ხელბურთი. ლეგიონი: რვა ქართველი ევროპაში

წლევანდელი სახელბურთო საკლუბო სეზონი ევროპაში 8 ქართველმა დაიწყო - ჩვენი სპორტსმენები რუმინეთის, მაკედონიის, საბერძნეთის, თურქეთისა და ლუქსემბურგის ჩემპიონატებში ასპარეზობენ.

რუმინეთის ეროვნულ ლიგაში საქართველოს ნაკრების ორი მოთამაშეა. შოთა თევზაძე კლუბ "ფოჩანის" კარის დარაჯია. ამას წინათ მან დიდი წვლილი შეიტანა რუმინული გრანდის - "კონსტანცას" დამარცხებაში (21:19) და ტურის საუკეთესო მოთამაშეთა შვიდეულში შეიყვანეს.

ასეთი პატივი მე-7 ტურში ერგო "დუნარეა კელერაშის" უკანახაზელ ირაკლი ჩიქოვანს, რომელმაც "ფეგერაშს" 8 ბურთი გაუტანა, მისმა კლუბმა 26:22 გაიმარჯვა. ქართველმა ხელბურთელმა, იმის მიუხედავად, რომ ტრავმის გამო საწყისი მატჩები გამოტოვა, უკვე 29 გოლი მიითვალა.

ტრავმით გამოწვეული ორწლიანი შესვენების შემდეგ ხელბურთს დაუბრუნდა ვლადიმერ რუსია. 2015 წელს მან შოთა თევზაძესთან ერთად რუმინული "ოდორჰეის" შემადგენლობაში ევროპული ჩელენჯკაპი მოიგო. ახლა ამავე ტურნირზე ლუქსემბურგის "რედ ბოიზ დიფერდანჟის" ღირსებას იცავს. მისმა გუნდმა პირველ წრეში ასპარეზობიდან გამოთიშა ლიტვის "კაუნო-აზუოლასი" (32:26, 25:26). მეორეში ბულგარეთის "დობრუჯას" დაუპირისპირდება.

თეიმურაზ ორჯონიკიძემ მაკედონიაში პირველი სეზონი "პრილეპში" გაატარა, ახალი სეზონისთვის კი რევაზ ჭანტურიას "პელისტერს" შეუერთდა. ქართველთა გუნდი 5 მატჩიდან 4 მოგებითა და 12 ქულით ლიდერია. მეხუთე ტურის "ოლსტარში" ორივე ქართველი მოხვდა მას შემდეგ, რაც "პელისტერმა" სტუმრად "პრილეპი" დაამარცხა - 26:23. 18 გოლი ქართველთა ანგარიშზეა. ორჯონიკიძე კიდევ ორჯერ მოხვდა საუკეთესო შვიდეულში, როცა "პროლეტს" (28:21) რვა, ხოლო "ბორეცს" (33:29) 9 გოლი გაუტანა.

პირველ ევროპულ სეზონს ბერძნულ "ფილიპოს ვერიაში" ატარებს ჭაბუკთა ნაკრების ხელბურთელი ერეკლე არსენაშვილი. საბერძნეთის უმაღლეს ლიგაში მისი კლუბი 4 ტურის შემდეგ 2 მოგებით მეხუთე ადგილზეა. ბოლო მატჩში "ფილიპოსმა" 33:15 სძლია "პანელინიოსს". 5 გოლი ქართველი ხაზის მოთამაშის ანგარიშზეა.

მეორე წელიწადია, თურქეთის პრემიერლიგაში გამოდიან ლექსო წითელიშვილი და უჩა მაისურაძე. მათს "ჰენტბოლს" 4 თამაშის შემდეგ 1 მოგება აქვს.

უახლოეს მომავალში აზერბაიჯანის ჩემპიონატში ჩაებმებიან "ქუთაისისა" და ეროვნული ნაკრების მარჯვენა გარემარბი ხაზეინ რუსტამოვი და ქალთა ნაკრების წევრები - ქრისტინე ჯავახია, ქეთევან ვენეცკი, თინათინ ქიტესაშვილი.

დანიაში, ქალაქ ვიბორგის აკადემიაში, არიან გოგონათა ნაკრების კაპიტანი მედეა ჩოხელი და ვაჟთა ეროვნული ნაკრების წევრი გიორგი დიხამინჯია. ისინი პარალელურად კლუბებშიც ვარჯიშობენ. ჩოხელს მომდევნო კვირიდან ეწყება შეჯიბრება "ვიბორგის" ახალგაზრდულ გუნდთან ერთად, ხოლო დიხამინჯია კლუბ "სკივეს" მიაშურებს.

ახალგაზრდულ გუნდებში თავის გამოჩენის შემთხვევაში, კლუბებთან პროფესიულ კონტრაქტებსაც გააფორმებენ. მსგავსი პერსპექტივა აქვთ 16 წლის გიორგი ცხოვრებაძეს და ქეთი კუნელაშვილს, რომლებსაც, შესაბამისად, საფრანგეთის "მონპელიე" და ესპანეთის "გრანოლერსი" გამოცდიან.

ყოველდღიური სპორტული გაზეთი "ლელო"

918
მკითხველის კომენტარები / 0 /
მსგავსი ამბები
რუბრიკის სხვა სიახლეები
;