ხელბურთი. ევრო 2022-ის ბრძოლა 2019-ში დაიწყება

ხელბურთელ ვაჟთა ევროპის 2022 წლის ჩემპიონატამდე, რომლის ფინალურ ეტაპს იმავე წლის 14-30 იანვარს უნგრეთი და სლოვაკეთი უმასპინძლებენ, ცხადია, ჯერ კიდევ შორია, მაგრამ გადამწყვეტი რაუნდის საგზურებისთვის ბრძოლას ეროვნული ნაკრები გუნდები სამიოდე თვეში დაიწყებენ, რადგან 24 საუკეთესო გუნდის გამოსავლენად ძალიან დიდი გზაა გასავლელი.

გაისად 4-6 ან 11-13 იანვარს პირველი საკვალიფიკაციო რაუნდი გაიმართება. საქართველოს ნაკრები შეჯიბრებაში კიდევ შვიდ გუნდთან ერთად სწორედ ამ ეტაპიდან ჩაებმება. ევროპის ხელბურთის ფედერაციამ მოასპარეზენი წილისყრით ორ ჯგუფში გადაანაწილა:

A ჯგუფი: ლუქსემბურგი, ბრიტანეთი, ირლანდია, ბულგარეთი
B ჯგუფი: კვიპროსი, საქართველო, აზერბაიჯანი, მალტა

პაექრობები ერთ წრედ გაიმართება. ტურნირის მასპინძლობის პრიორიტეტი აქვს მალტას, შემდეგ - აზერბაიჯანს, საქართველოს და კვიპროსს. ამ ორი ჯგუფის გამარჯვებულები მეორე ეტაპზე პლეი ოფში გავლენ, დანარჩენები კი ითამაშებენ EHF-ის განვითარებადი ქვეყნების ჩემპიონატში, რომლის მოგებულიც, ასევე, მიიღებს პლეი ოფის საგზურს.

ეს სამი გუნდი შინ და სტუმრად შეხვდება ევრო 2020-ის მთავარ საკვალიფიკაციო რაუნდში სამი უარესი შედეგის მქონე ნაკრებს, რომლებიც წლეულს 24 ოქტომბრიდან 2019 წლის ივნისის ჩათვლით გამართულ ტურნირში გამოვლინდება. ამ ექვსეულის ორთაბრძოლებში 3 გამარჯვებული კონტინენტის გრანდებთან ერთად ევრო 2022-ის მთავარ საკვალიფიკაციო რაუნდში თამაშის უფლებას მოიპოვებს. ეს შეჯიბრება კი 2020 წლის ოქტომბერში დაიწყება და 2021 წლის აპრილში დასრულდება.

"სისტემა, როგორც ხედავთ, საკმაოდ რთულია, - გვითხრა საქართველოს ხელბურთის ფედერაციის პრეზიდენტმა ზურაბ კაკაბაძემ. - მთავარ საკვალიფიკაციო რაუნდში სულ 32 ადგილია. საქართველოს ნაკრების მიზანია, წარმატებით გაიაროს პირველი საკვალიფიკაციო ეტაპი, პლეი ოფი, მთავარ კვალიფიკაციაში ევროპის საუკეთესო გუნდებს ეთამაშოს და 2022 წლის ევროპის ჩემპიონატის ფინალური ეტაპის საგზურისთვის იბრძოლოს".

ყოველდღიური სპორტული გაზეთი "ლელო"
631
მკითხველის კომენტარები / 0 /
მსგავსი ამბები
რუბრიკის სხვა სიახლეები
;