[ჭიდაობა. I დღის ანალიზი+VIDEO] მედალი გავინაღდეთ, იქნება ოქრო?

რომში დაიწყო ევროპის ჩემპიონატი ბერძნულ-რომაულ ჭიდაობაში, რომელშიც ჯერ მხოლოდ ხუთი წონის წარმომადგენლები ჩაებნენ, ჩვენებმა კი ორი მედლისთვის ბრძოლის უფლება მოიპოვეს: ფინალში გავიდა მცხეთელი ევროპის ბრინჯაოს მედალოსანი ლევან არაბული (130), ხოლო მსოფლიოს მექმედი ჩემპიონი, ხობელი ნუგზარ წურწუმია (55) ნახევარფინალში რუს ვიტალი კაბალოევთან დამარცხდა და დღეს საღამოს ბრინჯაოს მედლისთვის იჭიდავებს. შეჯიბრებას უკვე გამოეთიშნენ გარდაბნელები - დემურ ქავთარაძე (77), თორნიკე ძამაშვილი (87) და ოზურგეთელი ევროპის კიდევ ერთი მესამე პრიზიორი ლევან ქავჟარაძე (63).

არაბული გუშინ დამაჯერებელი იყო - სამი შეხვედრა გამართა და ყველა წმინდად მოიგო. თანაც, ერთნაირი ანგარიშით - 9:0. თავდაპირველად ასეთი სხვაობით მასპინძელი ელ მაჰდი როკარო დაამარცხა, მეოთხედფინალში გერმანელი ჯელო კრამერი დაჯაბნა, ნახევარფინალში კი ყველაზე სწრაფად იმარჯვა - 2 წუთში აჯობა ფინელ არვი მარტინ სავოლაინენს.

არაბულმა ფინელთან პაექრობაც აქტიურად დაიწყო, რისთვისაც ცოტა ხანში ერთი ქულა მიიღო, ფინელი კი მისი მოთხოვნით ჩოქბჯენში ჩააყენეს. აი, იქ მიიტანა გადამწყვეტი შეტევა მეტოქეზე და ფინალის საგზურიც სულ რაღაც 2 წუთში მოიპოვა: პირველივე ჯერზე ხელში აიტაცა და დგომიდან 4-ქულიანზე გადააგდო, თუმცა შეტევა გააგრძელა და მერე დაბლიდანაც დაატრიალა. რატომღაც ეს ეპიზოდი მსაჯებმა არ შეაფასეს - გარედან შესრულდაო, მაგრამ ჩვენებმა გააპროტესტეს და ვიდეოგანხილვის შემდეგ კუთვნილი ორი ქულაც დაიბრუნეს: 7:0. ფინელი ისევ ჩააყენეს ჩოქბჯენში, არაბულმა კი კვლავ იოლად დაატრიალა და წმინდად, 9:0 მოიგო. ფინალში მისი მეტოქე რუმინელთა ევროპისა და მსოფლიოს ბრინჯაოს პრიზიორი ალინ ალექსუს კურარიუ იქნება. მოვლენების წინ გასწრება არ გვინდა, მაგრამ რასაც გუშინ ვუყურეთ, უფრო მოძრავსა და ტექნიკურ არაბულს, ვინც ჩოქბჯენიდან კარგად ატრიალებს მეტოქეებს, არ უნდა გაუჭირდეთ სქელი და მოუქნელი რუმინელის ძლევა. რაც მთავარია, ტურნირს უკვე გამოეთიშა თურქთა უძლიერესი ფალავანი რიზა კაიაალპი. ასევე დამარცხდნენ რუსთა ზურაბ გედეხაური და აზერბაიჯანელი საბაჰ შარიათი.

