[ჭიდაობა] 9 დეკემბრიდან, ბათუმში...

ლაშა გობაძე წონას შეიცვლის


9-13 დეკემბერს ბათუმის ახალი სპორტის სასახლე ორივე საჭიდაო სტილში საქართველოს თასს უმასპინძლებს, რომელიც, არსებითად, საქართველოს ჩემპიონატია. ყოველ შემთხვევაში, საქართველოს ჩემპიონატი არ ტარდება, ხოლო ეს თასი მთავარი შესარჩევი შეჯიბრებაა ევროპის ჩემპიონატისთვის, რომელიც წლეულს უჩვეულოდ ადრე - 10-16 თებერვალს რომში ჩატარდება.

აქედან გამომდინარე, საქართველოს თასისადმი ინტერესი დიდია. მით უფრო, რომ გაისად ტოკიოს ოლიმპიადის სალიცენზიო შეჯიბრებებიც იმართება და აქ გამარჯვება იმ შეჯიბრებებზე მოსახვედრად დიდი განაცხადია. ამიტომ ზოგიერთ წონაში საკადრო გადაადგილებებიცაა მოსალოდნელი, ანუ არაოლიმპიური წონების ლიდერები ან თუნდაც მეორე-მესამე ნომრები ოლიმპიურ წონებში ცდიან ძალებს. ჯერჯერობით დადასტურებულად მხოლოდ ერთი ასეთი გადაადგილება შეგვიძლია გითხრათ - ბერძნულ-რომაულ ჭიდაობაში მსოფლიოს მოქმედი ჩემპიონი, აჭარის ნაკრების წევრი ლაშა გობაძე (82) 87 კილოგრამში იჭიდავებს, რადგან ეს ოლიმპიური წონაა, 82 კი - არა. სხვა წონებთან მიმართებაშიც არის მსგავსი ხმები, თუმცა ჯერ დადასტურებულად ვერაფერს გეტყვით, რადგან ასეთ საკითხთა გადაწყვეტა ნაკრებების მწვრთნელებმა თავად სპორტსმენებსა და პირად მწვრთნელებს მიანდეს. ამიტომ ასეთი გადაადგილებების შესახებ დაზუსტებით მხოლოდ წილისწყრის ჩატარების შემდეგ გვეცოდინება.

სამწუხაროდ, საქართველოს თასი დანაკლისების გარეშე არ ჩაივლის, თუმცა ამის მიზეზი დიდწილად ტრავმებია. სწორედ ამის გამო ტურნირში არ იჭიდავებს ახალგაზრდებში მსოფლიოს ორი ჩემპიონი - გიორგი მელია (97) და ზვიად პატარიძე (130), თუმცა მთავარი დანაკლისი მაინც თავისუფალ ჭიდაობაში მსოფლიოს სამგზის და ევროპის ჩემპიონის, ოლიმპიურ პრიზიორ გენო პეტრიაშვილის (125) არყოფნაა. ტრავმის გამო არ იჭიდავებს „თავისუფალთა“ ნაკრების კიდევ ერთი მსოფლიოს ჩემპიონი ზურაბ იაკობიშვილი (70).

მელიამ და პატარიძემ ხელის ტრავმები რამდენიმე კვირის წინ, 23-წლიანთა მსოფლიოს ჩემპიონატზე მიიღეს. ჭიდაობის ქომაგთ ემახსოვრებათ, რომ მაშინ პატარიძემ ფინალში ვერც იჭიდავა, მელია ლეიბზე კი გავიდა, მაგრამ საკუთარ თავს არ ჰგავდა. იაკობიშვილს კუნთი ჰქონია გაწყვეტილი, პეტრიაშვილი კი ასევე ხელის ტრავმას უჩივის. მას წინა უქმეებზე მოსკოვშიც უნდა ეჭიდავა „ალროსას თასზე“, სადაც პერსონალურად იყო მიწვეული, მაგრამ ვერ წავიდა და მის ნაცვლად ელიზბარ ოდიკაძემ იჭიდავა.

