ხელბურთი: 16 წლის ტალანტი, გიორგი ცხოვრებაძე მონპელიეში

16 წლის ქართველმა ხელბურთელმა გიორგი ცხოვრებაძემ კარიერა თბილისის "პეგასში" დაიწყო. 192 სანტიმეტრის სიმაღლისაა და 85 კილოს იწონის, ცაციაა და მარჯვენა შუამარბის პოზიციაზე თამაშობს. ქვეყნის ახალგაზრდული ნაკრების შემადგენლობაში წლეულს ორ მნიშვნელოვან ტურნირში მოსინჯა ძალები: ჯერ 16-წლამდელთა ევროპის პირველობაში (სადაც ბომბარდირი გახდა), შემდეგ კი თბილისის ჭაბუკთა მსოფლიოს ჩემპიონატში იასპარეზა.

ამ ტურნირის მონაწილე გახლდათ ფრანგული "მონპელიეს" ორ ხელბურთელი - კილიან ვილმინო და ჟულიენ ბოსი. ჩემპიონატის შემდეგ იგი ეროვნულ ნაკრებშიც მიიწვიეს. მერე საფრანგეთის ერთ-ერთ ტიტულოვან კლუბს, ქვეყნის 14-გზის ჩემპიონს, 2003 წლის ჩემპიონთა ლიგის გამარჯვებულს, წლევანდელ ლიგაზე ზედიზედ ექვსი მატჩის მომგებ "მონპელიეს" (მის შემადგენლობაში 2017 წლის ხუთი მსოფლიოს ჩემპიონი თამაშობს) ეწვია გასასინჯად. ფრანგული კლუბის ძირითადი გუნდის წამყვან მოთამაშე ვიდ ჯავტიჩნიკს ვარჯიშისას ქართველის შორეული დარტყმები რომ უნახავს, გაკვირვებულს შეუნიშნავს - ერთი ამას შეხედეთ, ჯერ 16 წლისაც არაა.

ქართველი სპორტსმენის ხელში ჩაგდება ფრანგულ "სენ-რაფაელსა" და ჩემპიონთა ლიგის მოქმედ გამარჯვებულს, მაკედონიის "ვარდარსაც" სურდათ, მაგრამ ცხოვრებაძემ და მისმა მწვრთნელმა ტიტე კალანდაძემ "მონპელიე" არჩიეს. ნოემბრის დასაწყისში გიორგი საფრანგეთში ჩავიდა, წინა შაბათს ჩემპიონთა ლიგაზე "მონპელიე"-"სპორტინგის" მატჩს დაესწრო, მერე გუნდთან ერთად რამდენჯერმე ივარჯიშა, 2 დეკემბერს "ბუნიოლის" წინააღმდეგ ითამაშებს საფრანგეთის 18-წლამდელთა ჩემპიონატში.

"მონპელიეს" მწვრთნელსა და აკადემიის მთავარ კოორდინატორ ერიკ მათეს უთქვამს, ჭაბუკი ქართველი ხელბურთელი თვითნაბადი განძიაო.
ერიკ მათე: "ამ ამპლუის, მარჯვენა უკანახაზელის პოზიციაზე მოთამაშე, თანაც ასეთი კომპლექციისა და მონაცემების, იშვიათობაა. "მონპელიეს" სახელბურთო აკადემიის ძირითადი მიზანი, რა თქმა უნდა, ფრანგი ხელბურთელების მომზადებაა, თუმცა უცხოელებსაც ვიწვევთ, რომელთა პოზიციაზეც დეფიციტი გვაქვს.

გიორგის ასაკის, ამ პოზიციისა და ამ მონაცემების მოთამაშე ახლა საფრანგეთში არ გვყავს. იგი ნოემბრის დასაწყისში ჩამოვიდა, ინტეგრაციის მიზნით, მოვაწყვეთ მიმღებ ოჯახში, ვაჩვენეთ სკოლა, სადაც უნდა ისწავლოს, გავაცანით სავარჯიშო პირობები, ხოლო კლუბის მთავარი მწვრთნელი პატრის კანაიე პირადად ესაუბრა ჩვენი კლუბის ფილოსოფიაზე. დავინახეთ, რომ ის უბრალო ტალანტი არაა და კლუბშიც მოვიწვიეთ. ყველაფერი თუ კარგად იქნა, ვფიქრობ, მალე "მონპელიეს" პროფესიულ გუნდშიც მოხვდება".

ყოველდღიური სპორტული გაზეთი "ლელო"
1152
მკითხველის კომენტარები / 0 /
მსგავსი ამბები
რუბრიკის სხვა სიახლეები
;