ჯაბა დვალი ზესტაფონს დუბლით დაუბრუნდა!..

  • თავის დროზე ჯაბა დვალი ზესტაფონის ერთ-ერთი მთავარი ფიგურა იყო

35 წლის ჯაბა დვალი "ზესტაფონს" დაუბრუნდა. ამაზე უკვე ვწერდით. დვალი ერთ-ერთი ლიდერი გახლდათ იმ გამორჩეული გუნდისა, რომელიც წლების განმავლობაში ასევე ერთ-ერთი წამყვანი ქართული კლუბი იყო და ევროპაშიც ჩაატარა დასამახსოვრებელი მატჩები. თავად დვალს არაერთი გოლი გაუტანია მარგველთა მაისურით და ჩვენი ქვეყნის მასშტაბით დღემდე საუკეთესო მაჩვენებელი აქვს ევროგოლების განხრით.

დვალს "ზესტაფონში" მრავალმხრივი ფუნქცია ექნება: ის კლუბის ხელმძღვანელობაშიც იქნება, თბილისში ახალგახსნილ აკადემიასაც მიხედავს და... ფეხბურთსაც ითამაშებს.

ამასობაში, "ზესტაფონის" საიტზე საინტერესო ინფორმაცია გამოქვეყნდა: "საფეხბურთო კლუბმა "ზესტაფონმა" 2020 წლის სეზონისთვის მზადების პირველი ეტაპი დღეს (ხუთშაბათს - რედ) გამართული ორმხრივი მატჩით დაასრულა. გუნდის დამრიგებელმა მალხაზ ღონღაძემ ფეხბურთელები ორ პირობით გუნდად - "მწვანეებად" და "წითლებად" დაყო და ზესტაფონის ბაზაზე საინტერესო "ბურთაობა" გაჩაღდა.

დასაწყისში უნდა ითქვას იმის შესახებ, რომ წინასწარი გეგმის მიხედვით, დღეს ლანჩხუთის "ჩიბათის" წინააღმდეგ ამხანაგური მატჩი იგეგმებოდა, თუმცა ქვეყანაში შექმნილი საგანგებო ვითარების გამო, გურულებმა უარი განაცხადეს დღევანდელ სპარინგში მონაწილეობაზე. შედეგად, ჩვენი გუნდის სამწვრთნელო შტაბმა სწორედ დღევანდელი შეხვედრის ფორმატი დაგეგმა".

გუნდებმა ასეთი შემადგენლობებით იასპარეზეს: "მწვანეები" - მიქავა, სირაძე, ხუხუა, მოსიძე, სამხარაძე, ზარნაძე, ნანობაშვილი, ხარშილაძე, ბერაძე, დვალი; "წითლები" - ბ. გიორგაძე, ვარდოსანიძე, გულხადარაშვილი, ჩხიკვაძე, სამხარაძე, ბუბულაშვილი, ხარაიშვილი, გაჩეჩილაძე, გოგობერიშვილი, ოზბეთელაშვილი.

მნიშვნელოვანი იყო, რომ ჯაბა დვალმა დუბლი შეასრულა და გოლებით დაუბრუნდა "ზესტაფონს". საბოლოოდ, ძალიან საინტერესო დაპირისპირება "მწვანეთა" გამარჯვებით, 6:3 დასრულდა.

"ჯანმრთელობასთან დაკავშირებული სხვადასხვა სახის მცირე პრობლემის გამო, "შიდა დაპირისპირებაში" მონაწილეობა არ მიუღიათ ალექსანდრე გიორგაძესა და ბექა ზაქრაძეს. ეს ფეხბურთელები მზადების პროცესს უახლოეს დღეებში დაუბრუნდებიან", - წერს "ზესტაფონის" საიტი.

სეზონისთვის მზადების პირველი ეტაპი დასრულდა. გუნდი ორ დღეს დაისვენებს და ვარჯიშს 15 მარტს გააგრძელებს. შემდეგი სპარინგმატჩი 18 მარტსაა დაგეგმილი - ამ დღეს ზესტაფონელები საკუთარ ბაზაზე უმაღლესლიგელ საჩხერის "ჩიხურას" უმასპინძლებენ.

7250
მკითხველის კომენტარები / 0 /
მსგავსი ამბები
რუბრიკის სხვა სიახლეები
;