[ჭიდაობა] პირველი შეკრება, დიდი ენთუზიაზმი და მომავლის იმედი...

საქართველოს თავისუფალი სტილით მოჭიდავეთა ნაკრებმა დაასრულა პირველი პოსტპანდემიური შეკრება, რომელიც გუნდმა ბორჯომში, სპორტკომპლექს „ოლიმპში“ გაიარა. ეს იყო სარეაბილიტაციო-აღდგენითი ტიპის ვარჯიშები, რაც ამდენხნიანი პაუზის შემდეგ სპორტულ რეჟიმსა და საჭიდაო ხალიჩასთან გაშინაურებას ისახავდა მიზნად.

გუნდმა ეს შეკრება რამდენიმე დღის წინ - 24 ივლისს დაამთავრა და სპორტსმენები სახლებს დაუბრუნდნენ. როგორც ნაკრების მთავარი მწვრთნელი, გიორგი იანტბელიძე ამბობს, ვარჯიშს მოწყურებულმა სპორტსმენებმა გულმოდგინედ იშრომეს და დიდი ენთუზიაზმით ჩაატარეს ეს პირველი ეტაპი. შეიძლება ითქვას, ჟინი მოიკლეს და მონატრებულ საქმეს დაუბრუნდნენ, თუმცა მწვრთნელი იმასაც დასძენს, რომ თუ ჰორიზონტზე რაიმე ტურნირის პერსპექტივა არ გამოჩნდება და ათლეტები სადმე არ იასპარეზებენ, მხოლოდ ენთუზიაზმზე ძალიან გაუჭირდებათ. არადა, ჯერჯერობით ახლო პერსპექტივაში არანაირი შეჯიბრება არ ჩანს - საერთაშორისო კალენდარი სექტემბრამდეა შეწყვეტილი, მის განახლება-არგანახლებაზე კი მსოფლიოს ჭიდაობის გაერთიანებული ფედერაცია აგვისტოში კიდევ ერთხელ იმსჯელებს და საბოლოო გადაწყვეტილებასაც მერე გამოაცხადებს. და თუ სეზონი არ განახლდება, არაა გამორიცხული, ჩვენმა ფედერაციამ რამე საშინაო ტურნირი დანიშნოს ეროვნული ნაკრების წევრთა მონაწილეობით, რაც ბიჭებს ცოტათი მაინც შეუვსებს სატურნირო დეფიციტს. თუმცა შევსებაზე საუბარი ფრიად პირობითია, ვინაიდან მათ ოლიმპიური ციკლის მოსამზადებელი ოთხწლიანი ეტაპი დასკვნით ფაზაზე შეუწყდათ - რომ არა კორონავირუსი, ისინი ახლა ტოკიოში უნდა ყოფილიყვნენ ოლიმპიადაზე.

თავისუფალი სტილით მოჭიდავეთა ნაკრების წევრები 4 აგვისტომდე ინდივიდუალიურად, ადგილზე ანუ თავიანთი ქალაქების დარბაზებში ივარჯიშებენ. 4-ში გუნდი მორიგ შეკრებას დაიწყებს ბაკურიანში. ეს უკვე მიზანმიმართული მზადების ეტაპი იქნება, რომელიც მთლიანად ფიზიკურ მომზადებას დაეთმობა. ამით გუნდი საოლიმპიადოდ, ჯერ კიდევ გაურკვეველი სამომავლო სეზონისთვის მზადების ძირითად ნაწილზეც გადავა, თუმცა მისი დასრულების შემდეგ გუნდი კიდევ ერთ აღდგენითი-სარეაბილიტაციო ტიპის შეკრებას გეგმავს. ამჯერად - ბათუმში, ზღვისპირეთში, რათა ბიჭებმა ამხელა გაცდენის, მიღებული ფიზიკური დატვირთვების შემდეგ ძალები აღიდგინონ. თანაც, ბათუმის შეკრებამდე, დიდწილად, მსოფლიოს ფედერაციის ვერდიქტიც უკვე გარკვეული იქნება და სამომავლო გეგმებსაც უფრო დეტალურად დასახავენ.

დასასრულს, გეტყვით, პირველი პოსტპანდემიური შეკრება დაასრულა ბერძენ-რომაელთა ნაკრებმაც, რომელიც მათ ბათუმში ჩაატარეს. ისიც სარეაბილიტაციო ხასიათის წვრთნები იყო, მომდევნო ეტაპი კი მათთვისაც ფიზიკური მომზადება იქნება.

230
მკითხველის კომენტარები / 0 /
მსგავსი ამბები
რუბრიკის სხვა სიახლეები
;