ხელბურთი. რევაზ ჭანტურია: 'მოგება არ უნდა გაგვიჭირდეს' - ნაკრები ევრო 2022-ის პირველი საკვალიფიკაციო რაუნდისთვის ემზადება

ქართველ ხელბურთელებს წლეულს მნიშვნელოვანი პაექრობები ელით. ამჟამად ვაჟთა ეროვნული ნაკრები ევრო 2022-ის პირველი საკვალიფიკაციო რაუნდისთვის ემზადება. 8 გუნდი ორ ჯგუფშია გადანაწილებული.

11-13 იანვარს ითამაშებენ: A ჯგუფში, რომელსაც ლუქსემბურგი უმასპინძლებს: ლუქსემბურგი, დიდი ბრიტანეთი, ირლანდია, ბულგარეთი, ხოლო B ჯგუფში კვიპროსი, საქართველო, აზერბაიჯანი, მალტა. ქართველი ხელბურთელები  მალტაში კოტონერას სასპორტო კომპლექსში სამ შეხვედრას გამართავენ:

11 იანვარი. კვიპროსი - აზერბაიჯანი, საქართველო - მალტა

12 იანვარი. აზერბაიჯანი - საქართველო, მალტა - კვიპროსი

13 იანვარი. კვიპროსი - საქართველო, აზერბაიჯანი - მალტა

მეორე ეტაპი, ანუ პლეი ოფი (შინ სტუმრად) 2020 წლის აპრილშია დაგეგმილი. „ევრო 2022-ის“ პირველი საკვალიფიკაციო ეტაპის 2 გამარჯვებული და ჩელენჯ ტროფის ჩემპიონი უწყვილდება ევრო 2020-ის მთავარ საკვალიფიკაციო რაუნდში უარესი შედეგის მქონე 3 გუნდს. ამ წყვილებში გამარჯვებულები მთავარ საკვალიფიკაციო რაუნდში გადიან.

საკვალიფიკაციო ტურნირისთვის საქართველოს ნაკრები თბილისში ემზადება. როგორია გუნდის დღევანდელი შესაძლებლობები, ამის შესახებ გვესაუბრება ნაკრების ვეტერანი წევრი, 36 წლის რევაზ ჭანტურია, რომელიც 14 წელიწადია, მაკედონიაში თამაშობს. ამჟამად ქალაქ ბიტოლას „პელისტერის“ ღირსებას იცავს. ჯერ სტუ-ში იყო, მერე - ზაპოროჟიეში (უკრაინა), 2004 წლიდან მაკედონიაშია. აქ რამდენიმე გუნდში მოსინჯა ძალები, კერძოდ, „მეტალურგში“, „ვარდარში“, „სტრუმიცაში“.

საგულისხმოა, რომ რევაზ ჭანტურია უკვე დიპლომიანი მწვრთნელია, მაგრამ მოთამაშის კარიერის დასრულებაზე ჯერ არ ფიქრობს, საქართველოს ნაკრებში 2001 წლიდანაა.

- მალტაში  აზერბაიჯანთან, მალტასა და კვიპროსთან, ვფიქრობ, პრობლემები არ უნდა გვქონდეს. - ამბობს რევაზ ჭანტურია. - მხოლოდ გამარჯვებისთვის ვიბრძოლებთ, თუმცა კატეგორიულად რამის თქმა, უბრალოდ, უხერხულია. რეალურად ჩვენს გუნდს და მოთამაშეებს რომ შეხედავ, გაიხსენებ, ბიჭები როგორ გუნდებში თამაშობენ, როგორი სახელბურთო ოჯახი გვაქვს და ნაკრებში როგორი ატმოსფეროა, სხვას ვერაფერს იფიქრებ - უნდა გავიდეთ პლეი ოფში.

- გუნდში შექმნილ ატმოსფეროზე მაინც რას იტყვით?

