ხელბურთელ ვაჟთა IHF-ის ერთა მსოფლიოს ჩემპიონატი: საქართველო 37- 17ირლანდია

თბილისის სპორტის სასახლეში გრძელდება ხელბურთელ ვაჟთა IHF-ის ერთა მსოფლიოს ჩემპიონატი 12 გუნდის მონაწილეობით. გუშინ მესამე ტურის შეხვედრები გაიმართა. საქართველოს ნაკრებმა ზედიზედ მესამე გამარჯვება იზეიმა. 

საქართველო-ირლანდია 37:17
საქართველო: თევზაძე, ცინცაძე - 1, ცხოვრებაძე - 7, გოგოლაძე - 5, მიქავა - 4, არსენაშვილი - 4, ორჯონიკიძე - 3 (4 ჩაჭრა), კბილაშვილი - 3, დიხამინჯია - 3, რუსტამოვი - 2, კალანდაძე - 2 (7 პასი), ჩიქოვანი - 1, ჭანტურია - 1. 
ირლანდია: ბონაგვიდი, შ. ორეილი, თილი - 4, ვანდუივენვორდე - 4, თომპსონი - 4, კულეში - 1, ქ. ორეილი - 1, ჯ. კრონ-გრეისი - 1, თ. კრონ-გრეისი - 1, გეგანი - 1, დარსი, ბაუერი. 

მსაჯები: იოვანდიჩი, სეკულიჩი (სერბეთი). 

საქართველოს ნაკრების მთავარმა მწვრთნელმა ნიკოლა მაქსიმოვიჩმა მატჩი ძირითადი შვიდეულით დაიწყო. ამის მიუხედავად, პაექრობა სტუმრების იერიშებით დაიწყო და ანგარიშიც მათ გახსნეს.

მთელი 10 წუთის განმავლობაში მოედანზე თანაბარი ორთაბრძოლა იყო, რაზეც ანგარიშიც მიუთითებს - 4:4. შოთა თევზაძემ, რომელიც მატჩის შემდეგ მასპინძელთაგან საუკეთესოდ დასახელდა, რეგულარულად დაიწყო მეტოქის დარტყმების მოგერიება და საქართველოს ნაკრები ნელ-ნელა დაწინაურდა.

ერთ პერიოდში რეზო ჭანტურიას ტრავმას მოთამაშეთა გაწევ-გამოწევა, მსაჯთან კამათი და საკმაოდ ბევრი გაძევება მოჰყვა. ყოველივეს მიუხედავად, ჩვენებმა პირველი ტაიმი თერთმეტბურთიანი სხვაობით მოიგეს - 18:7. 

შესვენების შემდეგ მწვრთნელებმა მეტი სათამაშო დრო მეორე შვიდეულს დაუთმეს და ბიჭებმაც პაექრობა ლოგიკურ დასასრულამდე მიიყვანეს. ტრავმირებული ჭანტურია ირაკლი გოგოლაძემ შეცვალა და სანაქებოდაც ითამაშა. ასევე, ზურაბ ცინცაძე შესანიშნავად ჩაენაცვლა შოთა თევზაძეს და გოლიც გაიტანა.

საბოლოოდ ჩვენმა გუნდმა 20-ბურთიანი სხვაობით გაიმარჯვა - 37:17. ამ წარმატებას ხელი შეუწყო დარბაზში შექმნილმა მხიარულმა ატმოსფერომ - ქართული სპორტის ქომაგებმა, ხელბურთის ფანკლუბმა, საქართველოს სხვადასხვა ასაკობრივი გუნდების წევრებმა, ირლანდიელ ქომაგთა ხმაურიანმა ჯგუფმა და მოედანზე მებრძოლმა ორივე გუნდმა ერთობლივი ძალისხმევით ნამდვილი საზეიმო სანახაობა შექმნეს...

მატჩის საუკეთესო მოთამაშეებად ქართველთაგან, როგორც აღვნიშნეთ, მეკარე შოთა თევზაძე, ირლანდიელთაგან კი ნარჯვენა თავდამსხმელი ვანდუივენორდ ბლეიქი დაასახელეს. 

საქართველოს ნაკრებმა სამივე შეხვედრა მოიგო, მაგრამ ნახევარფინალი ჯერ არ გაუნაღდებია - ხვალ და ზეგ უფრო ძლიერი მეტოქეები ეყოლება - აშშ და ბულგარეთი. ხვალ ამერიკელებს ვეთამაშებით, რომლებიც გუშინ სამი ხელბურთელით გაძლიერდნენ - ოკეანისგაღმელებს თბილისში მოგვიანებით ჩამოფრენილი, გერმანიის მეორე ბუნდესლიგის მოთამაშები: ძმები - უეტერები და პოლ სკუპურა დაემატათ. A ჯგუფში მთავარი ფავორიტი კუბაა, რომელმაც, საქართველოს და ბულგარეთის მსგავსად, სამივე ორთაბრძოლა მოიგო. 