წურწუმიამ ჩემპიონატი ძალზე აქტიურად დაიწყო და პირველ პაექრობაში 8:0 გაანადგურა ავსტრიელი სარგის გევორგიზიანი. მას ამ მოგებისთვის ჩოქბჯენში მეტოქის ერთი ჩაყვანა ეყო, იქ კი ზედიზედ სამჯერ დაატრიალა და წმინდა მოგებაც გაინაღდა. მორიგი ქარიშხალი მოლდოველ არტიუმ დელანეს დაატყდა თავს - ისევ 8:0 წურწუმიას სასარგებლოდ და ნახევარფინალის საგზური, სადაც რუს ვიტალი კაბალოევთან 2:5 დამარცხდა.

წურწუმია კაბალოევთან შეხვედრაში პასიურობისთვის გააფრთხილეს, ქულითაც დასაჯეს და ჩოქბჯენშიც დააყენეს, თუმცა იქ თავი კარგად დაიცვა და რუსს დატრიალების საშუალება არ მისცა. მან ერთქულიანი ჩამორჩენა პირველივე პერიოდში არათუ გაქვითა, არამედ წინაც გავიდა, როცა მეტოქე ორჯერ გაიყვანა წრიდან. მეორე პერიოდი რუსმა შეტევებში გაატარა და მსაჯებმაც არ გააფრთხილეს, რითაც წურწუმიას მისი ჩოქბჯენში ჩაყენების საშუალება მიეცემოდა, ეს კი კარგი შანსი იქნებოდა. სამწუხაროდ, შეტევებში მან ქულა ვერ მოიპოვა. პირიქით, ერ\თ მომენტში პოზიციურ ბრძოლაში, ორმხრივ ჯაჯგურში ლეიბზე ჩავარდა და რუსმა ზურგიდან მოვლით ორი ქულა მიითვალა, მანამდე კი კიდევ ერთი აართვა და 5:2 დაწინაურდა. თუმცა მანამდე იყო შემთხვევა, როცა წურწუმია კარგად შეეკრა და დგომიდან გადააგდო, მაგრამ არბიტრმა გდება არ ჩათვალა - ფეხზე ხელის კონტაქტი ანიშნა, რაც ნამდვილად არ იყო საფუძვლიანი. ასე დასანანად წააგო წურწუმიამ ნახევარფინალი მეტოქესთან, ვისაც შარშან მსოფლიოს ჩემპიონატზე იმავე ეტაპზე აჯობა. დღეს ბრინჯაოსთვის შეხვედრაში მისი მეტოქე რუმინელ ფლორიან ტიტასა და თურქ დოგუზ აიაზჯის შორის მოგებული იქნება.

ევროპის პრიზიორმა ქავჟარაძემ პირველ შეხვედრაში სომეხი საჰაკ ჰოვანისიანი წმინდად დაამარცხა - 8:0, მაგრამ მერე ნორვეგიელთა მსოფლიოსა და ოლიმპიურ პრიზიორთან, ევროპის ვიცე-ჩემპიონ სტიგ-ანდრე ბერგესთან 2:7 წააგო და საბოლოოდ სანუგეშოში ვერ გადავიდა, რადგან ნორვეგიელი ნახევარფინალში დამარცხდა.

ქავთარაძე პირველივე წრეში რუს ისლამ ოპიევთან 1:3 დამარცხდა და გამოვარდა, რაკიღა რუსმაც ფინალამდე წააგო.

ძამაშვილმა პირველ ორთაბრძოლაში ერთი სპორტული გმირობა კი გვაჩვენა, მაგრამ შორს მაინც ვერ წავიდა: სომეხთა მსოფლიოსა და ევროპის ჩემპიონ მაქსიმ მანუკიანს ასევე 3:1 სძლია. სამაგიეროდ, რუს ალექსანდრ კომაროვთან ვერაფერს გახდა და 2:6 დამარცხდა. დამამშვიდებელში გადასვლის შანსი არც მას მიეცა, რადგან კომაროვმა ნახევარფინალში წააგო.


