ბერძნულ-რომაული ჭიდაობა. ორი ოქრო, ერთი ბრინჯაო და ამდენის შანსი

საქართველოს ნაკრებმა სტამბოლში მიმდინარე ევროპის 23-წლამდელთა ჩემპიონატში პირველი ფინალური დღის შემდეგ 2 ოქრო და 1 ბრინჯაო მოიპოვა. ჩემპიონები ნუგზარ წურწუმია (55) და ზვიად პატარიძე (130) გახდნენ, მესამეზე კი ლერი აბულაძე (63) გავიდა.

აღსანიშნავია, რომ ფინალში ორივე ჩვენებურმა მასპინძელს მოუგო, თუმცა პატარიძემ თუ ტაქტიკურ შეხვედრაში დაამარცხა ამავე ასაკში ევროპის შარშანდელი გამარჯვებული ოსმან ილდირიმი - 2:0, წურწუმიამ სასწაულებრივი ორთაბრძოლა შემოუბრუნა ერკემ ოზთურქს: 8:2 ამოუქაჩა და 11:8 მოუგო.

არანაკლებ გასაკვირია, უფროსებში ევროპის წლევანდელი ევროპის მესამე პრიზიორი პირველივე წუთზე 8:2 როგორ ჩამორჩა, მაგრამ ამის შემდგ ორჯერ კარგად მოუარა ზურგიდან და დაბლა ჩაიყვანა, რასაც ერთხელ წრიდან გაყვანაც დაუმატა. ამით ანგარიში 7:8 გახადა, დასრულებამდე 35 წამით ადრე კი მომგებიანი ილეთი წამოიწყო: კარგად შეეკრა და უზადო მოგვერდით 4-ქულიანზე გადააგდო. აღსანიშნავია, რომ მან უფროსთა ევროპირველობაზეც ასე ბოლო წამზე მოუგო ბრინჯაოსთვის პაექრობა რუს ვასილ ტოპოევს.

პატარიძემ, სხვათა მსგავსად, ილდირიმიც ფიზიკურად დაჩაგრა და ინიციატივაც მის ხელთ იყო. შედეგად, თურქი ორივე პერიოდის დასაწყისში ქულა-გაფრთხილებით დასაჯეს და ჩოქბჯენშიც ჩააყენეს, თუმცა ჩვენებურმა ვერ დაატრიალა. ან, იქნებ, დიდად არც ეცადა ამხელა ენერგიის ხარჯვას, რადგან საქმე ისედაც მშვიდად მიიყვანა გამარჯვებამდე და ასაკობრივებში უკვე მეხუთედ გახდა ევროპის ჩემპიონი.

აბულაძემ ბრინჯაოსთვის შეხვედრაში ლიტველი ჯუსტას პეტრავიჩიუსი 7:4 დაამარცხა.

თუმცა სტამბოლში ევროპის ჩემპიონატი გრძელდება და ჩვენებს ისევ აქვთ კიდევ უფრო უკეთესი წარმატების მოპოვების რეალური შანსი: დღესვე ფინალში გავიდა რამაზ ზოიძე (72), სადაც ისევ თურქს, ჩენგიზ არსლანს დაეჭიდება, ხოლო უფროსებში ევროპის კიდევ ერთი ბრინჯაოს მედალოსანი დავით ჩხარტიშვილი (60) და ახალგაზრდებში მსოფლიოს ჩემპიონი გიორგი მელია (97) დამამშვიდებელში აგრძელებენ ბრძოლას ბრინჯაოს მედლისთვის.

ყოველდღიური სპორტული გაზეთი "ლელო"
1681
მკითხველის კომენტარები / 0 /
რუბრიკის სხვა სიახლეები
;