ხელბურთი. ლეგიონი: ქართველები სარბიელს უგოლოდ არ ტოვებენ

საქართველოს ხელბურთელ ვაჟთა ნაკრების წევრებმა თბილისის საერთაშორისო ტურნირზე იტალიასა და ფინეთთან გამარჯვების შემდეგ თავიანთ გუნდებს მიაშურეს და საკლუბო სეზონის დასკვნით რაუნდში ჩაებნენ.

დანიის უმაღლეს ლიგაში გიორგი დიხამინჯიამ "მიდტიულანდის" შემადგენლობაში 7 მატჩი გამართა და 19 ბურთი გაიტანა, მათ შორის ყველაზე მეტი - 8 გოლი ჩემპიონთა ლიგის მეოთხედფინალისტ "სკიერნთან" წაგებულ შეხვედრაში (21:27) მიითვალა.

დიხამინჯიას კლუბმა რეგულარულ ჩემპიონატში მე-13 ადგილი დაიკავა და ახლა ლიგაში ადგილის შესანარჩუნებლად იბრძვის. 21 წლის ქართველი ხელბურთელი სატესტო ვარჯიშებზე უკვე მიიწვიეს ბევრად უფრო ძლიერმა კლუბებმა - "სკიერნმა" და "ბიერინგბო-სილკებორგმა, რომელიც 2016 წელს დანიის ჩემპიონი იყო.

რეგულარული სეზონი დასრულდა რუმინეთშიც. ირაკლი ჩიქოვანის "დუნარეა კელერაშიმ" 26 თამაშში 43 ქულით მეშვიდე ადგილი დაიკავა და საჩემპიონო პლეი ოფის პირველ წრეში, (ორ მოგებამდე) ადგილზე გასულ "ტურდას" გაუწევს მეტოქეობას.

ქართველმა უკანახაზელმა განვლილ ჩემპიონატში 98 გოლი გაიტანა. საქართველოს ნაკრების მეკარე შოთა თევზაძის "ფოჩანი" 24 ქულით მე-10 ადგილს დასჯერდა და ახლა უმაღლეს ეშელონში ადგილის შესანარჩუნებლად იბრძოლებს.

მაკედონიის რეგულარულ ჩემპიონატში თეიმურაზ ორჯონიკიძისა და რევაზ ჭანტურიას "პელისტერმა" 16-დან 14 მატჩი მოიგო და 42 ქულით პირელი ადგილი დაიკავა.

მართალია, ორჯონიკიძეს ტრავმის გამო სეზონის მეორე ნახევარი თითქმის გაუცდა, მაგრამ 80 გოლით "პელისტერის" საუკეთესო ბომბარდირი მაინც გახდა.

თანაგუნდელს 20 ბურთით ჩამორჩა ჭანტურია, რომელიც მეორეა. მწვრთნელების, მოთამაშეებისა და გულშემატკივრების გამოკითხვის შემდეგ ორივე ქართველი თავიანთ პოზიციებზე რეგულარული სეზონის საუკეთესო მოთამაშეებად დაასახელეს. საგულისხმოა ისიც, რომ 35 წლის ჭანტურიამ მაკედონიაში უკვე აიღო პირველი დონის სამწვრთნელო ლიცენზია.

მაკედონიის ჩემპიონატში 40 ქულით მეორე ადგილი რატი მსხვილიძის "ეუროფარმ რაბოტნიკიმ" დაიკავა. ოთხი საუკეთესო გუნდი გავიდა მეორე რაუნდში, აქ მათ დაემატა ორი მაკედონიური გრანდი - "ვარდარი" და "მეტალურგი".

ამ ექვსეულის ორწრიანი პაექრობები მედალოსნებს გამოავლენს. პირველ ტურში მსხვილიძის კლუბმა "პელისტერს" 22:15 მოუგო. რატიმ და რეზომ თითო ბურთი გაიტანეს, ორჯონიკიძემ 6 გოლი მიითვალა. მეორე ტურში "პელისტერი" სტუმრად დამარცხდა "პროლეტთან" (26:30, ორჯონიკიძე- 8, ჭანტურია- 3), "ეუროფარმა ვერაფერს გახდა "ვარდართან" (29:38, მსხვილიძე- 4).

ამ სეზონის ევროტურნირებს მეოთხედფინალამდე შემორჩა ვლადიმერ რუსიას ლუქსემბურგული "დიფერდანჟი", რომელც ჩელენჯ კაპის მესამე წრეში სტავროპოლის (რუსეთი) "დინამოსთან" 26:31, 26:28 წააგო.

40 წლის ვეტერანმა სერგო დათუკაშვილმა კარიერის მიწურულს ირანის ჩემპიონატის ბოლო ეტაპზე ითამაშა და ისპაჰანის კლუბს მესამე ადგილის შენარჩუნებაში დაეხმარა.

რაც შეეხება 17 წლის გიორგი ცხოვრებაძეს, იგი ფრანგული "მონპელიეს" ძირითად შემადგენლობასთან ვარჯიშობს, თუმცა ჯერ კიდევ მესამე ფრანგულ დივიზიონში ამ კლუბის მეორე გუნდის ღირსებას იცავს. თავისთვის გამორჩეულ მატჩში ცხოვრებაძემ 10 გოლი გაუტანა "სენტ-ეტიენს" და თავისიანებს 31:30 მოაგებინა.

ყოველდღიური სპორტული გაზეთი "ლელო"
798
მკითხველის კომენტარები / 0 /
მსგავსი ამბები
რუბრიკის სხვა სიახლეები
;