ხელბურთი. საქართველომ იტალიას აჯობა

შარშან ხელბურთელ ვაჟთა ევრო 2020-ის შესარჩევ ციკლში იტალიელებმა საქართველოს ეროვნულ ნაკრებს სირაკუზაშიც მოუგეს და თბილისშიც.

აპენინელები კვლავ ეწვივნენ საქართველოს დედაქალაქს, ამჯერად ხელბურთელთა საერთაშორისო ტურნირზე, რომელიც ოთხი გუნდის მონაწილეობით გუშინ სპორტის სასახლეში დაიწყო.

იმის მიუხედავად, რომ მასპინძლებს ორი წამყვანი მოთამაშე აკლიათ (ორჯონიკიძე და წითელიშვილი), მოედანზე რევანშის წყურვილით გავიდნენ.

პირველი ტაიმი თანაბარ ბრძოლაში გაილია - 2 ბურთზე მეტით მეტოქეებმა დაწინაურება ვერ შეძლეს. შესვენების შემდეგ ისეთი შთაბეჭდილება შეიქმნა, თითქოს სტუმრები ამჯერადაც გვაჯობებდნენ, რადგან სრული შემადგენლობით თამაშობდნენ, საქართველოს ნაკრებს კი სათადარიგოთა სკამზე უმთავრესად ახალბედები ჰყავდა.

მას შემდეგ, რაც ტურნირში მონაწილეობაზე ისრაელის გუნდმა უარი თქვა, საქართველოს ხელბურთის ფედერაციამ ვაკანტური ადგილის ჩვენი ახალგაზრდული ნაკრებით შევსება გადაწყვიტა. თანაც ორივე ნაკრები ისე დაკომპლექტდა, რომ ახალგაზრდული გუნდიც ბრძოლისუნარიანი ყოფილიყო.

საქართველო-იტალიის მატჩი, როგორც აღვნიშნეთ, დაძაბულად წარიმართა. ჩვენს გუნდში შეუცვლელად 60-60 წუთი ითამაშეს თევზაძემ, რუსტამოვმა და ჩიქოვანმა. პირველ ტაიმში საუკეთესო იყო საფრანგეთის "მონპელიეს" 17 წლის შუამარბი გიორგი ცხოვრებაძე, რომელმაც იტალიელებს 6 ბურთი გაუტანა.

იყოჩაღა დანიის "მიდტიულანდის" მოთამაშე გიორგი დიხამინჯიამ, რომელმაც ჯერ ანგარიშიც გახსნა, ტაიმის ბოლო წუთზე კი ნულოვანი კუთხიდან შესანიშნავი გოლი გაიტანა და ისევ დააწინაურა თანაგუნდელები -16:15, მაგრამ ვოლპიმ ბოლო წამებზე მაინც აღადგინა წონასწორობა.

პირველ ტაიმში მსხვილიძემ ორჯერ მიიღო ტრავმა, თუმცა შესვენების შემდეგ მაინც გავიდა მოედანზე და გუნდის წარმატებაშიც დიდი წვლილი შეიტანა.

ჩვენებმა დაცვაში მკვეთრად გააუმჯობესეს თამაში და მეტოქეს სივრცეები შეუზღუდეს. ცხოვრებაძემ მეორე ტაიმში სამჯერ ზუსტად დაარტყა შვიდმეტრიანი;

სტურუა, რომელსაც ნაკრებში დებიუტი წლეულს იანვარში ჰქონდა, შეტევებისას აქტიურობდა და 4 გოლიც მიითვალა. საფინალო სასტვენამდე 7 წუთი რჩებოდა, როცა საქართველოს ნაკრები ამ მატჩში პირველად დაწინაურდა 4 ბურთით - 28:24, მაგრამ სტუმრებმა ისევ ორ ბურთამდე დაიყვანეს სხვაობა.

იტალიელთა იმედს, მატჩის ბედი შემოეტრიალებინათ, ცივი შხაპი გადაავლო ნაკრების ლიდერმა ირაკლი ჩიქოვანმა, რომელმაც ბოლო ორი გოლი გაიტანა და ეს საქართველოს ნაკრებისთვის წარმატების მომტანი აღმოჩნდა.

კარგად ითამაშა ჩვენმა ახალგაზრდულმა გუნდმაც ფინეთის ეროვნულ ნაკრებთან: პირველ ტაიმში ორჯერ წინ იყო 2-2 ბურთით, თუმცა შესვენებამდე სტუმრებს მაინც ჩამორჩა ერთი ბურთით. მეორე ტაიმში გამოცდილმა ფინელებმა უკეთ ითამაშეს და 5 ბურთის სხვაობით გაიმარჯვეს.

საქართველო-იტალია 30:28

საქართველო: თევზაძე, ცხოვრებაძე- 9, ჩიქოვანი- 7, სტურუა- 4, გ. დიხამინჯია- 4, მსხვილიძე- 3, რუსტამოვი- 2, ჭანტურია- 1, დათუკაშვილი, ლაპიაშვილი, გოგავა (ხარაიშვილი, ი. დიხამინჯია, იობაშვილი, ქათამაძე, კალანდაძე).

იტალია: პოსტონია, ფერანტე, სკატარი- 4, ზონერერი- 4, პარიზინი- 3, მაიონე- 3, ბულძამინი- 3, ტურკოვიჩი- 2, დოლდანი- 2, მორეტი- 2, სტარჩევიჩი- 2, ვოლპი- 1, მაროკი- 1, სპერტი- 1, რადოვჩიჩი, არჩიერი.

ფინეთი - საქართველო (ახალ.) 31:26

ფინეთი: მაკელა, ლაიტინენი, კილშტედტი- 6, სიურიალა- 5, ბრომანი- 4, უდი- 3, გრანლუნდი- 3, ალგრენი- 3, სუნდბერგი- 2, ლაინე- 2, ვოუტილაინენი- 1, შომანი- 1, რონბერგი- 1, ფორსი, მარტინი, გრიპენბერგი.

საქართველო (ახ.): ცინცაძე, ხანდოლიშვილი, მიქავა- 6, ბულბულაშვილი- 5, ყორიაული- 4, გიორგაძე- 4, აბრამიშვილი- 3, ზარნაძე- 2, გოგოლაძე- 1, ნიაზაშვილი- 1, ბაინაზიშვილი, დოლმაზაშვილი, ცისკარიშვილი, კუხალაშვილი, ხაჟომია, გვაზავა.

5 აპრილი. 15:00 იტალია - ფინეთი,

17:00 საქართველო - საქართველო (ახალ.)
6 აპრილი. 15:00 იტალია - საქართველო (ახალ.), 17:00 საქართველო - ფინეთი.

ყოველდღიური სპორტული გაზეთი "ლელო"
948
მკითხველის კომენტარები / 0 /
მსგავსი ამბები
რუბრიკის სხვა სიახლეები
;