- ძალიან მნიშვნელოვანია, რომ შეჯიბრებას ყველანი ჯანმრთელად ვხვდებით. მე და შოთა თევზაძე უკვე ვეტერანები ვართ, მაგრამ ამ ეტაპზე ნაკრებისთვის სარგებლობის მოტანა ნამდვილად შეგვიძლია. მაქსიმუმს გავაკეთებთ - ცოდნითა და გამოცდილებით გვერდში  დავუდგებით ახალგაზრდებს. ჯანსაღი ატმოსფეროს შექმნა ყოველთვის სასურველია, მით უფრო, როცა შესანიშნავი თაობა მოდის: ირაკლი კბილაშვილი, თემურ ორჯონიკიძე, ლექსო წითელაშვილი, გიორგი დიხამინჯია, გიორგი ცხოვრებაძე, რომელი ერთი ჩამოვთვალო. უწინ ცოტანი ვიყავით და მთელი დატვირთვა მოთამაშეების პატარა ჯგუფზე გადადიოდა, ახლა კი სერიოზული, სრულყოფილი გუნდის სახე მივიღეთ. მთავარია, ბიჭებმა საფუძვლიანი შეკრებები გაიარონ, ტურნირებში იასპარეზონ, გამოცდილება შეიძინონ.

- თქვენს ამპლუაში ახალგაზრდა მოთამაშეები გამოჩნდნენ. მაგალითად, დიხამინჯია. ისიც მაკედონიაში თამაშობს და თქვენ თვალწინაა. „სტრუგაში“ ის საბოლოოდ შუამარბად გადაიყვანეს?

- გიორგი არის „ცაცია კუთხე“, მაგრამ შუამარბადაც გვევლინება. მას ერთი ძალიან დიდი პლუსი აქვს - დაცვაში მეორე კაცად თამაშობს, რაც ცაცია შუამარბების უმეტესობას არ შეუძლია. ამიტომ მწვრთნელს საშუალება ეძლევა, ქართველი ხელბურთელი შეტევის ფრთაზე ათამაშოს, დაცვაში კი მეორე კაცად დააყენოს. პირდაპირ შემიძლია ვთქვა - დიხამინჯია ძალიან პერსპექტიული მოთამაშეა.

- მაკედონიის ჩემპიონატში რა მდგომარეობაა?

- ახლა ძალიან დაძაბულ ეტაპს გავდივართ. თითქმის ყველა წამყვან გუნდს ქულათა თანაბარი რაოდენობა აქვს. ტრადიციულად ოთხეული უნდა გაირკვეს, რომელსაც შემდეგ „ვარდარი“ და „მეტალურგი“ დაემატება, ჩამოყალიბდება ფინალური ჯგუფი, რომელიც ჩემპიონს გამოავლენს. „ვარდარი“ და „მეტალურგი“ იმდენად ძლიერი გუნდები არიან, რომ დანარჩენები, ფაქტობრივად, მესამე ადგილისთვის ვიბრძვით.

- სეზონის დასაწყისში „პელისტერიდან“ თემურ ორჯონიკიძე უნგრეთში წავიდა. ეს თქვენი გუნდისთვის დიდი დანაკლისი იყო?

- ნამდვილად. შემდეგ კი  შუა სეზონში მოსულმა ახალმა მწვრთნელმა ბევრი ლეგიონერი უკვე თავად გაუშვა.

- კონტრაქტის თანახმად „პელისტერში“ კიდევ რამდენი ხანი უნდა დარჩეთ?

- მაისამდე, მერე კი ვნახოთ. შეიძლება სხვაგან გადავიდე. თუმცა ახლა ამაზე არ ვფიქრობ, რადგან მთავარი მალტაში გასამართავი მატჩებია. ქომაგების გასახარებლად არაფერს დავიშურებთ.

ყოველდღიური სპორტული გაზეთი "ლელო"
501
მკითხველის კომენტარები / 0 /
მსგავსი ამბები
რუბრიკის სხვა სიახლეები
;