ხმაურიანი კაცი - იურგენ კლოპის ანატომია

ნოემბრის დასაწყისში ინგლისში გამოვიდა იურგენ კლოპის ავტობიოგრაფიული წიგნი, სათაურით - "კლოპი, რომელმაც მოიტანა ხმაური". ის დაწერა რობერტ ჰოგერშტაინმა - გერმანული ფეხბურთის დიდმა ექსპერტმა, რომლის ნააზრევი ხშირად შეგხვდებათ "გარდიანსა" და სხვა საინფორმაციო საშუალებებში.

წიგნი ძირითადად ეყრდნობა კლოპის ოჯახის წევრების მონაყოლს. მასში ასევე შესულია სხვადასხვა საინტერესო პიროვნების ნაამბობიც.

მაგალითად, "დორტმუნდის" შეფი ჰანს-იოახიმ ვატცკე ჰყვება, თუ რატომ უთხრა უარი იურგენმა "მანჩესტერ იუნაიტედს", კლოპის აგენტი მარკ კოსიცკი კი იხსენებს "ლივერპულთან" მოლაპარაკების დეტალებს...

რატომ იუარა მანჩესტერი...

2013 წელს ორივე მანჩესტერულ კლუბს სურდა იურგენ კლოპის გადაბირება. ეს საგა მომდევნო წელსაც გაგრძელდა. კლოპმა ვატცკეს მეგობრულ ვახშამზე უთხრა, რომ მას უნდოდა, ინგლისში მოესინჯა ძალები და გამოწვევა მიეღო სხვა რეალობიდან.

განსაკუთრებით აქტიურობდა "მანჩესტერის" აღმასრულებელი დირექტორი ედ ვუდვორდი. ის პირადად ჩავიდა დორტმუნდში, შეხვდა კლოპს და უთხრა, რომ "იუნაიტედი" უდიდესი გუნდია, თავად ინგლისი კი არის ნაღდი "დისნეილენდი" დიდებისთვის, სადაც მწვრთნელის ყველა ოცნება სრულდება.

კლოპმა ბევრი იფიქრა და უარი თქვა. ის გამოტყდა, რომ უკან დაიხია "მანჩესტერის" ბოსისგან სასურველზე დიდი წნეხის გამო. ერთი წლის შემდეგ ის მაინც წავიდა "დორტმუნდიდან". ისევ გააქტიურდა "სიტი" და ასპარეზზე გამოჩნდა "ტოტენჰემიც", თუმცა იურგენმა ორივე მათგანს უარი უთხრა.

საიდუმლო მოლაპარაკებები

2014 წლის სექტემბერში, როცა "ენფილდზე" ბრენდან როჯერსის კარიერა მთავრდებოდა, "ლივერპულის" ხელმძღვანელები კლოპის აგენტზე გავიდნენ. საბოლოო ჯამში, მხარეები მივიდნენ შეთანხმებამდე, რომლის თანახმადაც, ჩვენი წერილის გმირი უნდა ჩასულიყო "ლივერპულის" წარმომადგენლებთან შესახვედრად... ამერიკის შეერთებულ შტატებში.

კლოპი აეროპორტში "ლივერპულის" ერთ-ერთმა გულშემატკივარმა შენიშნა. მწვრთნელმა ქომაგი მოატყუა და უთხრა, რომ NBA-ს ერთ-ერთი მატჩის სანახავად მიფრინავდა. ტყუილს მოკლე ფეხები აქვს და ყველაფერი ძალიან მალე გაირკვა.

რატომ აირჩია ლივერპული?

კლოპის უახლოესი მეგობარი, კრისტიან ნაიდელი, მიიჩნევს, რომ მას შემდეგ, რაც "დორტმუნდის" ყოფილი მწვრთნელის გადაბირების სურვილი "ლივერპულმა" გამოხატა, მისი ხელში ჩაგდების შანსი მსოფლიოს არც ერთ კლუბს აღარ ჰქონდა.

"ჩემი აზრით, "ლივერპულის" გარდა, არც ერთ კლუბს აღარ ჰქონდა შანსი. მისთვის ზედგამოჭრილია ის ატმოსფერო, რომელიც შექმნილია "ენფილდზე". იქ რაღაცნაირი აურაა. თითქოს მწვრთნელი და გულშემატკივრები ერთნი არიან.

