ხუთი ქართველი ლეგიონერი ტურის სიმბოლურ ნაკრებში მოხვდა

გასული უქმეები ქართველი ფეხბურთელებისთვის უჩვეულოდ წარმატებული გამოდგა. მთლიანობაში, ქართველებმა 10 გოლი გაიტანეს - გიორგი ქვილითაიამ - 3, ლაშა დვალმა - 2, თითო - ნიკა კაჭარავამ, ზაქარია ბეგლარიშვილმა, საბა ლობჟანიძემ, ვაკო ყაზაიშვილმა და ნიკა აფაქიძემ, ხოლო 5 ქართველი ტურის სიმბოლურ ნაკრებში მოხვდა...

პოლონური ექსტრაკლასას 28-ე ტურში "პოგონმა" გასვლაზე "ტერმალიცა" 4:2 დაამარცხა. ამ მატჩში სტუმართა ქართველმა მცველმა ლაშა დვალმა დუბლი შეასრულა და ტურის სიმბოლურ ნაკრებშიც მოხვდა. "პოგონის" დამრიგებელმა კოსტა რუნიჩმა საქართველოს ნაკრების ცენტრალური მცველი შეაქო:

"ის სტაბილურია და შესანიშნავ ფორმაშია. ვარჯიშებზე კარგად ჩანს მისი დიდი შრომისმოყვარეობა. მისი ეს თავდადება გადავიდა მინდორზე და აისახა გატანილ გოლებში", - თქვა რუნიჩმა.

კილცეს "კორონამ" "გურნიკთან" 2:2 ითამაშა. "კორონას" თავდამსხმელმა ნიკა კაჭარავამ კი მეტოქეს მეორე გოლი გაუტანა. შედეგად, ორივე ქართველი ტურის სიმბოლურ ნაკრებში მოხვდა.

ასევე ტურის სიმბოლურში მოხვდა საბა ლობჟანიძე. დანიური სუპერლიგის 26-ე ტურის მატჩში "რანდერსმა" "ოდენსეს" უმასპინძლა და 4:1 დაამარცხა.

ერთთვიანი იძულებითი შესვენების შემდეგ, ლობჟანიძე "რანდერსში" გამოჩნდა და პირველივე შეხვედრაში თავი გამოიჩინა. საქართველოს ნარების შემტევმა ნახევარმცველმა მესამე საგოლე შეტევა განავითარა, ხოლო მეოთხე გოლი თავად გაიტანა. შედეგად, ისიც ტურის სიმბოლურ ნაკრებში შეიყვანეს.

ვოეტბალზონე.ნლ-მა კი ჰოლანდიის ერედევიზიის 28-ე ტურში "ვიტესის" ქართველი კაპიტანი შოთა კაშია გამოარჩია და სიმბოლურ ნაკრებში შეიყვანა. არნემული კლუბი "ჰერაკლესს" დაუპირისპირდა. მატჩი 0:0 დასრულდა.

30 წლის ქართველის გამორჩევა გამოცემამ ასე დაასაბუთა: "4 ჩაჭრილი გადაცემა და 9 მოგებული ორთაბრძოლა - კაშიას მონაგარში. "ვიტესმა" მიმდინარე სეზონში მეშვიდედ ითამაშა ფრედ".

ყაზახეთის პრემიერლიგის მე-2 ტურში კი საქართველოს ეროვნული ნაკრების ნახევარმცველების, ჯაბა კანკავასა და ნიკა კვეკვესკირის "ტობოლი" შინ ყარაგანდის "შახტიორს" შეხვდა და ორივე ქართველმა სრულად ითამაშა.

"ტობოლი" 0:1 დამარცხდა და ამის მიუხედავად, კვეკვესკირი ყაზახეთის ფეხბურთის ფედერაციის ვებგვერდმა, კომპანია "ინსტატის" მონაცემებზე დაყრდნობით, ტურის სიმბოლურ გუნდში დაასახელა. შეგახსენებთ, რომ პირველ ტურში საუკეთესო 11 ფეხბურთელს შორის კანკავა მოხვდა.

მართალია, სიმბოლურში ვერ მოხვდა, მაგრამ პლოცკის "ვისლაში" გიორგი მერებაშვილმა მშვენიერი მატჩი ჩაატარა. ამ გუნდმა "შლასკთან" საგარეო მატჩში ერთადერთი გოლი მერებაშვილის წაქცევისთვის დანიშნული პენალტით გაიტანა.

ოთარ კაკაბაძეს კი ესპანელმა არბიტრმა შანსი წაართვა, სეზონის გოლის ავტორების ნომინაციაში მოხვედრილიყო. არადა, მე-40 წუთზე ქართველმა მცველმა საკუთარი ნახევრიდან ბურთი მეტოქის საჯარიმომდე მიიტანა, გზად 4 მცველი ჩამოიცილა, პასის შემდეგ ბურთი ისევ დაიბრუნა და ულამაზესი გოლი გაიტანა, მაგრამ... მსაჯმა პასის მომენტში თამაშგარე დააფიქსირა.

მართალია, გუგა ფალავანდიშვილი პოლონეთის ჩემპიონატის პირველ ლიგაშია, მაგრამ 24 წლისაა და, წესით, ნაკრებისთვის საინტერესო ფეხბურთელი უნდა იყოს. ბოლო ტურში მისმა "პოდბესკიძიემ" გასვლაზე ხოჟუვის "რუხი" 2:0 დაამარცხა.

ქართველი მოედანზე საუკეთესო იყო. პირველ ტაიმში ვალერიუს საბალას გოლი სწორედ ფალავანდიშვილის გადაცემით გავიდა. ამას გარდა, მანვე მეკარესთან პირისპირ დატოვა თავდამსხმელი, ხოლო შემდეგ უმწვავესი საგოლე შეტევა განავითარა.

სანაკრებო თამაშებისა და სეზონის განახლების ფონზე, ქართველების ასეთი თამაში სასიხარულო და დამაიმედებელია. მართალია, 10-15 წლის წინანდელივით ჩვენები ევროპულ ტოპლიგებში აღარ არიან, მაგრამ ვინც გვყავს, მათი წარმატებებიც სასიხარულოა, მით უფრო, სანაკრებო მატჩების წინ.

პლუს ამას, დაბრუნდა ჯანო ანანიძე, მალე ლევან მჭედლიძე და თორნიკე ოქრიაშვილიც ითამაშებენ, რაც ჩვენს ეროვნულ გუნდს საგრძნობლად გააძლიერებს და ერთა ლიგის გათამაშებაში წარმატების იმედს გაგვიჩენს.

ყოველდღიური სპორტული გაზეთი "ლელო"
1139
მკითხველის კომენტარები / 0 /
მსგავსი ამბები
რუბრიკის სხვა სიახლეები
;