ჭიდაობა. ხინჩეგაშვილისა და პეტრიაშვილის ბრძოლები საუკეთესოდ დაასახელეს

მსოფლიოს ჭიდაობის გაერთიანებულმა ფედერაციამ 2017 წლის სამი საუკეთესო შეხვედრა დაასახელა. ჩვენდა საამაყოდ, ამ მკაცრად გაცხრილულ სიაში ორი "ქართული" პაექრობა შევიდა:

ევროპის ჩემპიონატის ფინალში ვლადიმერ ხინჩეგაშვილის (61) გამარჯვება რუსთა ჩეჩენ ახმედ ჩაკაევთან და მსოფლიოს პირველობის ფინალი, რომელშიც გენო პეტრიაშვილმა უკვე მეორედ (და იმედია, საბოლოოდაც) დაამხო თურქთა ოლიმპიური, მსოფლიოს ორგზის და ევროპის რამდენიმეგზის ჩემპიონ ტაჰა აკგიულის ჰეგემონია.

ჭიდაობის მოყვარულთ შეხსენებაც არ გინდათ, რომ ხინჩეგაშვილმა ჩაკაევს ევროფინალში მეორე პერიოდში 0:4 ამოუქაჩა და მართლაც ულამაზესი შეხვედრა აჩუქა მსოფლიოს საჭიდაო სამყაროს.

ეს შეხვედრა საუკეთესოდ თუ დაასახელეს, უმეტესად, სწორედ ჩვენებურის კარგი ჭიდაობის გამო, თუმცა ნურც ჩეჩენს დავუკარგავთ პირველ პერიოდში გაკეთებულ შესანიშნავ ოთხქულიანს.

ოღონდ ვეჭვობთ, რომ არა ხინჩეგაშვილის კარგი ჭიდაობა მეორე პერიოდში, მხოლოდ იმ ერთი ილეთისთვის დაესახელებინოთ საუკეთესოდ.

პეტრიაშვილმა ტაჰას შარშანწინაც მოუგო ევროპის ჩემპიონატის ფინალში, თუმცა მაშინ თურქის მარცხი მისი ავადმყოფობით აიხსნა, მსოფლიოზე კი გენომ ყველა კითხვის ნიშანი მოხსნა.

უვვ-მ მესამე შეხვედრად მსოფლიოს ჩემპიონატის კიდევ ერთი ფინალი გამოარჩია 97 კილოგრამში ოლიმპიურ ჩემპიონთა - ამერიკელი კაილ სნაიდერის და რუსთა დაღესტნელ აბდულრაშიდ სადულაევის მონაწილეობით, რომელშიც ამერიკელმა იმარჯვა.

ყოველდღიური სპორტული გაზეთი "ლელო"
1663
მკითხველის კომენტარები / 0 /
მსგავსი ამბები
რუბრიკის სხვა სიახლეები
;