დღეს იჭიდავებენ


დღეს წინასწარი ეტაპის პაექრობებს 60, 67, 72, 82 და 97 კილოგრამების წარმომადგენლები გამართავენ. ბათუმელი ამირან შავაძე (60) საკვალიფიკაციოში შვეიცარიელ დიმიტარ სანდოვს დაეჭიდება, მოგების შემთხვევაში კი მეტოქედ ფინელ ჯუუსო ალექსი ლატვალასა და უნგრელ კრისტიან კესკემენტს შორის მოგებული ეყოლება. შავაძეც საკმაოდ ძნელ ჯგუფშია: რუსი ჟამბოლატ ლოკიაევი, ბელარუსი იაჰორ ბელიაკი, ახალგაზრდებში თურქთა მსოფლიოს რამდენიმეგზის ჩემპიონი კარემ კამალი და უკრაინელი ჟორა აბოვიანიც მის მხარეს არიან.

ლანჩხუთელი გიორგი შოთაძე (67) ასევე საკვალიფიკაციო ეტაპზე გერმანელ ვიტალის ლაზოვსკის შეხვდება, მოგების შემთხვევაში კი სომეხ ევროპის პრიზიორ კარენ ასლანიანს ან შვედ ოსკარ სიმონ ერლანდსონს შორის უძლიერესს გაეჯიბრება. შოთაძეც ძლიერ ჯგუფშია: რუსი ნაზირ აბდულაევი, აზერბაიჯანელი ისლამბეკ დადოვი, უნგრელი კრისტიან ვანჟა და ხორვატი ვიქტორ ნემესი მის მხარეს არიან.

საკვალიფიკაციოში გამართავენ პირველ ორთაბრძოლებს ოზურგეთელი იური ლომაძე (72) და ხულოელი ლაშა გობაძეც (82). წილისყრამ არც ლომაძეს გაუმართლა, ვისაც მეტოქედ სერბთა ოლიმპიური და მსოფლიოს ჩემპიონი დავორ სტეფანეკი ერგო. ვნახოთ, ილეთების კასკადით დაახვევს თუ ვერა თავბრუს ჩვენებური მასაც, რაც ბევრისთვის გაუკეთებია. ამას თუ შეძლებს, მერე ბელარუს იური კანკოუს ან ბოსნიელ არგონ სადიკაის გაეჯიბრება. ლომაძეს მეოთხედფინალის სავარაუდო მეტოქეთა შორის სომეხი მალკაზ ამოიანიც ჰყავს, ახალგაზრდებში ევროპისა და მსოფლიოს ჩემპიონი.

გობაძე თავიდან ბელარუს სტანისლაუ შაფარენკას ხვდება, ხოლო თუ მოუგებს, მომდევნო მეტოქედ 23-წლიანებში თურქ მსოფლიოს ჩემპიონ ბურჰან აკბუდაკსა და პოლონელ მათეუშ ვოლნის შორის მოგებული ეყოლება. ბადის ამავე მხარესაა ასაკობრივ ნაკრებებში ევროპის ჩემპიონი და მსოფლიოს პრიზიორი, უნგრელი ტამაშ ლევაი.

ჩვენი ხუთეულიდან აბაშელი მსოფლიოს ბრინჯაოს მედალოსანი რევაზ ნადარეიშვილი (97) ერთადერთია, ვინც ხვალ მერვედფინალიდან ჩაებმება ასპარეზობაში. იქ ლიეტუველ ვილიუს ლაურინაიტისს შეხვდება, ხოლო შემდეგ ეტაპზე გასვლის შემთხვევაში ფინელ მატტი ელიას კუსმანენს ან უკრაინელ ოლექსანდრ შიშმანს დაეჭიდება. თუმცა იოლი წილისყრა არც ნადარეიშვილს შეხვდა: მეოთხედფინალის მეტოქეთა შორის ყველაფრის მომგები სომეხი არტურ ალექსანიანი და თურქთა ოლიმპიური მედალოსანი, მსოფლიოს შარშანდელი მესამე პრიზიორი ჯენკ ილდემიც ჰყავს, რომლებიც პირველ წრეში ერთმანეთს ხვდებიან.

1955
მკითხველის კომენტარები / 0 /
მსგავსი ამბები
რუბრიკის სხვა სიახლეები
;