ხელბურთი. ხელაძის ნახელავი სამტრედიასთან

ზესტაფონის სპორტის სასახლეში დრამატულად წარიმართა საქართველოს ხელბურთელ ვაჟთა 2017-2018 წლების ეროვნული ჩემპიონატის დასავლეთის ზონის მეორე წრის მესამე ტურის შეხვედრები.

ერთპიროვნული ლიდერი "შავი ზღვის ბიჭები" მეორე ადგილზე მყოფ "ქუთაისს" დაუპირისპირდა. მათი პირველი წრის დუელი ფრედ - 27:27 დასრულდა.

მეორე შეხვედრასაც ასეთი პირი უჩანდა, მაგრამ საფინალო სასტვენამდე დარჩენილ სამ წუთში ზღვისპირელებმა გამარჯვება ხელიდან წაჰგლიჯეს რიონისპირელებს.

მატჩის დასაწყისში "ქუთაისი" ორი ბურთით დაწინაურდა, მაგრამ 2016 წლის საქართველოს ჩემპიონმა "ბათუმმა" მალევე აღადგინა წონასწორობა და შესვენებამდე სამი ბურთითაც გავიდა წინ - 16:13.

პაექრობის მეორე ნახევრში ანგარიშში სხვაობამ ხუთ ბურთს მიაღწია. ამის მიუხედავად, ქუთაისელებს ფარ-ხმალი არ დაუყრიათ. პირიქით, იერიშები გააძლიერეს და რუსტამოვმა, მერკვილაძემ და გამზარდიამ ზედიზედ სამი გოლით 57-ე წუთზე ანგარიში გაქვითეს - 27:27.

დარჩენილ მცირე დროში ბათუმელმა გოგოლაძემ ორჯერ აიღო ანდრიაძის კარი და საკუთარ გუნდს მორიგი გამარჯვება მოუტანა. "შავი ზღვის ბიჭები" 19 ქულით მკვიდრად მოექცა გათამაშების ცხრილის სათავეში.

მას ოთხი ქულით ჩამორჩება "ქუთაისი" და მეორე ადგილზეა, მაგრამ აღმოსავლელთა სამტურიანი შეჯიბრების შემდეგ რიონისპირელებს, შესაძლოა, ქვეყნის ჩემპიონმა თელავის "იმედმა" გადაასწროს.

ტურის მეორე მატჩში "წყალტუბომ" ამ ჩემპიონატში "სამტრედია" მეორედაც დაამარცხა. სხვაობა აქაც ორი ბურთი იყო. არადა, პირველ ტაიმში იყო მომენტი, როცა სამტრედიელები ხუთი ბურთითაც იგებდნენ შეხვედრას. საგულისხმოა, რომ გამარჯვებულთა შემადგენლობაში 19 ბურთი ხელაძემ გაიტანა.

სამტრედია-წყალტუბო 29:31

სამტრედია: შველიძე, ძნელაძე- 12, გაგუა- 6, ხომერიკი- 4, თევზაძე- 3, ხონელიძე- 3, ადამია- 1, ხელისუფალი, მანაგაძე, ნადირაძე.

წყალტუბო: სილაგაძე, ხელაძე- 19, შვანგირაძე- 4, ჯიმშელეიშვილი- 4, მ. გველესიანი- 3, მეტონიძე- 1, გელა გველესიანი, გიორგი გველესიანი, კუხალაშვილი, კახაია.

ბათუმი - ქუთაისი 29:27

ბათუმი: ტორონჯაძე, ცერცვაძე, თევზაძე- 5, აბრამიშვილი- 5, წივწივაძე- 5, სტურუა- 4, გოგოლაძე- 4, სურმავა- 3, ხაჟომია- 2, ბერძენიშვილი- 1, ყაველაშვილი, ქარდავა.

ქუთაისი: ანდრიაძე, მაისურაძე, კბილაშვილი- 7, გამზარდია- 5, რუსტამოვი- 5, მერკვილაძე- 3, სიმონია- 2, გოგალაძე- 2, გრიშიკაშვილი- 2, ფერაძე- 1, კობახიძე, ჭელიძე, მათნაძე, ლომიძე.

თ მ ფ წ ბ ქ
ბათუმი 10 9 1 0 376-273 19
ქუთაისი 10 7 1 2 358-275 15
იმედი 7 6 0 1 223-199 12
პეგასი 7 4 0 3 262-228 8
გორი 7 3 0 4 233-255 6
სტუ 7 2 0 5 206-217 4
წყალტუბო 10 2 0 8 299-391 4
სამტრედია 10 0 0 10 252-371 0

თბილისის სასპორტო კომპლექს "არენაში" 21-23 თებერვალს აღმოსავლეთის ოთხეული (დედაქალქის "იმედი", "პეგასი", სტუ-"ქარიშხალა" და "გორი") მერვე-მეათე ტურების შეხვედრებს გამართავს.

საქართველოს ჩემპიონი გამოვლინდება მაისში. სამწრიანი ტურნირის შემდეგ 4 საუკეთესო გუნდი ნახევარფინალში გავა.

ყოველდღიური სპორტული გაზეთი "ლელო"
1305
მკითხველის კომენტარები / 0 /
მსგავსი ამბები
რუბრიკის სხვა სიახლეები
;