ხელბურთელ ვაჟთა საქართველოს თასის გათამაშება: ფინალში: ბათუმი და ქუთაისი 

გლდანში, ჯემალ ცერცვაძის სახელობის ხელბურთის აკადემიის დარბაზში, გუშინ ხელბურთელ ვაჟთა საქართველოს თასის გათამაშების ნახევარფინალური შეხვედრები გაიმართა.

ერთმანეთს წინა ეროვნული ჩემპიონატის გამარჯვებული ბათუმის „შავი ზღვის ბიჭები“, პრიზიორები - თბილისის „პეგასი“, თელავის „იმედი“-სტუ და მეოთხეადგილოსანი „ქუთაისი“ დაუპირისპირდნენ. 

მეტოქეთა ორთაბრძოლებმა დაგვარწმუნა, რომ ახალი სეზონისთვის უკეთ დაკომპლექტებული და მომზადებული ბათუმისა და ქუთაისის გუნდებია, რომლებსაც ფინალში გასვლა არ გასჭირვებია. 

თელავის „იმედმა“ ზღვისპირელებს სათანადო წინააღმდეგობა მხოლოდ მატჩის დასაწყისში გაუწია, როცა რევაზ დიდიას ზედიზედ სამმა სწრაფმა გარღვევამ თელაველები ერთადერთხელ დააწინაურა (5:4). ამის შემდეგ „შავი ზღვის ბიჭებმა“ ხელთ იგდო ინიციატივა და მდგომარეობა ტაიმის ბოლომდე გამოასწორა - შესვენებამდე 15:10 გავიდა წინ. შეხვედრის მეორე ნახევარში მოედნის ბატონ-პატრონები ბათუმელები იყვნენ და ერთ მომენტში 15 ბურთითაც დაწინაურდნენ (27:12). მატჩის მიწურულს მწვრთნელებმა ახალწვეულებიც გამოსცადეს. მართალია, მათ ჯერ კიდევ აკლდათ შეთამაშება, მაგრამ ზღვისპირელებმა შეხვედრა მაინც მოიგეს, თანაც 13-ბურთიანი სხვაობით. 

„ქუთაისმა“ საქართველოს თასის მფლობელ „პეგასთან“ შარშან მსგავსი ტურნირის მეოთხედფინალში წააგო და ეროვნული ჩემპიონატის ნახევარფინალიც, ამიტომ წლეულს ქუთაისელები სარევანშოდ იყვნენ განწყობილი და ამ შემართებით გავიდნენ მოედანზე. უპირატესობას მატჩის პირველი წუთებიდანვე დაეუფლნენ და შესვენებამდე 6 ბურთით (20:14) დაწინაურდნენ. მეორე ტაიმში რიონისპირელებს შეხვედრის სადავეები ხელიდან არ გაუშვიათ, წინა ოცდაათწუთიან მონაგარს კიდევ 21 ბურთი წაამატეს და საბოლოოდ დამაჯერებლადაც გაიმარჯვეს. 

როგორც ორთაბრძოლებმა გვიჩვენა, „შავი ზღვის ბიჭებს“, სხვა გუნდებთან შედარებით, უფრო დალაგებული გუნდი ჰყავს, ქუთაისელები კი გრძელი სათადარიგოთა სკამითა და სწრაფი შეტევებით გამოირჩევიან. „ბათუმისა“ და „ქუთაისის“ ბოლოდროინდელი შეხვედრებიდან ყველაზე დრამატული საქართველოს ჩემპიონობისთვის 2018 წლის პაექრობა იყო, რომელიც ბათუმელებმა შვიდმეტრიანების სერიით მოიგეს. ვფიქრობთ, დღეს ფინალში, ასევე, უმძაფრესი დაპირისპირებაა მოსალოდნელი. 

ბათუმი-სტუ 34:21
ბათუმი: ტორონჯაძე, ვარშალომიძე, აბრამიშვილი - 7, გოგოლაძე - 6, მსხვილიძე - 5, ტიელიძე - 5, გიორგაძე - 3. ტალახაძე - 2, სიმონია - 2, თურმანიძე - 2, ბერძენიშვილი - 1, სტოლბოვი - 1, წივწივაძე, კაკულია, მჟავანაძე. 

სტუ: ცინცაძე, ხიდეშელი, ერისთავი - 4, დიდია - 3, აბჟანდაძე - 3, გრიშიკაშვილი - 3, ცხვარაშვილი - 3, კორსანტია - 2, დანელიშვილი - 2, გავაშელიშვილი - 1.

პეგასი-ქუთაისი 32:41
პეგასი: დიხამინჯია, გორგოძიანი, ბაძაღუა - 7, კოხრეიძე - 7, ჟვანია - 7, გვაზავა - 4, კუხალაშვილი - 4, პატაშური - 2, ჩეჩელაშვილი - 1, ა. არეშიძე, გ. არეშიძე. 

ქუთაისი: გულეიშვილი, მაისურაძე 1, ხაჟომია - 8, რუსტამოვი - 8, სურმავა - 7, სტურუა - 5, მერკვილაძე - 4, ფერაძე - 2. გამზარდია - 2, ზარნაძე - 1, თევზაძე - 1, ჯუღელი - 1, ლომიძე - 1, კობახიძე, ლ. იმნაძე. 

დღეს საქართველოს თასზე „ბათუმისა“ და „ქუთაისი“ შეხვედრა 15.00 საათზე დაიწყება.

ყოველდღიური სპორტული გაზეთი "ლელო"
84
მკითხველის კომენტარები / 0 /
მსგავსი ამბები
რუბრიკის სხვა სიახლეები
;