ხელბურთი. U18 ევროპა. შანსი კიდევ გვაქვს

ერთდღიანი შესვენების შემდეგ გუშინ თბილისის ოლიმპიურ სასახლეში განახლდა 18-წლამდელ ხელბურთელ ვაჟთა ევროპის ჩემპიონატი, რომელშიც 11 გუნდი მონაწილეობს. საქართველოს ნაკრები A ჯგუფის მესამე ტურში აუტსაიდერ საბერძნეთთან დამარცხდა - 19:24.

საქართველო: სილაგაძე - 2, დიხამინჯია, კალანდაძე - 5, ცხოვრებაძე - 5, ლაპიაშვილი - 4, ხელაძე - 2, ქათამაძე- 1, კუხალაშვილი, ჩადუნელი, კახოშვილი, გველესიანი, ასაბაშვილი, ნიაზაშვილი, დგებუაძე, ძნელაძე, ლ. იმნაძე.

ელადის ნაკრებმა, რომელმაც ზედიზედ ორი შეხვედრა წააგო ბელარუსსა და იტალიასთან, ჩემპიონატის მასპინძლებთან გაორმაგებული მონდომებით ითამაშა. ანგარიში საქართველოს ნაკრებმა გახსნა, თუმცა მე-4 წუთიდან უპირატესობა ბერძნებმა იგდეს ხელთ და მატჩიც სასურველ დასასრულამდე მიიყვანეს.

   #ხელბურთი. ევროპას თბილისი მასპინძლობს

საგულისხმოა, რომ მეორე ტაიმის 8-წუთიან მონაკვეთში ბურთი ვერც ერთმა მხარემ ვერ გაიტანა, არადა, ჩვენებმა ორი პენალტი და რამდენიმე აშკარა საგოლე მომენტი გააფუჭეს. მართალია, შემდეგ მეკარე იური სილაგაძემ(!) ორი გოლით ანგარიშში სხვაობა ორამდე შეამცირა, მაგრამ ტიტე კალანდაძის შეგირდებმა მატჩში გარდატეხის შეტანა ვერ მოახერხეს. სტუმართა გამარჯვებაში დიდი წვლილი მიუძღვის მეკარე პანაიოტის პაპანტონოპულოსს, რომელმაც არაერთხელ იხსნა თავისი გუნდი.

ტიტე კალანდაძე: "წინა შეხვედრაში ისეთ ძლიერ ნაკრებს მოვუგეთ, დღეს ყველა ჩვენს გამარჯვებას ელოდა... მართალია, ვფრთხილობდი, მაგრამ ბიჭები ასე ცუდად თუ ითამაშებდნენ, ნამდვილად არ მეგონა. ძალიან ბევრი შეცდომა დავუშვით. ცხადია, ასე მატჩს ვერ მოიგებ".
მარცხის მიუხედავად, საქართველოს 18-წლამდელებს ნახევარფინალში გასვლის რეალური შანსი რჩებათ, ოღონდ, საამისოდ, იტალიელების დამარცხებაა აუცილებელი.

გუშინ ამავე ჯგუფში იტალიამ ფინეთს 32:17 აჯობა და ქულათა მაქსიმუმი დააგროვა. საქართველო მეორეა 3 თამაშიდან 1 მოგებით, ფრითა და მარცხით.

B ჯგუფი. III ტური. შვეიცარია-ლუქსემბურგი 26:25, ფარერები-მაკედონია 29:30, ესტონეთი-ლიეტუვა 23:21.
აქ 3-3 თამაშიდან 100-პროცენტიანი შედეგებით ლიდერობენ შვეიცარია და მაკედონია.

14 აგვისტოს ითამაშებენ: ფარერები-ლიეტუვა, მაკედონია-შვეიცარია, ლუქსემბურგი-ესტონეთი, იტალია-საქართველო, ფინეთი-ბელარუსი.

870
მკითხველის კომენტარები / 0 /
მსგავსი ამბები
რუბრიკის სხვა სიახლეები
;