[ჭიდაობა. ნაკრები] მოჭიდავეებიც უქმობენ

ახალმა კორონავირუსმა ცხოვრების სხვა დარგებთან ერთად კოლაფსი საქართველოს საჭიდაო სამყაროშიც გამოიწვია. უკვე მოგახსენეთ, რომ მსოფლიოს ჭიდაობის გაერთიანებულმა ფედერაციამ გააუქმა მოახლოებული სალიცენზიო ტურნირები - რეგიონალურებიც და მსოფლიოსიც. რეგიონალურები ძირითადად მარტში ტარდებოდა, ხოლო მსოფლიოსი - აპრილ-მაისის მიჯნაზე და მას სოფია მასპინძლობდა. ევროპის სალიცენზიო შეჯიბრება 19-22 მარტს ბუდაპეშტში უნდა გამართულიყო, თუმცა, სავარაუდოდ, მაისისთვის გადაიწია, როგორც აზიისა და აფრიკა-ოკეანიის საკვალიფიკაციო შეჯიბრებებმა, ოღონდ ესეც იმაზეა დამოკიდებული, ჩაცხრება თუ არა იმ დროისთვის ეპიდემია.

ბუნებრივია, ამან ჩვენს მოჭიდავეებსაც შეუცვალათ გეგმები, რომლებიც დაკავშირებული იყო უახლოეს სალიცენზიო ტურნირთან - ისინი ამ დღეებში ბუდაპეშტში უნდა გაფრენილიყვნენ, ახლა კი საერთოდ უვარჯიშოდ არიან - ეროვნულმა გუნდებმა შეწყვიტეს შეკრებები, დაიკეტა „ფალავანთა კლუბის“ დარბაზი და ვარჯიშის ნაცვლად ახლა კორონავირუსის გავრცელებას ადევნებენ თვალს.

თავისუფალი სტილით მოჭიდავეთა ნაკრები ბუდაპეშტისთვის დუშეთში გადიოდა შეკრებას, მაგრამ ქვეყნის ხელისუფლების რეკომენდაციათა შესაბამისად, დასრულებამდე ოთხი დღით ადრე შეწყვიტა ის და უკან დაბრუნდა. ბერძენ-რომაელები სულაც უცხოეთში იყვნენ ერთობლივ შეკრებაზე, მაგრამ შუა გზაზე ისიც მიატოვეს და სამშობლოში გამობრუნდნენ. თუმცა არც ესაა გამოსავალი - როგორც გითხარით, ჭიდაობის ფედერაციასთან არსებული „ფალავანთა კლუბის“ დარბაზიც დაკეტილია, რადგან ქვეყანაში გაუქმდა ან გადაიდო ყველა სპორტული ღონისძიება. შედეგად, ნაკრები ვერც ორგანიზებულად ვარჯიშს ვერ ახერხებს. ახლა ყველაფერი იმაზეა დამოკიდებული, როდის ჩაცხრება ეს ეპიდემია. ამას ისიც ემატება, რომ არც რიგითი საერთაშორისო ტურნირები აღარ ტარდება და რომც იმართებოდეს, ქვეყნების უმეტესობამ ჩაკეტა საზღვრები, ავიაკომპანიებმა კი დროებით გააუქმეს რეისები ანუ უცხოეთში წასვლაც პრობლემური გახდა.

ვნახოთ, როდემდე გასტანს ეს ამბები.

189
მკითხველის კომენტარები / 0 /
მსგავსი ამბები
რუბრიკის სხვა სიახლეები
;