ჭიდაობა. ქართველები ბუნდესლიგაში

გერმანიის საჭიდაო ბუნდესლიგის ბოლო ტური ქართველების სიმწირითაც გამოირჩა და ჩვენთვის არც უდანაკარგო ყოფილა - არ უჭიდავია რამდენიმე ქართველს, ხოლო ვინც იასპარეზა, იმათგანაც ზოგიერთი დამარცხდა.

მაგალითად, როგორც წინა წერილში ვივარაუდეთ, ამჯერად სამხრეთ-დასავლეთის ლიგაში "ბურგჰაუზენში" არ უასპარეზია თავისუფალ ჭიდაობაში ევროპის რამდენიმეგზის მედალოსან ბექა ლომთაძეს (57), რადგან ბორჯომშია ნაკრების შეკრებაზე.

თუმცა კლუბს მისი არყოფნა არ დასტყობია, რადგან ჩვენებურის შემცვლელმა ვლადიმირ ეგოროვმაც მოიგო: ალექსანდერ რიოლს 16:0 აჯობა. ლიგის ერთპიროვნულმა ლიდერმა კლუბმაც შინ იოლად დაამარცხა ბოლოსწინა ადგილზე მყოფი "ლიუბტენი": 21:9.

შაბათს, 18 ნოემბერს მორიგ ტურში "ბურგჰაუზენი" ისევ შინ მიიღებს მეტოქეს - "იოჰანის ნიურნბერგს".

აღმოსავლეთ ლიგაში ამ ტურში ისვენებდნენ ზვიად მეტრეველიც (97) და მისი "აახენ-ვალჰაიმი", ხოლო "მერკენში" მოჭიდავე მეტრეველივით თავისუფალი სტილით მოჭიდავე ზურაბ მაჭარაშვილმა (57) მოიგო. სამაგიეროდ, თავად კლუბი დამარცხდა.

ჩვენებურმა სერჯიო შაფერი გაანადგურა: 16:0, კლუბი კი სტუმრად "კოლერბახთან" წააგო. შაბათს მორიგ ტურში ქართველთა ორივე კლუბი სტუმრად იჭიდავებს: აახენელები "რიგელსბერგს" ესტუმრებიან, "მერკენი" კი "ვიტენთან" ჩადის. "აახენ-ვალჰაიმი" სატურნირო ცხრილშია მეორეა "კოლერბახის" შემდეგ, "მერკენი" კი - მეხუთე.

ზედიზედ მეორედ დამარცხდა სამხრეთ-აღმოსავლეთის ლიგაში ბერძნულ-რომაულად მოჭიდავე ამირან შავაძე (66) - გერმანელ კრისტიან ფრისსთან, 4:9. სამწუხაროდ, მისმა "ფრაიბურგმაც" წააგო გასვლაზე "ტრიბერგთან": 6:22.

ფრაიბურგელთა შორის, ამჯერად არ გამოსულა იტალიაში გადაბარგებული გივი დავიდოვი (57). "ფრაიბურგი" მორიგ ტურში ისვენებს, ცხრილში კი არასახარბიელო - ბოლოსწინა, მე-6 ადგილზეა.

ბოლო ტური ფრიად წარმატებული აღმოჩნდა რეგიონალლიგის "გერმანიან სულგენისა" და მისი ქართველებისთვის. განსაკუთრებით - ჩვენებისთვის, რომლებმაც პირადი პაექრობები მოიგეს, თორემ კლუბმა შინ ვერ აჯობა "რაილინგენ-ჰოკენჰაიმს", მაგრამ არც წააგო და ქულა მოიპოვა: 16:16.

კლუბის ხელმძღვანელობამ 57 კილოგრამში "ქართული როქი" გააკეთა: ნიკა ტატუაშვილის ნაცვლად შოთა ღლონტი აჭიდავა. ჩვენებურმა მარიუს კატალინ-ბადეას 5:0 მოუგო, ისევ მძიმე წონაში გადასროლილმა ნოდარ ეგაძემ კი (სინამდვილეში, 97-ში გამოდის) ერიკ ოფენლოხი გაანადგურა: 15:0.

შაბათს "სულგენი" "შრიშაიმს" ესტუმრება და ახლანდელივით სიურპრიზი თუ არ შემოგვთავაზა, ვინძლო, "ადელჰაუზენის" დუბლებთან ჩამორჩენაც გააბათილოს და სატურნირო ცხრილსაც სათავეში მოექცეს. ისე, ამის გაკეთება ახლაც შეეძლოთ, ლიდერებს შინ რომ ემარჯვათ მე-8 ადგილზე მყოფ "რაილინგენ-ჰოკენჰაიმთან".

დაბოლოს, ჰესენლიგა, სადაც გიორგი ბალიაშვილმა (71) უბრძოლველად მიითვალა მოგება, რადგან მეტოქეს "ჰაიბახს" ამ წონაში მონაწილე არ ჰყავდა. ჩვენებურის კლუბმა "რიმბახმაც" იოლი გამარჯვება მიითვალა "ჰაიბახთან" - 27:9 და სატურნირო ცხრილსაც სათავეში მოექცა.

შაბათს ისინი სწორედ ლიდერის რანგში ესტუმრებიან "მიუნსტერს" და მონაპოვრის დაცვას შეეცდებიან. სავარაუდოდ, ეს არ უნდა გაუჭირდეთ, რადგან "მიუნსტერი" ბოლოსწინა, მე-7 ადგილზეა ლიგაში.

ყოველდღიური სპორტული გაზეთი "ლელო"
1050
მკითხველის კომენტარები / 0 /
მსგავსი ამბები
რუბრიკის სხვა სიახლეები
;