ჭიდაობა. მინსკის ოლიმპიადისთვის 12-დან 10 წონა შევავსეთ

ქართველი მოჭიდავეები ივნისის ბოლოს მინსკში, მეორე ევროპულ თამაშებზე 10-კაციანი შემადგენლობით გამოვლენ. შეგახსენებთ, რომ დიდი ოლიმპიადის მსგავსად, კონტინენტური თამაშების პროგრამაშიც ვაჟთა ორივე საჭიდაო სტილში და ქალებშიც 6-6 წონითი კატეგორიაა შეტანილი - ის წონები, რომლებიც დიდ ოლიმპიადებზეცაა დაშვებული. თავისუფალ ჭიდაობაში ესაა 57, 65, 74, 86, 97 და 125 კილოგრამები, ბერძნულ-რომაულში - 60, 67, 77, 87, 98 და 130 კილოგრამები.

ჭიდაობებში ევროპული თამაშების სალიცენზიო შეჯიბრება ახლახანს ბუქარესტში ჩატარებული ევროპის ჩემპიონატი იყო. სხვადასხვა წონაში განსხვავებული ოდენობის საგზურები გაიცემოდა - ზოგან 14 იყო, ზოგან - 16, თუმცა უმეტესად 15 ლიცენზია თამაშდებოდა.

თავისუფალი სტილით მოჭიდავეთა ნაკრებმა 6-ვე წონაში შეძლო ლიცენზიის მოპოვება, ბერძენ-რომაელებმა კი - 2-ში. ისინი ულიცენზიოდ 87 და 97 კილოგრამებში დარჩნენ. რაოდენ გასაკვირიც უნდა იყოს, ამ ორიდან ერთ-ერთი ხელმოცარული ჩვენი გუნდის ლიდერი, ევროპის ჩემპიონი და მსოფლიოს ორგზის მესამე პრიზიორი რობერტ კობლიაშვილია 87 კილოგრამში, ხოლო მეორე ულიცენზიო წონა 97 კილოგრამია, სადაც კონტინენტის პირველობაზე ახალგაზრდებში მსოფლიოს ჩემპიონი გიორგი მელია ჭიდაობდა. კობლიაშვილი ბუქარესტში პირველივე წრეში მეტად მოულოდნელად დამარცხდა პოლონელ თადეუშ მიხალიკთან, მელიამ კი თურქ ფატიჰ ბასკოისთან წააგო. ამ წონებში საგზურის მოპოვების პრაქტიკული შანსი გამორიცხულია, რადგან მეტი სალიცენზიო შეჯიბრება აღარ ტარდება.

შეგახსენებთ, რომ ჭიდაობებში საგზურს ფედერაცია იღებს და არა პირადად სპორტსმენი ანუ ლიცენზია სახელობითი არაა. მწვრთნელებს მინსკში წასაყვანი შემადგენლობები ოფიციალურად ჯერ არ დაუსახელებიათ, თუმცა ამის გაკეთება მალე მოუწევთ, რადგან განაცხადების წარდგენის ვადა იწურება.

957
მკითხველის კომენტარები / 0 /
მსგავსი ამბები
რუბრიკის სხვა სიახლეები
;