ხელბურთი. საქართველოს თასი შავი ზღვის ბიჭებს! 

ხელბურთელ ვაჟთა საქართველოს თასი წლეულს მეოთხედ გათამაშდა. პირველი ტურნირი 2014 წელს „სამტრედიამ“ მოიგო. მომდევნო სამი ფინალი ბათუმელთა მონაწილეობით გაიმართა.

2015 წელს მათ 20:19 დაამარცხეს სტუ, შარშან კი „პეგასთან“ 29:30 წააგეს. და აი, საქართველოს სამგზის ჩემპიონის (2016, 2018, 2019) ახალი აღზევება: „შავი ზღვის ბიჭებმა“ გუშინ ჯემალ ცერცვაძის სახელობის ხელბურთის აკადემიის დარბაზში „ქუთაისს“ გადამწყვეტ ორთაბრძოლაში სძლია და თასი მეორედ მოიპოვა. 

ბათუმი-ქუთაისი 27:20
ბათუმი: ტორონჯაძე, ვარშალომიძე, ლაპიაშვილი - 8, გოგოლაძე - 7, მსხვილიძე - 5, სიმონია - 4, აბრამიშვილი - 1, გიორგაძე - 1, ტიელიძე - 1, ტალახაძე, ბერძენიშვილი, წივწივაძე, თურმანიძე, მჟავანაძე, კაკულია, სტოლბოვი. 
ქუთაისი: მაისურაძე, გულეიშვილი, მერკვილაძე - 4, ხაჟომია - 4, სურმავა - 4, ზარნაძე - 2, გამზარდია - 2, ფერაძე - 1, სტურუა - 1, რუსტამოვი - 1, თევზაძე - 1, კობახიძე, ჯუღელი, ლომიძე, ლ. იმნაძე. 

თამამად შეიძლება ითქვას, რომ საქართველოს თასის წლევანდელი გათამაშების ფინალში ორი უძლიერესი და ღირსეული გუნდი გავიდა. გადამწყვეტ პაექრობაში „შავი ზღვის ბიჭების“ (მწვრთნელები - მერაბ ჭანტურია, მამუკა მჟავანაძე) უპირატესობა თავიდანვე გამოიკვეთა. მატჩის დასაწყისშივე რიონისპირელთა პირველი იერიშის მოგერიების შემდეგ რატი მსხვილიძემ ზღვისპირელები დააწინაურა, თუმცა ფერაძემ მალევე აღადგინა წონასწორობა. ამის შემდეგ ინიციატივა ხელთ იგდეს ბათუმელებმა და გოგოლაძემ, სიმონიამ და მსხვილიძემ ანგარიშში სხვაობა სამამდე (4:1) გაზარდეს. 

ქუთაისელთა დიდი მცდელობის მიუხედავად, უპირატესობას მეტოქე ფლობდა, რადგან ბათუმის დაცვის შუა ოთხეული (ლაპიაშვილი, ბერძენიშვილი, მსხვილიძე, სიმონია) საიმედოდ იდგა - უკანა ხაზში უფრო ტანმაღალ საქართველოს სამგზის ჩემპიონებთან რიონისპირელებს არაფერი გამოუვიდათ - სწრაფ შეტევებში უამრავი ტექნიკური წუნი ჰქონდათ. რაც მთავარია, მეკარე ტორონჯაძეს ვერაფერი მოუხერხეს. ბათუმელთა კარის დარაჯმა რუსტამოვის დარტყმული ბურთები ორჯერ მოიგერია, მერე ზედიზედ ოთხ შვიდმეტრიანს გადაეღობა უშიშრად. 

მართალია, ერთ მომენტში ბოყოჩაძის შეგირდებმა ანგარიშში სხვაობა მინიმუმამდე შეამცირეს, მაგრამ ტაიმი მაინც ბათუმელებმა მოიგეს 11:6. შესვენების შემდეგ მათი უპირატესობა უფრო გამოიკვეთა და მატჩის 42-ე წუთისთვის 11 ბურთით იყვნენ წინ.

„შავი ზღვის ბიჭებმა“ საბოლოოდ 27:20 გაიმარჯვა და სეზონის პირველი ტიტული მოიპოვა. ამ ორი გუნდის საინტერესო მეტოქეობა საქართველოს ჩემპიონატში გაგრძელდება, რომლიც 5 ნოემბერს დაიწყება, მანამდე კი საქართველოს ხელბურთელ ვაჟთა ეროვნული ნაკრები მაკედონიაში შეიკრიბება და მასპინძლებთან 25 და 26 ოქტომბერს ორ ამხანაგურ მატჩს გამართავს. 

ყოველდღიური სპორტული გაზეთი "ლელო"
126
მკითხველის კომენტარები / 0 /
მსგავსი ამბები
რუბრიკის სხვა სიახლეები
;