ჭიდაობა: ქართულ-ბუნდესლიგური ამბები

გერმანულ საჭიდაო ბუნდესლიგაში ბოლო ორ ტურში უკლებლივ ყველა ქართველი იგებს როგორც უმაღლეს ბუნდესლიგაში, ასევე - შედარებით დაბალი რანგის ლიგებში. ასე მაგალითად, ბექა ლომთაძემ (61) ზედიზედ მეორე შეხვედრა მოიგო.

გუშინ მისი კლუბი - "ბურგჰაუზენი" შინ დაუხვდა "პაუსა-პლაუენს" და დიდი ანგარიშით, 30:7 დაამარცხა, ჩვენმა ევროპის ორგზის ვიცე-ჩემპიონმა კი იანიკ რაუშს ასევე სოლიდური უპირატესობით, 12:0 აჯობა. ამით "ბურგჰაუზენმა" სამხრეთ-დასავლეთ ბუნდესლიგის ლიდერობაც იგდო ხელთ. მომდევნო ტური 4 ნოემბერს გაიმართება, მაგრამ "ბურგჰაუზენი" ისვენებს.

ლომთაძის გარდა, გუშინ გერმანიაში ჩვენმა სხვა ფალავნებმაც გაიმარჯვეს. როგორც გუშინ გითხარით, ამ ტურში აღმოსავლეთ ბუნდესლიგაში ქართველთა კლუბები ხვდებოდნენ ერთმანეთს: ზვიად მეტრეველის (130) "აახენ-ვალჰაიმი" შინ იღებდა ზურაბ მაჭარაშვილის (57) "მერკენს". შეხვედრა მასპინძლებმა მოიგეს: 21:13, რითაც გამარჯვებულმა კიდევ უფრო განიმტკიცა სატურნირო მდგომარეობა და წაგებულს საქმე უფრო გაურთულა.

სამაგიეროდ, პირად შეხვედრაში ორივე ჩვენებურმა იმარჯვა. მაჭარაშვილმა 13:0 დაჯაბნა ბულგარელი სტოიან სპასოვი, მეტრეველმა კი კიდევ უფრო დიდი ანგარიშით, 16:0 აჯობა გერმანელ ალექსანდრ კლეერს. ამავე ლიგაში "ჰაუსვაილერის" შემადგენლობაში იმარჯვა საბერძნეთში გადასულმა მიხეილ ჩიქოვანმა (130) და გენადი გუდინოვიჩს 4:0 სძლია, თუმცა მისი კლუბი სტუმრად 12:24 დამარცხდა შარშანდელ ჩემპიონ "კოლერბახთან".

ამ ჯგუფის სატურნირო ცხრილს ისევ "კოლერბახი" ლიდერობს. აახენელებმა მეორე ადგილზე გადაინაცვლეს. მორიგ ტურში, 4 ნოემბერს, აახენელები სტუმრად იჭიდავებენ მდევარ "ვიტენთან", "მერკენი" კი შინ მიიღებს "ჰაუსვაილერს".

სხვებთან ერთად, სამხრეთ-დასავლეთ ბუნდესლიგაში "ფრაიბურგს" ამირან შავაძემაც (66) მოაგებინა, თუმცა წინა შეხვედრებისგან განსხვავებით, ფრაიბურგელებს ამჯერად იტალიაში გადასული საჩხერელი გივი დავიდოვიც (57) წაეხმარა მოგებაში.

შავაძემ გერმანელი პატრიკ კოლი გაანადგურა - 15:0, დავიდოვმა კი იმავე ანგარიშით ასევე მასპინძელი ნიკო მეგერლე დაამარცხა. "ფრაიბურგმა" ამ ტურში უახლოესი მდევარი "ურლოფენი" 17:9 დაამარცხა. სტუმრად უშუალო კონკურენტ "ადელჰაუზენთან" მოჭიდავე "ნეკგარტახი" ევროპისა და მსოფლიოს მედალოსანმა სანდრო ამინაშვილმა (86) მარცხისგან ვერ იხსნა (6:14 წააგო), მაგრამ ჩვენებურმა იმარჯვა პირად პაექრობაში: მიხაელ კაუფმელი 2:0 დაამარცხა.

ბადენ-ვიუტემბერგის რეგიონალლიგაში გუშინ მხოლოდ ჩვენებურთა "გერმანიან სულუგენი" ჭიდაობდა, რომელმაც შინ 22:13 დაამარცხა "ჰაუსენ-ზელი" და, გუშინწინდელის დარად, წყვილად მოიგეს მისმა ქართველმა ლეგიონერებმაც. თუმცა შოთა ღლონტს (57) მეტოქე არ ჰყავდა (ჰაუსენელებს ამ წონაში განაცხადში არავინ ჰყოლიათ), ნოდარ ეგაძემ (130) კი 8:3 მოუგო რუმინელ ადრიან რეკორეანუს.

ჰესენლიგაში ასევე ზედიზედ იგებს გიორგი ბალიაშვილი (71) ჯერ შინ დაამარცხა "ვალდშაფტი" - 19:9, გუშინ კი გასვლაზე 25:9 მოუგო "სეეჰაიმს". ბალიაშვილმა პირველ პაექრობაში ლუკას ბრემს 6:0 მოუგო, მეორეში კი ლუკა ჰუსარი 18:0 დაჯაბნა.

ყოველდღიური სპორტული გაზეთი "ლელო"
730
მკითხველის კომენტარები / 0 /
მსგავსი ამბები
რუბრიკის სხვა სიახლეები