ხელბურთი.წლის შეჯამება: 2018-ში უკეთ, ვიდრე 2017-ში

ბოლო რამდენიმე წელიწადია, ქართულ ხელბურთს სიცოცხლე დაუბრუნდა და ნელ-ნელა აღმავლობის გზით მიდის:ჩვენი ხელბურთელი გოგონებიცა და ვაჟებიც უფრო ხშირად ჩნდებიან საერთაშორისო სარბიელზე და საქართველოს ხელბურთის ფედერაციაც უამრავ მნიშვნელოვან ღონისძიებას მასპინძლობს.

სწორედ ამის შესახებ ითქვა გუშინ ფედერაციის მიერ რესტორან "თაშრეში" ორგანიზებულ საზეიმო საღამოზე, სადაც განვლილი მუშაობა შეაჯამეს და წარადგინეს საქართველოს ვაჟთა ნაკრები (ალექსანდრე ხანდოლიშვილი, შოთა თევზაძე, ხაზეინ რუსტამოვი, ზურაბ აბრამიშვილი, თეიმურაზ ორჯონიკიძე,

ლექსო წითელაშვილი, სერგო დათუკაშვილი, ირაკლი ჩიქოვანი, შალვა სტურუა, გიორგი ცხოვრებაძე, რატი მსხვილიძე, რევაზ ჭანტურია, გიორგი დიხამინჯია,

გიორგი ლაპიაშვილი, შოთა გრიშიკაშვილი, მთავარი მწვრთნელი დონე ბოშკოვსკი, მწვრთნელი ტიტე კალანდაძე), რომელიც ხვალ დილაადრიან ლიტვაში

გაემგზავრება მსოფლიოს ჩემპიონატის საკვალიფიკაციო ტურნირში საასპარეზოდ. ნაკრებს გზა დაულოცეს სეოკ-ის პრეზიდენტმა ლერი ხაბელოვმა და პირველმა ვიცე პრეზიდენტმა ელგუჯა ბერიშვილმა,

კულტურისა და სპორტის მინისტრის მოადგილე შალვა გოგოლაძემ, სპორტის აკადემიის რეაქტორმა პროფესორმა გურამ ძაგანიამ, საქართველოს ხელბურთის ფედერაციის პრეზიდენტმა ზურაბ კაკაბაძემ.

მაინც როგორი იყო 2017 წელი ქართული ხელბურთისთვის და რას უნდა ველოდოთ 2018-ისგან, ამის შესახებ ზურაბ კაკაბაძეს ვესაუბრეთ.

- ეროვნული ჩემპიონატით დავიწყებ, - გვითხრა მან. - ვაჟთა უმაღლეს ლიგაში სტაბილურად რვა გუნდი იბრძვის მედლებისთვის. სასიამოვნოა, რომ უწინდელივით მხოლოდ ერთი გუნდი არ დომინირებს. გაიზარდა კონკურენცია.

მაგალითად, ახალ სეზონში პირველი წრის შემდეგ ქვეყნის ჩემპიონი თელავის გუნდი 12 ქულით მეორე ადგილზეა. მას ქულით ბათუმელები უსწრებენ, ქუთაისს კი 11 ქულა აქვს. წლეულს ქალების უმაღლეს ლიგაშიც რვა გუნდია.

აქ 6-6 ქულით თბილისის "ქარიშხალა" და ფოთის "ოქროს ვერძი" ლიდერობენ. 19-წლამდელ ვაჟებში 15-მა გუნდმა გამოთქვა თამაშის სურვილი, ხოლო ამავე ასაკის გოგონების პირველობაში 9 გუნდი ჩაება. ეროვნული ნაკრები გუნდებისთვის ღირსეული ცვლის მოსამზადებლად მყარ ბაზას ვქმნით.

- 2017 წელი მნიშვნელოვანი შეჯიბრებებით იყო დატვირთული.

- უპირველესად, ალბათ, 19-წლამდელ ხელბურთელ ვაჟთა მსოფლიოს ჩემპიონატი უნდა გამოვყო: პლანეტის 24 ქვეყნის წარმომადგენლები შეიკრიბნენ თბილისის ოლიმპიურ სასახლეში.

საქართველოს ნაკრებმა ალჟირის დამარცხებით მე-20 ადგილი დაიკავა. არადა, კიდევ ერთი მოგების შანსი გავუშვით ხელიდან, რითაც მერვედფინალში გასვლა შეგვეძლო.

17-წლამდელებმა გიოტებორგში ევროპის ჩემპიონატზე ფინელები დაამარცხეს, სლოვაკებს დაუზავდნენ და 16 ნაკრებს შორის მეთოთხმეტეზე გავიდნენ. 25-წლამდელებს ბულგარეთში მსოფლიოს თასზე 16 გუნდს შორის მერვე ადგილი ერგოთ.

2017 წელს ქალთა ეროვნულმა ნაკრებმა 23-წლიანი შესვენების შემდეგ პირველად ითამაშა ევროპის ჩემპიონატის საკვალიფიკაციო ტურნირში. 19-წლამდელთა ნაკრებმა თანატოლთა შორის მსგავს შეჯიბრებაში მოსინჯა ძალები, ხოლო 17-წლამდელებმა ლიტვაში კონტინენტის პირველობაზე მე-9 ადგილი დაიკავეს.

- ალბათ, 2018 წელიც არ იქნება ამ მხრივ გამონაკლისი...