საქართველოს თასიდან გათავისუფლებულნი არიან ის სპორტსმენები, რომლებმაც უკვე მოიპოვეს ტოკიოს ოლიმპიადის ლიცენზიები, თუმცა მათი ნაწილი მაინც იჭიდავებს. ტურნირიდან გათავისუფლებულნი არიან ოდიკაძე და მისი თანაგუნდელი, მსოფლიოს წლევანდელი ჩემპიონი ბექა ლომთაძე (61) - ეს დუეტი 7-8 დეკემბერს ვლადიკავკაზში საერთაშორისო ტურნირ „ალანებში“ გამოვა. საქართველოს თასისგან თავისუფალი სტილით მოჭიდავეთაგან გათავისუფლებული სხვა არავინაა და ქვეყნის ყველა წამყვანი სპორტსმენი იჭიდავებს ოლიმპიური და მსოფლიოს ჩემპიონის, ევროპის სამგზის გამარჯვებულ ვლადიმერ ხინჩეგაშვილის (65) წინამძღოლობით.

სამწუხაროდ, ბერძნულ-რომაული სტილით მოჭიდავეთა ნაკრები კვლავაც რჩება „გასამხედროებულ“ ფენომენად და მათ  ხელმძღვანელობასთან კონტაქტი ჭირს. ამიტომ მათზე დაზუსტებით ბევრს ვერ გეტყვით. ერთადერთი, იმის თქმა შეგვიძლია, რომ იჭიდავებს ოლიმპიური პრიზიორი, მეორე ევროპული თამაშების ფინალისტი შმაგი ბოლქვაძე, ვინც ამჯერად არაოლიმპიურ წონაში - 72 კილოგრამში გამოვა. ჩვენი ინფორმაციით, ჭიდაობს მეორე ევროპული თამაშების ჩემპიონი და მსოფლიოს მედალოსანი იაკობ ქაჯაია (130), ხოლო არ გამოდის მათი მსოფლიოს ჩემპიონი ნუგზარ წურწუმია, რომელიც ასევე არაოლიმპიურ წონაში - 55 კილოგრამში ჭიდაობს. სავარაუდოდ, მას საევროპოდ ნაკრებში განაღდებული აქვს ადგილი და ახლა ამიტომ ასვენებენ. თუმცა, აქაც აჯობებს, დაველოდოთ საქართველოს თასის წილისყრას - ყველა საკადრო დილემას ის გასცემს პასუხს, მანამდე კი გაგაცნობთ შეჯიბრების განრიგს.

საქართველოს თასზე ჯერ თავისუფალი სტილით მოჭიდავეები იასპარეზებენ. ბუნებრივია, შეჯიბრება ორდღიანი ფორმატით ჩატარდება ანუ პირველ დღეს გაიმართება წინასწარი შეხევდრები, მეორე დღეს კი - ფინალური ბლოკი. 9 დეკემბერს მათგან 57, 65, 74, 86 და 97 კილოგრამების წარმომადგენლები იჭიდავებენ, 10-ში - 61, 70, 79, 92 და 125 კილოგრამები. 11 დეკემბერს ტურნირში უკვე ბერძენ-რომაელები ჩაებმებიან - მათგან წინასწარი ეტაპის შეხვედრები 55, 63, 72, 82 და 97 კილოგრამებში ჩატარდება. 12-ში დანარჩენი ხუთი წონის - 60, 67, 77, 87 და 130 კილოგრამების წარმომადგენლები იჭიდავებენ და სწორედ ისინი დაასრულებენ შეჯიბრებას 13 დეკემბერს ფინალური ბლოკით.

424
მკითხველის კომენტარები / 0 /
მსგავსი ამბები
რუბრიკის სხვა სიახლეები
;