარცხა, მერე ბელარუსი და კუბელი მეტოქეების ძლევის შემდეგ რუსთა ევროპის ორგზის ჩემპიონ დაურენ კურუგლიევსაც მოუგო, ფინალში კი თურქი ფატიჰ ერდინი დაამარცხა. მას შემდეგ ტეილორმა პან ამერიკის პირველობა და კიდევ ერთი საერთაშორისო ტურნირი მოიგო, მეტი კი აღარ დასცალდა - შარშან შემოდგომაზე მუხლი იტკინა და ლეიბს მხოლოდ ახლა დაუბრუნდა. დაუბრუნდა და კიდეც გაიმარჯვა - ვენესუელელ პედრო ფრანსისკო კაბალოს ფუენტესთან ვადამდელი გამარჯვების შემდეგ ნახევარფინალში კუბელთა პან ამერიკის წლევანდელი გამარჯვებული იურისკი ტორებლანკა ქუერალტაც დაამარცხა, ფინალში კი წლევანდელი პან ამერიკის პირველობის პერუელ ფინალისტ პოოლ ედისონ ამბროსიო გრიფოს აჯობა. თუმცა მასთან რომც წაეგო, ტოკიოს ოლიმპიადის ლიცენზია მაინც განაღდებული ჰქონდა - შეგახსენებთ, რომ ამ რანგის ტურნირებში საგზურებს ფინალისტები იღებენ. ამის მიუხედავად, ტეილორმა ბოლომდე „დაუქნია თითი“ ოლიმპიადაზე თავის პოტენციურ მეტოქეებს და ყველას მიანიშნა, მე დავბრუნდიო. აღსანიშნავია, რომ პან ამერიკის წლევანდელ პირველობაზე თავად ტეილორს არ უასპარეზია - ამერიკელებმა იქ დავიდ ალექსანდერ დირინგერი აჭიდავეს, ვინც ურიგოდ არ გამოსულა - მესამეზე გავიდა, მაგრამ ჩემპიონი ვერ გახდა, სხვა სინჯის მედალი კი ჭიდაობის ამ სტილის დამაარსებელი ამერიკელებისთვის არა გვგონია, დამაკმაყოფილებელი შედეგი იყოს.

ამერიკულ სალიცენზიო ტურნირზე ოქროს მედლები მხოლოდ ამერიკელებმა და კუბელებმა გაინაწილეს - სამ-სამი ოქრო დაისაკუთრეს, ლიცენზირებულთა შორის კი რამდენიმე ტიტულოვანი ფალავანია. მაგალითად, ამერიკელები - მსოფლიოს ვიცე-ჩემპიონი ტომას პატრიკ გილმანი (57) და მსოფლიოს მრავალგზის ბრინჯაოს პრიზიორი ნიკ ედვარდ გვიაზდოვსკი (125). კუბელთაგან ჩემპიონები მსოფლიოს ორგზის ბრინჯაოს მედალოსანი ალეხანდრო ენრიკე ვალდეს ტობიერი (65), მსოფლიოს ფინალისტი და რამდენიმეგზის მესამე პრიზიორი გეანდრო გარსონ კაბალიერო (74) და 33 წლის ვეტერანი, მსოფლიოს ორგზის ფინალისტი რაინერის პერეზ სალასი (97) გახდნენ. როგორც გითხარით, ამათ გარდა, ოლიმპიური საგზურები პერუმაც მოიპოვა. ამათ გარდა, კანადამ ორი, არგენტინამ, პუერტო რიკომ და კოლუმბიამ კი თითო ლიცენზია დაისაკუთრეს. პუერტო რიკოელთაგან ეს მსოფლიოს 2011 წლის ფინალისტმა მარტინ ფრანკლინ გომესმა (65) შეძლო, ვინც მესამედ იჭიდავებს ოლიმპიადაზე, ჩვენ კი ეს ფალავანი მწარედ გვახსოვს სტამბოლში ჩატარებული ზემოაღნიშნული მსოფლიოს პირველობიდან - იქ პირველივე წრეში მალხაზ ზარქუა დაგვიმარცხა (მაშინ ისინი 60 კილოგრამში ჭიდაობდნენ. ისე კი პან ამერიკის სალიცენზიო შეჯიბრებას ყურადღება იმიტომაც დავუითმეთ, რომ მხოლოდ გომესი არ გვახსოვს ასე მწარედ - გავიხსენოთ, ლონდონის ოლიმპიადაზე დავით მარსაგიშვილი (86) როგორ დაგვიმარცხა ასე პან ამერიკის სალიცენზიო შეჯიბრებიდან გასულმა მეორე პუერტორიკოელმა ხაიმე ესპინალიმ!