- წლეულს საერთაშორისო სარბიელზე საქართველოს 7 ნაკრები იასპარეზებს. 12-14 იანვარს ვაჟთა ეროვნული ნაკრები მსოფლიოს ჩემპიონატის საკვალიფიკაციო ტურნირში მომდევნო ეტაპის ერთადერთი საგზურისთვის იბრძოლებს.

ჩვენები ლიტვას, ლატვიას და ისრაელს დაუპირისპირდებიან. შემოდგომით კი ევროპის 2022 წლის ევროპის ჩემპიონატის შესარჩევში ითამაშებენ, სადაც ფინალურ ეტაპზე გასვლა გვაქვს დაგეგმილი.

10-19 აგვისტოს თელავში 18-წლამდელთა ევროპის ჩემპიონატი გაიმართება, ხოლო 20-წლამდელები მსგავს შეჯიბრებაში 20-29 ივლისს მონტენეგროში იასპარეზებენ.

ამავე ასაკის გოგონებს 23-25 მარტს რუმინეთში მსოფლიოს ჩემპიონატის საკვალიფიკაციო შეჯიბრება ელით. 29 მაისიდან 3 ივნისის ჩათვლით EHF/IHF-ის ქალთა ტროფიზე იასპარეზებს 18-წლამდელთა გუნდი, ივლისში 16-წლამდელები შვედეთში ევროპის ღია ჩემპიონატზე გამოვლენ, ხოლო ეროვნულ ნაკრებს ნოემბერში მსოფლიოს ჩემპიონატის საკვალიფიკაციო ტურნირი ექნება.

- იმედია, წლეულს უკეთესი შედეგებისთვის იბრძოლებთ...

- უეჭველად. ამის თქმის საბაბს ის გვაძლევს, რომ ლეგიონერები მოგვიმრავლდნენ. ახლა ბევრი ქართველი ხელბურთელი უცხოურ კლუბებში იმაღლებს ოსტატობას. რუმინეთის "დუნარეა კელერაშის" ღირსებას იცავს ირაკლი ჩიქოვანი, რომელსაც ამ სეზონში უკვე 58 ბურთი აქვს გატანილი.

ეროვნული ნაკრების მეკარეშოთა თევზაძე რუმინულ "ფოჩანში" გამოდის. 13 თამაშიდან 12 მოგებით (36 ქულა) მაკედონიის ჩემპიონატს ლიდერობს რევაზ ჭანტურიასა და თეიმურაზ ორჯონიკიძის "პელისტერი". ჩემპიონატში მეორე ადგილზეა რატი მსხვილიძის "ეუროფარმ რაბოტნიკი".

ერეკლე არსენაშვილი ბერძნული კლუბის - ფილიპოს "ვერიას" ლიდერია 30 გოლით. თურქეთის სუპერლიგაში თამაშობენ ლექსო წითელიშვილი და უჩა მაისურაძე, ხოლო ვლადიმერ რუსია ლუქსემბურგშია.

ეროვნულ ნაკრებშია გამოძახებული 16 წლის გიორგი ცხოვრებაძე. მისი ხმაურიანი ტრანსფერი საფრანგეთის "მონპელიეში" შემოდგომის მთავარი მოვლენა იყო. არ არის გამორიცხული, იგი პირდაპირ მთავარ გუნდში მოხვდეს. სულ მალე დანიის პირველი დივიზიონის კლუბ "სკივეს" წევრი გახდება 20 წლის გიორგი დიხამინჯია.

- საგულისხმოა, რომ ევროპაში ფანჯარა ჩვენმა გოგონებმაც გაჭრეს...

- დიახ, ასეა. დანიაში, ქალაქ ვიბორგის ხელბურთის აკადემიაში სწავლობს ქალთა ნაკრების წევრი მედეა ჩოხელი, თანაც თამაშობს ამავე ქალაქის ქალთა კლუბში, რომელიც დანიის მეორე დივიზიონშია.

პირველი წრის შემდეგ ის აკადემიის გუნდთან ერთად განაში იმყოფებოდა საქველმოქმედო ტურნეზე. ამ თვიდან ვიბორგის აკადემიაში მასთან ერთად იქნება ქალთა ნაკრების კიდევ ერთი წევრი - ანა ყველაშვილი.

კატალონიის ქალაქ გრანოლერსის ახალგაზრდულ გუნდში ექვსჯერ ითამაშა ქეთი კუნელაშვილმა და ბოლო მატჩში 11 გოლიც გაიტანა. მომავალი სეზონიდან იგი გრანოლერსის ქალთა გუნდში გამოვა ესპანეთის უმაღლეს ლიგაში.

ქალთა ნაკრების სამი ხელბურთელი (ქრისტინე ჯავახია, ქეთევან ვეცკი და თინათინ ქიტესაშვილი) აზერბაიჯანის ჩემპიონატის მონაწილე "იდმან აკადემიიასის" ძირითადი შვიდეულის წევრია.

ყოველივე ზემოაღნიშნული იმის იმედს გვაძლევს, რომ ჩვენი ხელბურთელი გოგონები და ვაჟები ოსტატობას აიმაღლებენ და საერთაშორისო სარბიელზე ნაკრები გუნდების წარმატებულ გამოსვლას შეუწყობენ ხელს.

918
მკითხველის კომენტარები / 0 /
მსგავსი ამბები
რუბრიკის სხვა სიახლეები
;