ხინჩეგაშვილი: მიუჩვეველი ვარ...

საქართველოს ჩემპიონატის დასრულების შემდეგ ამ ტურნირისა და სამომავლო გეგმების შესახებ კომენტარი ვთხოვეთ ვლადიმერ ხინჩეგაშვილს.

- როგორ შეაფასებთ თქვენს გამოსვლას ამ ჩემპიონატზე, ახალ წონაში?

- რაც მთავარია, შედეგით კმაყოფილი ვარ, რადგან მისაღები შედეგია. რაც მინდოდა და რაც გვქონდა მიზანი, ის მიღებულია და ჩემთვის მთავარიც ესაა.

- საინტერესოა, რა მიზანს ისახავდით ამ ჩემპიონატში გამოსვლით?

- მთავარი მიზანი იყო ახალ წონაში ადგილის მოპოვება, რაც მოვახერხე.

- საკუთარი ჭიდაობით თუ ხართ კმაყოფილი?

- ფაქტია, რომ მოვიგე და ანუ ამ წუთისთვის ეს ფორმა საკმარისი იყო საქართველოს ჩემპიონატის მოსაგებად, ხოლო ევროპისა და მსოფლიოს პირველობებს რაც შეეხება, იმათთვის ბევრად უკეთესი ფორმა იქნება საჭირო.

- ახალ წონასთან ადაპტაცია არ უნდა გაგიჭირდეთ, რადგან დაკლება არ მოგიწევთ...

- დიდი სხვაობა არცაა ძველსა და ახალ წონებს შორის, რადგან მოჭიდავეთა დაახლოებით 80 პროცენტი ჩემსავით ახალი გადმოსულია 65-ში. დანარჩენი 20 პროცენტი თუ იქნება ისეთი, ვისთანაც თავიდან მომიწევს ჭიდაობა. თან, 65-ში ბუნებრივი წონაც მყოფნის, არ მომიწევს დაკლება.

ახლა კი არა, 57-ში რომ გამოვდიოდი, მაშინ ვიყავი 65 კილოგრამი. ქვედა წონაშიც შემეძლო ჭიდაობა, მაგრამ ასე ადრე იმიტომაც გადმოვედი აქ, რომ სამომავლოდ 65-ში მინდა გამოსვლა და რაც უფრო ადრე გადავალ, მით უკეთესია, უფრო კომფორტული იქნება ჩემთვის.
ზოგადად, წონები და წესები ყველასთვის იცვლება და არა მარტო ჩემთვის.

- მეტოქეებზე რას იტყვით, რამდენად ღირსეულ სპარინგ-პარტნიორობას გაგიწევენ საოლიმპიადოდ?

- ვინც ამ შეჯიბრებაში მიიღო მონაწილეობა, ყველა ანგარიშგასაწევი ფალავანია. შეიძლება, ფინალი კი მოვიგე იოლად, მაგრამ ვინც გუშინდელ შეხვედრებს უყურა, ნახა, რომ დაძაბული პაექრობები მქონდა და საკმაოდ დიდი ბრძოლა მომიწია.

- სამომავლოდ რა გაქვთ დაგეგმილი, იანვარში ისევ გამოხვალთ ინდოეთის ლიგაში?

- ამჯერად არა. პროლიგა გაისადაც ჩვეულებრივ ჩატარდება, მაგრამ წლეულს არ ვიღებ მონაწილეობას. მე 65-ში მსურდა გამოსვლა, მაგრამ იქ ლეგიონერებზე ლიმიტია და ვერ მოვხვდი იმ კვოტაში.

- ნაკრების შემადგენლობაში რომელ შეჯიბრებებზე გამოხვალთ?

- ნაკრებთან ერთად მზადებას უახლოეს მომავალში დავიწყებთ და ევროპის ჩემპიონატისთვის მოვემზადებით, მანამ კი რომელ შეჯიბრებებში გამოვალ, ამას მწვრთნელებთან ერთად განვიხილავთ. შეჯიბრებები კი ტარდება, მაგრამ შეკრებებიდან გამომდინარე, შევხედავთ, რომელი ტურნირი იქნება ჩვენთვის მისაღები და იქ გამოვალთ.

- თუ გაქვთ წინასწარი ინფორმაცია, საერთაშორისო დონეზე 65 კილოგრამში რა კონტიგენტი მოიყრის თავს, ძველი მეტოქეები ბევრნი იქნებიან?

- როგორც აქაა - საქართველოს ჩემპიონატზე, ანალოგიური ხდება მსოფლიოს მასშტაბით: უმეტესობამ შეიცვალა წონა, 65-დან რამდენიმე დარჩა, უმეტესობა კი 61-დან ავიდა ზევით. ანუ ძირითადი კონკურენტებიდან ისევ იქნებიან აზერბაიჯანელი ალიევი, რუსები - ჩაკაევი, რაშიდოვი ანუ დიდი სხვაობა არ იქნება. ძირითადად ისევ ის მეტოქეები მეყოლებიან, რომლებიც მყავდნენ 61-ში, თუმცა რამდენიმე 65-დანაც დაემატება.

- დასასრულს, ახალ წონებზე მინდა გკითხოთ, რამდენად მოგწონთ ეს წესები, თუნდაც ორდღიანი ფორმატი?

- ყველაფერი შეჩვევაზეა დამოკიდებული. ჯერ პირველი შეჯიბრებაა და ცოტა მიუჩვეველი ვარ, როგორც სხვები. თუმცა დროთა განმავლობაში შევეჩვევი.

1100
მკითხველის კომენტარები / 0 /
მსგავსი ამბები
რუბრიკის სხვა სიახლეები
;