[VIDEO] -20 გრადუს ყინვაში ნაოპერაციები კაცს რომ ათამაშებ... ანანიძე და ცვლილებების ქარი

დიდხანს ცდილობდა ნიჭიერი ქართველი ფეხბურთელი ჯანო ანანიძე რუსულ ყინვასთან, იქაურ ფეხბურთთან შეგუებას, მაგრამ... თეთრ დათვებში შესაძლებლობების მეათედიც ვერ გამოავლინა.

ათწლიანი მოლოდინის შემდეგ, ბოლოს და ბოლოს, დაუბერა "ცვლილებების ქარმა", ანანიძემ თბილი ქვეყნისკენ - კვიპროსისკენ გაიხედა და სულ მალე მას "ანორთოსისის" მაისურით მოედანზე ვიხილავთ.

სითბო სიცივის ნაცვლად, ტექნიკური ფეხბურთი ხისტის ნაცვლად, გიტარა ბალალაიკის ნაცვლად... რაც მთავარია "ჩვენი" მწვრთნელი "სხვა" მწვრთნელის ნაცვლად. ჯანო ნებისმიერ სხვა გუნდში რომ გადასულიყო ერთ შეკითხვას გვერდს ვერ ავუვლიდით - ითამაშებს? "ანორთოსისის" შემთხვევაში ამ სიტყვას კითხვის კი არა ძახილის ნიშანი დაესმის - ითამაშებს! იმიტომ, რომ მწვრთნელი ათამაშებს, კვიპრუსულ გუნდს ხომ თემურ ქეცბაია წვრთნის.

ამასწინათ როკ-ჯგუფ "სკორპიონსის" ჰიტებს ვუსმენდი. ერთმა სიმღერამ ჩამითრია. ტექსტში ისეთი სიტყვები იყო, თითქოს ჯანო ანანიძეზე დაწერესო: "მოსკოვი", "ცაში მომავალი ჩანს", "ცვლილებების ქარი", "გიტარა" "ბალალაიკის" ნაცვლად...
მოდით ტექსტი ვთარგმნოთ და წარმოვიდგინოთ, რომ ამ სიტყვებს ჯანო ანანიძე ღიღინებს:

"მივუყვები მოსკოვს,
გორკის პარკისკენ ვეშვები,
ყურს ვუგდებ ცვლილებების ქარს.
აგვისტო, ზაფხულის ღამეა,
ჯარისკაცები მიდი-მოდიან,
ცვლილებების ქარის ხმაა.
მსოფლიო პატარაა
გიფიქრია ოდესმე,
ისე ახლოს ვიყავით, როგორც ძმები.
ცაში მომავალი მოჩანს,
ეს ყველგან იგრძნობა
ცვლილებების ქარის ქროლვასთან ერთად.
გადამაგდებს ჯადოსნურ მომენტში,
გმირულ ღამეში,
სადაც მომავლის ბავშვები ოცნებობენ
ცვლილებების ქარზე
ქუჩაში მოსეირნემ
წარსულის მოგონებები
უნდა დავმარხო, სამუდამოდ.
მივუყვები მოსკოვს,
გორკის პარკისკენ ვეშვები
ყურს ვუგდებ ცვლილებების ქარს
ცვლილებების ქარი
უბერავს პირდაპირ სახეში,
როგორც შტორმი, რომელიც რეკავს
თავისუფლების ზარს
გონების მშვიდობისთვის.
იმღეროს ბალალაიკამ ის,
რისი თქმაც ჩემს გიტარას სურს..."

შემდეგ მისამღერი მეორდება. ამიტომ, ტექსტის თარგმნა აქ დავასრულოთ.

ჯანო ანანიძის სიტუაციას მხოლოდ "აგვისტო, ზაფხულის ღამე" არ შეესაბამება, თორემ "ცვლილებების ქარი" რომ სჭირდეოდა, დიდი ხანია, თავადაც კარგად მოეხსენებოდა. ის ხომ ბავშვივით ოცნებობს "ჯადოსნურ მომენტზე", როცა ერთ "ღამეში გმირად" იქცევა. ასეთი ნიჭის ფეხბურთელს მართლაც შეუძლია შედარებით ლაღი სტილის ფეხბურთში გმირად მოგვევლინოს.

რაც მთავარია - "სპარტაკისგან" "თავისუფლების ზარმა" დარეკა! ჯანომ ახალი კლუბი უკვე მოძებნა. უფრო სწორად, ახალმა კუბმა მოძებნა, სადაც "ბავშვობის ოცნებას" აიხდენს.

ეს მხოლოდ ანანიძის ოცნება როდია: დიდი ხანია, მთელი საქართველო ოცნებობს საქართველოს ნაკრებში კარგი დირიჟორის გამოჩენაზე... დავით ყიფიანი რომ იყო, გიორგი ქინქლაძე... ანანიძე პატარა აღარაა, 27 წლისაა. ამ ასაკში ყიფიანიცა და ქინქლაძეც დიდი ფეხბურთელები იყვნენ. დაგვიანებული არაფერია, აგერ, პოლ გოგენმა ფუნჯი პირველად 34 წლისამ აიღო. ჯანოს შემთხვევაში მთავარი სწორედ ის არის, რომ "ცვლილებების ქარმა" (Wind Of Change) უკვე დაუბერა.

ქარზე გამახსენდა: 2017 წლის სექტემბერში ჯანო ანანიძემ მუხლის ტრავმა მიიღო და ექვსთვიანი შესვენების შემდეგ მოედანს 2018-ის მარტში დაუბრუნდა. მაშინდელ "ლელოში" დაიწერა: "მოსკოვური დერბის 78-ე წუთზე მოედანზე ჯანო ანანიძე გამოჩნდა. აი, ასე, 20-გრადუსიან ყინვაში შედგა ჯანოს დაბრუნება ფეხბურთში".

დაუკვირდით ტემპერატურას? - მინუს 20 გრადუსიო! ასეთ დროს, თოვლსა და ქარბუქში ტრავმების ალბათობა ხომ მაქსიმუმამდე იზრდება. გავიდა ერთი კვირა და დაიწერა - ჯანოს ტრავმა გაუმიზეზდაო.

კიდევ როდის იზრდება ტრავმის ალბათობა იცით? - როდესაც რიტმიდან ხარ ამოვარდნილი, არათანაბრად იტვირთები. "ბევრი პრობლემა იყო იმის გამო, რომ არ მაძლევდნენ საშუალებას, მეგრძნო რიტმი. როცა ერთ თამაშს გათამაშებენ და მერე ხუთი შეხვედრის განმავლობაში სკამზე გსვამენ... არ შეიძლება, ასე მოექცე ფეხბურთელს," - ეს ჯანო ანანიძის სიტყვებია.

"სკორპიონსის" მუსიკის ტექსტით დავასრულოთ: "წარსულის მოგონებები უნდა დავმარხო, სამუდამოდ."

კვიპროსში ცხელა: ზაფხული რვა თვე გრძელდება...

5862
მკითხველის კომენტარები / 1 /
playkey
1
Cyprus :) No syprus
მსგავსი ამბები
რუბრიკის სხვა სიახლეები
;