მე მან მკითხა, ღირდა თუ არა გარისკვა. პირდაპირ ვუთხარი, რომ თუ უნდოდა, წარმატებისთვის მიეღწია, აუცილებლად კარგად უნდა ესწავლა ინგლისური. იურგენი დამპირდა, რომ სწორედ ასე მოიქცეოდა და მე ეჭვი არასოდეს შემპარვია მის სიტყვებში", - ჰყვება ნაიდელი.

საინტერესო ისტორიას იხსენებს "ლივერპულის" შემტევი ნახევარმცველი ადამ ლალანა: "ერთხელ, კლოპი ძალიან გაბრაზებული იყო. ინგლისურის მარაგი შემოაკლდა და გერმანულზე გადავიდა. მთლიანობაში, მისი ინგლისური მშვენიერია. ყოველ შემთხვევაში, მე ზუსტად ვხვდები, რისი თქმა სურს ბოსს".

პლაჟზეც მხოლოდ გამარჯვებისთვის

კლოპი ოჯახთან და მეგობარ სვენ მიულერთან ერთად რამდენიმე წლის წინ თურქეთში ისვენებდა. სვენი იურგენის შვილებთან ერთად მონაწილეობდა ადგილობრივ პლაჟზე მიმდინარე ტურნირში. თავად კლოპი იქაც მწვრთნელის როლს დასჯერდა, რადგან ფეხს იტკივებდა.

"ფრე იყო. ერთი გოლი და გამარჯვებულიც გაირკვეოდა. მე ძალიან დამცხა. თანაც, ასაკი გავითვალისწინე და თამაშიდან გავედი. იურგენი გიჟივით მომვარდა, დამიწყო ხელების ქნევა და იმის ახსნა, რომ ასე მოქცევა არ შეიძლებოდა და უნდა დავბრუნებულიყავი მინდორზე, გამეტანა გოლი და მომეგო ეს მატჩი...

საბოლოოდ, ზუსტად ისე მოხდა, როგორც იურგენმა თქვა - სწორედ ჩემი გოლით მოვიგეთ. ვერც კი წარმოიდგენთ, რა ბედნიერი იყო თამაშის დასრულების შემდეგ", - იხსენებს კლოპის მეგობარი.

იურგენის აზარტზე ასევე ნათლად მეტყველებს შემთხვევა, რომელიც ერთ-ერთი საგამოფენო შეხვედრისას მოხდა. "ლივერპული" მეორე ტაიმში ორბურთიანი სხვაობით იგებდა.

ამ დროს, მსაჯმა აშკარა თერთმეტმეტრიანი არ დანიშნა კლოპის გუნდის სასარგებლოდ. იურგენი, ამ სიტყვის პირდაპირი მნიშვნელობით, გაგიჟდა.

იმ თამაშის მონაწილე, "ლივერპულის" ლეგენდა ჯეიმი კარაგერი იხსენებს: "ის, რაც მაშინ ვნახე, ნამდვილი სასწაული იყო. ყოველთვის მეგონა, რომ გამარჯვებისკენ სწრაფვა ყველაზე მეტად მე მქონდა, მაგრამ ეს არაფერი ყოფილა იმასთან შედარებით, რასაც კლოპი განიცდიდა. ამის შემდეგ მე ის კიდევ უფრო დავაფასე".

უნდოდა, სპორტული ჟურნალისტი გამხდარიყო...

როცა კლოპი "მაინცში" თამაშობდა, გუნდს მესამე ბუნდესლიგაში გავარდნა დაემუქრა. მაშინ კლოპმა გადაწყვიტა, დაესრულებინა საფეხბურთო კარიერა და სპორტული ჟურნალისტი გამხდარიყო.

ის სტაჟიორად მივიდა ერთ-ერთ რეგიონულ ტელეარხზე და სნოუბორდისტებთან ინტერვიუც ჩაწერა. როგორც ტელეარხის ხელმძღვანელობა ირწმუნებოდა, კლოპს ეს ძალიან კარგად გამოუვიდა...

მაგრამ კლოპი-სპორტული ჟურნალისტი მაინც არ შედგა. გამოჩნდა "მაინცის" გაწვრთნის ვარიანტი და სამწვრთნელო გზას დაადგა...

ყოველდღიური სპორტული გაზეთი "ლელო"
1782
მკითხველის კომენტარები / 1 /
ვლადიმერ
0
გიჟია ეს კაცი.მათ კი ფასი არ აქვთ
მსგავსი ამბები
რუბრიკის სხვა სიახლეები
;