ჭიდაობა. მოსკოვის ტურნირი: ალმასზე მესამე გვერგო

საქართველოს ორივე ნაკრებმა - ბერძნულ-რომაულმაც და თავისუფალი სტილით მოჭიდავეებმაც მესამე ადგილზე დაასრულეს გამოსვლა მოსკოვში ჩატარებულ "ევროპის ერთა თასზე - "ალროსას თასი".

ბერძენ-რომაელებმა გადამწყვეტ შხვედრაში 5:3 მოუგეს ბელარუსს, "თავისუფლებმა" კი იმავე დატვირთვის მატარებელ პაექრობაში გაცილებით დამაჯერებლად, 7:1 აჯობეს მოლდოვას.
ბერძენ-რომაელებმა მანამდე წააგეს უნგრეთთან - 3:5 და რუსეთთან - 0:8, "თავისუფლები" კი რუსეთთან და აზერბაიჯანთან ერთნაირი ანგარიშით, 1:7 დამარცხდნენ.

შეგახსენებთ, რომ ჩვენი ორივე ნაკრები მოსკოვში სათადარიგო შემადგენლობით გამოდიოდა, ლიდერები არ ჰყავდა არც ერთს.

თავისუფალი სტილით მოჭიდავეთა ნაკრებს ლიდერად მძიმეწონოსანი გიორგი მეშვილდიშვილი მოევლინა, ვინც სამივე პირადი შეხვედრა მოიგო. სწორედ მის ანგარიშზეა რუსეთთან და აზერბაიჯანთან დამსახურებული ის თითო ქულა. ოღონდ რუსებთან თუ ზაურ კოზანოვს აჯობა, აზერბაიჯანთან თვით ევროპისა და მსოფლიოს ფინალისტი ჯამალედდინ მაგომედოვი დაამარცხა.

თუმცა ჯაბანი არც კოზანოვი გამოდგა და თავიდან დაწინაურდა კიდეც, როცა ჩვენებურს 30-წამიანი საჯარიმო ჩაურთეს, რაც ამან ვერ გამოიყენა: 0:1. სამაგიეროდ, ჩამორჩენის შემდეგ გააქტიურდა და პირველივე შეტევაზე მეტოქე წრიდან გაიყვანა, მალე კი დაბლა ჩაყვანით 3:1 დაწინაურდა. მეშვილდიშვილმა მეორე პერიოდიც შეტევით დაიწყო - უკნიდან მოვლებით ლაზათიანადაც გადააგდო ორქულიანზე, მალე კი ფეხში შესვლით დაბლა ჩაიყვანა: 7:1. ჩვენებურმა ფეხებზე ჯვარიც კარგად შეუკრა, მაგრამ ორი მცდელობის მიუხედავად, ვერ დაატრიალა. მოგვიანებით კოზანოვმაც აიყვანა ფეხიდან, მაგრამ მეშვილდიშვილმა კარგად დაიცვა თავი და ვერ გადააგდო, მხოლოდ წრიდან გაიყვანა: 7:2. ბოლო წუთზე ბლომად ქულები ვიხილეთ, თუმცა უფრო მეტი ჩვენებურმა მოიპოვა - ჯერ წრიდან გაყვანით, მერე - დაბლა ჩაგდებით, ბოლოს კი თვითონაც დაკარგა 2 ქულა და 10:4 მოიგო.

მაგომედოვის წინააღმდეგობა ჩვენებურმა ბოლო წამებზეღა გატეხა, თორემ მანამდე 1:2 აგებდა. საბედნიეროდ, სირენამდე 20-ოდე წამით ადრე კარგად ჩაიყვანა დაბლა ზურგიდან შემოვლით და თან დაატრიალა კიდეც: 5:2.

მეშვილდიშვილის გარდა, მოლდოვასთან თეიმურაზ ვანიშვილმა (57), ოთარ გოგავამ (61), ედემი ბოლქვაძემ (65), ტარზან მაისურაძემ (74), დავით ხუციშვილმა (86) და ზურაბ ახობაძემ (97) გაიმარჯვეს.

ბერძენ-რომაელთაგან ბელარუსთან გადამწყვეტ შეხვედრაში ბექა ბალანჩივაძემ (59), მურად მიქელაძემ (66), იური ლომაძემ (71), ბაკურ გოგოლმა (75) და თორნიკე ძამაშვილმა (80) მოიპოვეს.

ჩვენებმა პირველი შეხვედრაც აღმავლობით დაიწყეს უნგრეთთან და სამი ორთაბრძოლის შემდეგ 3:0 დაწინაურდნენ, რადგან მჩატე წონებში ბალანჩივაძემ, მიქელაძემ და ლომაძემ მიჯრით მოიგეს.

სამაგიეროდ, დანარჩენი წონები პირწმინდად დავთმეთ, თუმცა თორნიკე ძამაშვილს (80) 25 წამი დააკლდა ოლიმპიურ პრიზიორ ტომაშ ლორინცთან მოსაგებად.

რუსებთან, როგორ გითხარით, ჩვენები "მშრალად" დამარცხდნენ.

ყოველდღიური სპორტული გაზეთი "ლელო"
1341
მკითხველის კომენტარები / 0 /
მსგავსი ამბები
რუბრიკის სხვა სიახლეები
;