ოტავაში საყოველთაო ყურადღება მიიქცია არგენტინელთა ლიცენზიამ, რომელიც 65 კილოგრამში აგუსტინ ალეხანდრო დესტრიბასმა მოიპოვა - 1996 წლის შემდეგ პატაგონიელებს პირველად ეყოლებათ მოჭიდავე ოლიმპიადაზე. თუმცა ეს კიდევ არაა ყველაფერი, რადგან არგენტინელი (რამდენიმე დღით ადრე მან კონტინენტის ჩემპიონატშიც ვერცხლი მოიპოვა) ოტავაში ტურნირის მთავარი სენსაციის ავტორიც გახდა - ნახევარფინალში ბეჭებზე დააწვინა ფავორიტად მიჩნეული ამერიკელი ზაინ ალენ რეტერფორდი. რეტერფორდი საბოლოოდ ბრინჯაოს კი დაეუფლა, მაგრამ ესაა ერთადერთი წონა, სადაც ამერიკელებს ლიცენზია არა აქვთ მოპოვებული.

ამერიკელთა დარჩენილი წონებიდან ლიცენზიები ყაზახურ ნურ სულთანში გამართულ მსოფლიოს შარშანდელ პირველობაზე 74-ში ოლიმპიურმა და მსოფლიოს ოთხგზის ჩემპიონმა ჯორდან ბაროუზმა, ხოლო 97-ში ასევე ოლიმპიურმა, ოღონდ მსოფლიოს ორგზის ჩემპიონმა კაილ სნაიდერმა კი მოიპოვეს, თუმცა მათ ჯერ კიდევ არა აქვთ ადგილები განაღდებული ოლიმპიურ ნაკრებში, რადგან ტოკიოში წასვლაზე პრეტენზიას ასევე აცხადებენ კაილ დუგლას დაიკი (79) და იარდენ მიშელ ტბორი კოქსი (92). როგორც ვხედავთ, ისინი არაოლიმპიურ წონებში გამოდიან, სადაც ზედიზედ ორჯერ გახდნენ მსოფლიოს - ბოლო ორ-ორი პირველობა მოიგეს (კოქსი რიო დე ჟანეიროს ოლიმპიადის ბრინჯაოს მედალოსანიცაა), ახლა კი აშშ-ს ოლიმპიურ ნაკრებში მოსახვედრად იბრძვიან. პან ამერიკის სალიცენზიო შეჯიბრების შემდეგ კუბელებს თავისუფალ ჭიდაობაში ორი ლიცენზია დარჩათ მოსაპოვებელი - 57-სა და 86 კილოგრამში. სამაგიეროდ, კუბელმა ბერძენ-რომაელებმა სრულად დააკომპლექტეს თავიანთი ნაკრები. ასევე - ამერიკელმა ქალებმაც, ჩვენ კი დასასრულს ერთ საინტერესო ფაქტზე გავამხვილებთ ყურადღებას, ოღონდ - პან ამერიკის ჩემპიონატიდან: იქ ათი წონიდან რვა ოქრო ამერიკელებმა მოიპოვეს, თითო კი კუბამ და... იამაიკამ. სახელოვანი ბობ მარლის სამშობლოსთვის ეს ამ რანგის პირველობაზე მოპოვებული პირველი ოქროა, კუნძულელებს კი ეს ისტორიული მედალი ანგუს პატრიკ არტურმა მოუტანა. ფინალში მან კოსტარიკელი მაქსველ ლემარ ლაკეი გარიტა დაამარცხა, თუმცა ამ გამარჯვებას ერთგვარად ჩრდილს ჰფენს ის გარემოება, რომ ამ წონაში მხოლოდ ეს ორი ფალავანი ჭიდაობდა, მეტი მონაწილე არ ყოფილა. ამის მიუხედავად, ისტორიას მაინც შემორჩება არტურისა და იამაიკელების მედალი.

398
მკითხველის კომენტარები / 0 /
მსგავსი ამბები
რუბრიკის სხვა სიახლეები
;