დღეს ჩემპიონატის მონაწილეები დაისვენებენ. ჯგუფური ეტაპი 13 ივნისს დასრულდება. 15 და 16 ივნისს პლეიოფია. ჩემპიონობის გარდა, შეჯიბრებაში მონაწილე 6 ევროპულ გუნდს ცალკე ანგარიში აქვს: მათ შორის საუკეთესო შედეგის მქონე ევროპის 2022 წლის ჩემპიონატის მეორე საკვალიფიკაციო რაუნდში იასპარეზებს. 

ვანდუივენორდ ბლეიქი: დღეს სათამაშოდ დაუძაბავად გავედით, რადგან ვიცოდით, რომ რომ საქართველო ძლიერი მოწინააღმდეგე იყო, რომელიც პირველივე ტურიდან ყველა შეხვედრას იგებს და გათამაშების ცხრილში ლიდერობს. შევეცადეთ მეტოქის სწრაფი შეტევები შეგვენელებინა და დრო მოგვეგო. სამწუხაროდ, მასპინძლებმა მაინც აგვიყოლიეს ტემპში და სწრაფ თამაშში ბურთს ხშირად ვკარგავდით. საქართველოს ნაკრები ყველა შეტევას წარმატებით აგვირგვინებდა. გასაკვირიც არ არის, რადგან ის მთელი ტურნირის განმავლობაში ფანტასტიკურად თამაშობს.

საბოლოოდ მაინც თავაწეულებმა დავასრულეთ მატჩი - საპასუხო გოლებიც გავიტანეთ და შემიძლია ვთქვა, რომ ძალიან კარგ ორთაბრძოლაში მივიღეთ მონაწილეობა.

ბექა ორჯონიკიძე, საქართველოს ნაკრების მწვრთნელი: შეხვედრის დასაწყისში რამდენიმე შეცდომა დავუშვით და ამიტომ სტარტი დაძაბული გამოდგა. შემდეგ მეკარემ და დაცვამ კარგად ითამაშეს - მწვრთნელების ყველა დავალება შეასრულეს, შედეგიც თვალსაჩინოა.

მატჩის მეორე ნახევარში ყველა ხელბურთელს მივეცით თავის გამოჩენის საშუალება. მეკარემაც კი გაიტანა გოლი. ირლანდიასთან პაექრობამ დაგვარწმუნა, რომ ჩვენი გუნდი დღითი დღე აუმჯობესებს თამაშის ხარისხს. ჯგუფში ორი ძალიან მნიშვნელოვანი პაექრობა დაგვრჩა. ქომაგების აქტიური მხარდაჭერით, იმედია, ამ ბარიერებსაც წარმატებით დავძლევთ. 

10 ივნისი

A ჯგუფი. აზერბაიჯანი - ბრიტანეთი 35:36, კოლუმბია - კუბა 24:31, ინდოეთი - ჩინეთი 29:40
თ მ ფ წ ბ ქ
კუბა 3 3 0 0 96:75 6
ჩინეთი 3 2 0 1 92:84 4
ბრიტანეთი 3 2 0 1 101:98 4
აზერბაიჯანი 3 1 0 2 110:100 2
კოლუმბია 3 1 0 2 84:89 2
ინდოეთი 3 0 0 3 86:123 0

B ჯგუფი. აშშ - მალტა 44:10, საქართველო - ირლანდია 37:17, ნიგერია - ბულგარეთი 19:27

თ მ ფ წ ბ ქ
საქართველო 3 3 0 0 103:44 6
ბულგარეთი 3 3 0 0 103:67 6
აშშ 3 2 0 1 116:80 4
ნიგერია 3 0 1 2 64:85 1
ირლანდია 3 0 1 2 80:105 1
მალტა 3 0 0 3 36:121 0

12 ივნისი. 10:00. აზერბაიჯანი - კუბა, 12:00. ბრიტანეთი - ჩინეთი, 14:00. კოლუმბია - ინდოეთი, 16:00. ირლანდია - ბულგარეთი, 18:00. საქართველო - აშშ, 20:00. მალტა - ნიგერია

ყოველდღიური სპორტული გაზეთი "ლელო"
449
მკითხველის კომენტარები / 0 /
მსგავსი ამბები
რუბრიკის სხვა სიახლეები
;